Read kumam 2 Iyutun 27 Bible Online

2 Iyutun 27 - kumam bible

2 Iyutun 27

¹Mwakini me dongo ka Yotam oudo tie ot are kiwie kany i kare kame ecako kede pug, di en bin eko pug i Yerusalem pi mwakini tomon kiwie kanyape. Nying toto mere bin Yerusa nyar ka Sadoki.

²En bin eko bedo timo gikame poore i nyim Rwot, bala kame bin papa mere Usia obedo timo. En likame bin eko donyo i tempulo pi wango odok angwe kur i wi alutari. Do jo pwodi oko meede kede timo dub.

³Yotam en kame bin ogero Erute me Bad tetu Malo me tempulo, di eko timo tic atek me gero apama me bomba i adul kame kolwongo be Opel.

⁴Medo i kom manono, en bin egero da bomban i piny kobedo mori mori me Yuda, kede eko gero cel mogo atek kede da gedo mogo aboco malo i wi imukuran kame abum bin tie iye.

⁵En bin eko yi kede abaka me jo Amon di eko bwono gi. Di en eko dino jo Amon pi bedo raro ne kilo tutumia adek kede tol ongwon me siliba (3,400), kilo milion acel (1,000,000) me engano, kede kilo milion acel (1,000,000) me mawele. Manoni gin kibedo timo buli mwaka pi mwakini adek.

⁶Yotam bin oko doko tek piento en ebedo lubo Rwot Rubanga mere kede genere.

⁷Gi dedede apat kame Yotam bin oko timo i kare me apugan mere, yi mege, iik mege me tic, gin dedede kowandiko gi i Itabu me Itatam amako Abakai me Isirael kede Yuda.

⁸Mwakini me dongo ka Yotam oudo tie ot are kiwie kany i kare kame bin en ecako kede pug. En bin eko pug pi mwakini tomon kiwie kanyape i Yerusalem.

⁹Yotam bin oko to di oko yike i Bomba ka Daudi di wode Akas en oko lunyo wange bala abaka.