Read kumam 2 Iyutun 26 Bible Online

2 Iyutun 26 - kumam bible

2 Iyutun 26

¹Jo me Yuda bin oko keto Usia obedo abaka kame lunyo wang papa mere Amasia, di mwakini me dongo mere oudo tie tomon kiwie kanyape.

²Usia bin oko dwoko bomba me Elat odok Yuda, di en eko medo gere ingei to ka Amasia papa mere.

³Mwakini me dongo ka Usia oudo tie tomon kiwie kanyape i kare kame en ecako kede pug. En bin eko pug i Yerusalem pi mwakini ot kany kiwie are. Nying toto mere bin Yekolia, dano me Yerusalem.

⁴En bin eko bedo timo gikame poore i nyim Rwot, bala kame papa mere Amasia bin otimo.

⁵En bin ebedo timo gikame Rubanga mito i kare me kuo ka Sakaria, ngat kame bin mie tam me bedo kede wor but Rubanga. Di i kare nono lung Rubanga oko mine winyo.

⁶Usia bin oko ot pi yi kede jo Pilistia, di eko rereto apama me bomban me Gat, Yabune, kede Asidod. En eko gero bomban i adul me Asidod kede kabedere ace i Pilistia.

⁷Rubanga bin oko konye di eko bwono jo Pilistia, imuarabun kame bin bedo Gurubaal, kede jo Meunim.

⁸Jo Amon bin obedo culo esolo but Usia, di en eko doko tek, di nyinge oko doko iruo kiton i Misiri.

⁹Usia bin ogero gedo mogo aboco Yerusalem i Erute me Kona, i Erute me Aditot, kede i isondana me apama.

¹⁰En bin egero da gedo aboco i wi tim kede eko kunyo ataparin atot, pien oudo etie kede doke kede romini atot, i dud mori me bad tetu tim kede i ebar. En oudo emaro pur, pi manono en bin eko keto jopur kede jo kame gwoko olok i piny kobedo mori mori nono, kede i lobere dedede amio.

¹¹En bin etie kede isirikalen kame bedo di kiikere pi yi. Yeyel kede Maseya en kame bin obedo ikalanin kame tic gi en oudo ngeno wel me isirikalen, di Kanania, en ngat acel kikom jotic ka abaka kame telo gi.

¹²Jotel me diakale tutumia are kede tol kanyape (2,600), jo kame bin tek i yi, en kame bin telo ikodeta me isirikalen nogi.

¹³Gin bin kitelo isirikalen tutumia tol adek kede kanyaare, kede tol kany (307,500), kame oudo karuno yi kitek pi konyo abaka ki cing jokwor mege.

¹⁴Usia bin omio isirikalen mege dedede ibukui, tongini, icoron atek, ikotin me lilime, imalia, kede kide me aporocet.

¹⁵En eko mino jodiru oteto icumai me gweno imalia kede me lwomo kide adongo, di eko cibo i wi gedo aboco kede i ikonai me apama me bomba. Iruo me nyinge oko sarakin kabedere dedede, pien Rwot oudo obedo konye tuno en doko tek.

¹⁶Do i kare kame Abaka Usia bin oko doko tek kede, en eko doko ngaewaka, di manono oko kelo ne peko. Pien etimo gi kalikame nyuto genere but Rwot Rubanga mere, i yore me en kikome donyo i tempulo pi wango adok angwe kur i wi alutari.

¹⁷Do ngasaseredoti Asaria, kede josaseredoti ot kanyauni icegun, jo atek kalikame tie kede lworo moro, oko lubo abaka

¹⁸pi genge. Gin kiwaco ne be, “Usia! In ili kede twer me wango odok angwe kur but Rwot. Josaseredoti, ikwae ka Aaron kenekene en kame kotieko kwero pi timo tic noni. Dony ooko iwek kabedo kacil. In itieko timo dub, doko likame ibino udo winyo moro kibut Rwot Rubanga.”

¹⁹Usia oko doko ger. Esawa nono oudo en etie cungo i tempulo i nget alutari me wango odok angwe kur, di emako gi me wango odok angwe kur i cinge pi mino giayala. Di do kakame en eko doko ger kede ne josaseredoti, tuwo arac me delkom oko mako tur nyime esawa nono i nyim josaseredoti kanono.

²⁰Kakame ngatel me josaseredoti Asaria, kede josaseredoti icegun dedede oneno kede tuwo arac me delkom i nyim Asaria, gin kiko waco ne pi yai weko tempulo awakawaka. Eda kikome eko donyo ooko awakawaka, pien Rwot oudo otieko mine alola.

²¹Abaka Usia oko bedo kede tuo arac me delkom nono tuno to mere. En bin oko poke bedo i ode kene, di likame oudo oyei ne bobo donyo i tempulo. Wode Yotam en kame oko doko ngatel me paco me abaka, di epugo da jo me piny nono.

²²Aso, enabi Isaya wot ka Amos en kame bin oko wandiko gi dedede kame Usia bin otimo i kare me apugan mere.

²³Usia bin oko to di oko yike i nget joakwari mege, do pien oudo etie kede tuwo arac me delkom, omio likame oko yike i atesin me abakai, do oko yike i limbo koudo obedo me abakai. Wode Yotam en kame bin oko lunyo wange bala abaka.