Read kumam 2 Iyutun 25 Bible Online

2 Iyutun 25 - kumam bible

2 Iyutun 25

¹Mwakini me dongo ka Amasia oudo tie ot are kiwie kany i kare kame bin en ecako kede pug. En bin eko pug i Yerusalem pi mwakini ot are kiwie kanyangon. Nying toto mere bin Yekoyadan, dano me Yerusalem.

²En bin eko timo gikame poore i nyim Rwot, cite likame kede cunye lung.

³Oyotoyot di do en etieko sipakin i apugan, en eko neneko jotic kame bin oneko papa mere, abaka.

⁴Do en likame eko neneko idwe gi; en elubo kop kame bin kowandiko i itabu me iswilia ka Musa, kakame Rwot omio iye cik be, “Likame kobino neko jonywal pi dub me idwe gi, arabo neko idwe pi dub me jonywal gi; do kobino neko ngat acelacel pi dub mere en kikome.”

⁵Abaka Amasia bin oko keto cuo me ikekon ka Yuda kede Benjamin i ikodeta me isirikalen, di lubere kede diakale gi, di eko keto jodongo kame telo isirikalen tutumia tutumia, kede kame telo isirikalen tol acel tol acel. En ecoko cuo kame mwakini gi me dongo oudo tie ot are ot malo. En eko maro wel gin dedede di eko udo be kitie tutumia tol adek (300,000), cuo kame koyero, kame romo mako tong kede ebuku di kiko ot i yi.

⁶En bin bobo da eko pango isirikalen tutumia tol acel (100,000) ki Isirael, kame tek i yi. En epango gi i wel me kilo me siliba tutumia adek kede tol ongwon (3,400).

⁷Do enabi bin oko ot bute di eko waco ne be, “Okwe abaka, kur iyei ne isirikalen me Isirael upere kedi, pien Rwot likame tie kede jo Isirael, gin jo Epuraimu nogi dedede.

⁸In cengemogo itamo be gin kibino medo ni teko me yi, do Rubanga en kame tie kede twer me mino dano bwono yi arabo mino kobwone i yi, doko en ebino mino jokwor ni bwoni.”

⁹Amasia oko penyo enabi nono be, “Do nyo kame wan obino timo i kom siliba kame ango atieko culo pi isirikalen me Isirael?” Enabi oko dwoko ne be, “Rwot karuno mino wun kame kalamo manono.”

¹⁰Aso, Amasia bin oko mino isirikalen kame oudo obino ki Epuraimu odok paco. Do gin cuny gi oko wang i kom jo Yuda, di kiko dok di kililo kitek.

¹¹Amasia bin oko udo nwangcuny di eko telo jo mege kioto i Aditot me Munyo. Gin kiko yi i kunono di kiko neko isirikalen tutumia tomon (10,000) me Edom,

¹²kede kiko mako akuo mege da tutumia tomon (10,000). Gin kiko tero gi malo i wi moru me Sela di kiko remoro gi kipopoto piny paka nyinyitun.

¹³Do isirikalen me Isirael kame Amasia oudo oko dagi negi ot i yi, di eko dwoko gi paco, oko ot suro bomban me Yuda cako ki Samaria tuno Bet Koron. Gin kiko neko jo tutumia adek (3,000), kede kiko tero jamini atot kame kiyako.

¹⁴Kakame Amasia otieko bwono kede jo Edom, en eko dok Yerusalem; en etero rubangan me jo Edom di eko keto gi bala rubangan mege, di eko donyo woro gi di edunyo negi giayala me odok angwe kur.

¹⁵Manoni oko mino cuny Rwot owang ne Amasia di eko cwano enabi bute. Enabi nono oko penyo Amasia be, “Pinyo komio in iko lokere woro rubangan me kumbor, kalikame oko karuno lako joe gi ki cingi?”

¹⁶Do di enabi nono pwodi tie yamo, abaka oko waco ne be, “Benyo, mam wan otieko keti pi bedo ngamino abaka tam? Lingi! Pinyo kamio imito be neki?” Aso, enabi nono oko ling, do di pwodi likame eling en oudo ewaco be, “Ango angeo be Rubanga otieko moko tam mere pi muducaro in, piento in itieko timo gi noni di iko dagi winyo tam kame ango ami.”

¹⁷Di do Abaka Amasia me Yuda oko yamo kede jo kame bin mie tam di en eko ooro jo but Abaka Yekoyasi me Isirael, wot ka Yekoyakas, akwar Yeku, kede kop kame waco be, “Bia oriami wang i wang.”

¹⁸Do Abaka Yekoyasi oko dwoko ne kop kame waco be, “Yat me okuto moro kame oudo tie i abum me Lebanon bin ocwao kop but yat seda me abum me Lebanon di ewaco ne be, ‘Mia nyari anyom ne woda’; do le moro me obar me Lebanon oko beo di eko nyonyono yat me okuto nono.

¹⁹In iwaco be, ‘Neni, ango atieko bwono jo Edom,’ di manono oko mini idoko ngaewaka. Aso, dong bedo paco ni. Pinyo kame mio in imito mono peko di iko kelo can i komi kede i kom jo me Yuda?”

²⁰Do Amasia oko dagi winyo kop mere. Manono oudo obedo iik ka Rubanga, tetekeny emi bwon gi, pien gin oudo kidonyo woro rubangan me jo me Edom.

²¹Aso, Abaka Yekoyasi me Isirael oko yai ot yi kede Abaka Amasia me Yuda. Gin bin kiko riamo Bet Semes i Yuda.

²²Isirael oko bwono Yuda di isirikalen mege dedede oko ringo kidok i miere gi.

²³Abaka Yekoyasi me Isirael bin oko mako Abaka Amasia me Yuda bala mabus. En eko tere Yerusalem, di eko reto apama me Yerusalem piny, cako ki Erute me Epuraimu tuno i Erute me Kona, kakame boro mere buco romo mita tol are (200).

²⁴En eko yako saabu kede siliba dedede, karacel kede jamini kame bin ikwae ka Obed Edom gwoko, kiton jamini me ot ka abaka kame bin kokano. Emako jo da di eko tero bala mabus kame kopoore lako alaka, di en eko dok Samaria.

²⁵Abaka Amasia me Yuda, oko medo bedo kuo pi mwakini tomon kiwie kany ingei to ka Abaka Yekoyasi me Isirael.

²⁶Gi dedede kame Amasia bin oko timo, cako ki agege tuno i atiekini me apugan mere, gin dedede kowandiko gi i Itabu me Itatam amako Abakai me Yuda kede Isirael.

²⁷Cako i kare kame bin en eko lokere kede tenge kibut Rwot, jo oko cako poro kop i kome i Yerusalem. En bin eko ringo Lakis, do jokwor mege oko lube kunono di gin kiko neke.

²⁸Gin kiko mino asigira oyeo liel mere di kiko dwoke Yerusalem, di oko yike kabedo kame bin koyiko iye abakai i Bomba ka Daudi.