Read kumam 2 Iyutun 21 Bible Online

2 Iyutun 21 - kumam bible

2 Iyutun 21

¹Yekosapat bin oko to di oko yike i nget joakwari mege i Bomba ka Daudi, di wode Yekoram oko lunyo wange bala abaka.

²Yekoram wot ka Abaka Yekosapat bin tie kede imiegu mege kanyape: Asaria, Yekiel, Sakaria, Asariaku, Emikairi, kede Sepatia.

³Papa gi bin omio gi giamia atot, me siliba, saabu, kede jamini abeco me wel, kede bomban kame kocelo kitek i Yuda. Do eko mino ajakanut but Yekoram pien oudo ebedo atin kao.

⁴I kare kame Yekoram do otieko bedo kede i kom me ajakanut ka papa mere di apugan mere otieko sipakin, en eko neneko imiegu mege dedede, kede jotic mogo da me Isirael.

⁵Mwaka me dongo ka Yekoram oudo tie ot adek kiwie are i kare kame bin en ecako kede pug. En bin eko pug i Yerusalem pi mwakini kanyauni.

⁶Dako mere oudo obedo nyar ka Akab, omio en eko lubo ikiteso areco me jo me diakal ka Akab kede me abakai ace me Isirael; en eko timo gikame rac i nyim Rwot.

⁷Do Rwot oko dagi muducaro jo me ot ka Daudi pi isikan kame en oudo etieko timo kede Daudi, di ecikere be ikwae mege bino bedo pug nakanaka.

⁸I kare me apugan ka Yekoram, Edom oko jemo ne Yuda di gida kiko yero abaka gi amako gi.

⁹Di Yekoram oko ngolo eoto Edom kede jotel me isirikalen mege kede cabalan mege dedede me yi. En eoto iwor di eko suro jo me Edom kame oudo olukaro en karacel kede jodongo me isirikalen mege ayi kede cabalan.

¹⁰Cako i kare nono tuno tin Edom oko bedo jemo ne apugan me Yuda. Bomba me Libina da oko jemo i kare acel nono, pien Yekoram oudo oweko Rwot, Rubanga ka joakwari mege.

¹¹Medo i wi manono, Yekoram bin ogero kabedere me woro caljwogi i wi imukuran me Yuda, di eko mino jo me Yuda kede Yerusalem oweko bedo kede genere but Rwot kiko parao tenge.

¹²Enabi Elia bin oko wandiko ne Yekoram baluwa kaman: “Rwot Rubanga ka kwaruni Daudi waco be in likame iko lubo yongayo me kuo ka papa ni Yekosapat, arabo yongayo me kuo ka Abaka Asa me Yuda.

¹³Akaka manono, in iko lubo yongayo me kuo me abakai me Isirael, di iko mino jo me Yuda kede me Yerusalem oweko bedo kede genere but Rwot, bala kame jo me ot ka Akab bin otimo, ida ineneko imiegu ni kikokome, jo kame oudo beco loi.

¹⁴Aso, nataman Rwot bino mino can atek poto i kom jo ni, idwe ni, mon ni, kede jamini ni dedede.

¹⁵Ida kikomi tuo alit me amontena bino maki, di eko bedo meede ameda buli ceng tuno amontena ni bwote ooko.”

¹⁶Rwot oko supo cuny jo Pilistia kede cuny imuarabun kame oudo tie bedo i nget jo Abisinia mogo, pi gin ot yi kede Yekoram.

¹⁷Gin kiko ot suro Yuda, di kiko yako jamini dedede kame gin kiko udo i ot ka abaka, kiton awobe mege kede mon mege. Akasia wode atidi kenekene en kame bin oko dong.

¹⁸Di do magonogi dedede otieko timere, Rwot oko mino tuo kalikame cango me amontena omako abaka.

¹⁹En eko bedo ture, di tuo meede ameda. Tetu atiekini me mwaka me are me ture mere, di do amontena mege bwote ooko, di en eko to di ewinyo lito atek twatwal. Jo mege likame oko moko mac moro me mine wor i to mere, bala kame bin kotimo ne kede joakwari mege.

²⁰Yekoram bin odoko abaka di mwakini me dongo mere oudo tie ot adek kiwie are. En bin eko pug pi mwakini kanyauni i Yerusalem. I kare kame en eko to kede, likame tie ngatamoro oko pare. Gin kiko yike i Bomba ka Daudi, do likame i atesin me abakai.