Read kumam 2 Iyutun 29 Bible Online

2 Iyutun 29 - kumam bible

2 Iyutun 29

¹Mwakini me dongo ka Esekia oudo tie ot are kiwie kany i kare kame bin en ecako kede pug. En bin eko pug i Yerusalem pi mwakini ot are kiwie kanyangon. Nying toto mere bin Abija nyar ka Sakaria.

²En bin eko timo gikame poore i nyim Rwot bala kame bin kwaru mere Daudi otimo.

³I mwaka me agege me apugan mere, i duwe me agege, Esekia oko yabo ikekon me tempulo di eko iiko gi.

⁴En eko coko josaseredoti kede Jolebi i diakal me tempulo, i bad tetu kide.

⁵En eko waco negi be, “Winyunu kop na, wun Jolebi! Poore wun ilonyerenu, kede ikounu lonyo tempulo ka Rwot, Rubanga ka joakwari wu. Kwanyunu tenge ki tempulo gi dedede kame munao en.

⁶Joakwari wa oudo obedo jo kalikame tie kede genere but Rwot Rubanga wa di gin kiko timo gikarac i nyime. Gin kiweke di kiko weko kabedo mere da; gin kiko lokere tenge kibute.

⁷Gin kicego ikekon me tempulo di kiko neko italan. Gin kiko weko mino giayala me odok angwe kur akadi mino giayala awanga i tempulo ka Rubanga me Isirael.

⁸Manoni en komio Rwot oko lilo ne Yuda kede Yerusalem, di en eko mino gin kidoko gikame jo neno di kiko bedo kede lworo, ur, kede acae, bala kame nataman wuda inenunu kede wangu.

⁹Kotieko neko joapapi wa i yi, doko awobe wa kede anyira wa kiton mon wa kotieko mako di oko tero bala mabus.

¹⁰“Nataman ango cunya mito timo isikan kede Rwot, Rubanga me Isirael, tetekeny amoto ekwany lilo mere tenge kibut wa.

¹¹Awobe na, kur ibedunu kede ajajalun, pien Rwot otieko yero wun pi bedo jotic mege kame cungo i nyime di kitimo tic mere, kede pi mino giayala bute.”

¹²Jolebi kame oko yai ot timo tic gin ige: Ki ekeko ka Kokat, Makat wot ka Amasai kede Yoweri wot ka Asaria Ki ekeko ka Merari, Kis wot ka Abidi kede Asaria wot ka Yekalelel Ki ekeko ka Gereson, Yoa wot ka Sima kede Eden wot ka Yoa Ki ekeko ka Elisapan, Simiri kede Yeyel Ki ekeko ka Asap, Sakaria kede Matania Ki ekeko ka Keman, Yekuel kede Simei Ki ekeko ka Yedutun, Semaya kede Usiel

¹⁵Jo nogi oko coko karacel Jolebi wad gi, di gin dedede kiko lonyere. Gin kiko donyo i tempulo bala kame abaka oudo ociko, pi kwanyo tenge gi dedede kame munao en, di lubere kede cik kame Rwot oudo omio.

¹⁶Josaseredoti oko donyo Kabedo Kacil me tempulo pi lonye, di gin kiko kwanyo ooko i diakal me tempulo gi dedede kopwokere, kame gin kiko udo i tempulo. Di Jolebi oko kwanyo jamini nogo di kiko tero gi i aditot me Kideron.

¹⁷Gin bin kicako tic noni me lonyo tempulo i buto duwe acel me duwe me acel, di i buto duwe kanyauni gin oudo kitieko do timo kamanoni kiton tuno i agola kame kodonyo kede i tempulo. Di do gin kiko bobo meede kede timo tic me lonyo yi tempulo pi ceng kanyauni ace. Aso, gi bin kiko tieko tic i buto duwe tomon kiwie kanyape me duwe me acel nono.

¹⁸Jolebi oko ot but Abaka Esekia di gin kiko waco ne be, “Wan otieko lonyo tempulo lung, kiton alutari me wango giayala kede jamini dedede me tic mege, emesa me keto mugati i nyim Rwot kede jamini dedede me tic mege.

¹⁹Wan otieko dwoko da jamini dedede kame bin Abaka Akas okwanyo tenge ki tempulo i kare kame bin en likame eko bedo kede genere but Rwot i kare me apugan mere.”

²⁰Oru mere odiko sek, Abaka Esekia oko coko jodongo me bomba, di gin dedede kiko ot i tempulo.

²¹Gin kitero twonin kanyaare, imerekekin kanyaare, iduwe romini kanyaare kede ikoroi kanyaare pi bedo giayala me kwanyo dub me jo me diakal ka abaka kede me jo me Yuda. Abaka oko mino cik but josaseredoti, ikwae ka Aaron pi mino leini nogo bala giayala i wi alutari ka Rwot.

²²Aso, josaseredoti oko ngongolo twonin nogo, idwe romini, kede imerekekin, di gin kiko kikiro remo gi i wi alutari.

²³Di do kiko kwanyo ikoroi me giayala me kwanyo dub di kiko tero but abaka kede jo kocokere dedede; gin kiko dokakino cing gi i wi gi.

²⁴Di do josaseredoti oko ngongolo ikoroi nogo di gin kiko onyo remo gi i wi alutari bala giayala kame kwanyo dub me jo dedede me Isirael, pien abaka oudo omio cik be poore mi giayala awanga kede giayala me kwanyo dub pi jo Isirael lung.

²⁵Abaka Esekia oko keto Jolebi i tempulo di kimako suanin abatal me gono were, adungun, kede arigirigin. En elubo cik dedede kame Rwot bin omio Abaka Daudi di ebeo kibut Gad enabi ka abaka, kede enabi Natan.

²⁶Jolebi oko cungo di kimako jamini me gono were kame bin Abaka Daudi otio kede gi, di josaseredoti da oko cungo kunono di kimako agwarai.

²⁷Di Esekia oko mino cik be mi giayala awanga i wi alutari. Kakame bin oko cako mino kede giayala awanga, jo da oko cako wero were me pako Rwot, di okuto agwarai kede kogoo jamini me wer kame bin Abaka Daudi me Isirael otio kede.

²⁸Jo dedede koudo ocokere oko woro Rwot, di wer kede kuto agwarai meede anyim, tuno giayala dedede tieko wang.

²⁹Di do Abaka Esekia kede jo dedede oko riondiko piny di kiko woro Rubanga.

³⁰Abaka Esekia kede jotel oko mino cik but Jolebi pi gin cako pako Rwot kede were ka Daudi kede me enabi Asap. Gin kiko wero were me pak kede ilel adwong, di kiko luro wi gi piny kiko woro Rubanga.

³¹Di Esekia oko waco ne jo be, “Wun nataman itiekunu lonyere pi bedo jo ka Rwot, kelunu do giayala wu angola kede me pwoc but Rwot.” Jo oko kelo giayala angola kede me pwoc, kede jo kame bin cuny gi bin mito oko gida kelo giayala awanga.

³²Gin kiko kelo twonin ot kanyaare (70), imerekekin tol acel (100), kede idwe romini tol are (200) bala giayala awanga but Rwot.

³³Giayala kacil kame bin jo oko kelo oudo tie twonin tol kanyape (600) kede romini tutumia adek (3,000).

³⁴Do josaseredoti oudo nonok twatwal omio oudo likame kikaruno yango leini me giayala awanga dedede, pien jo atot kikom gi oudo pwodi likame olonyere. Aso, pien Jolebi dedede oudo otieko lonyere, gin do kiko konyo josaseredoti yango leini nogo tuno tieko gi.

³⁵Medo i wi mino giayala awanga, tic me josaseredoti doko en oudo wango kakamio me giayala me nywak, kede mino giayala amata kame bin komio karacel kede giayala awanga. Epone no en kame bin oko dwoko kede woro Rwot i tempulo.

³⁶Di Esekia kede jo dedede oko lelo pi gikame Rubanga oudo oko timo ne jo mege; pien Rubanga oudo okonyo gi omio kiko tieko timo gi dedede awakawaka.