Read kumam 2 Iyutun 30 Bible Online

2 Iyutun 30 - kumam bible

2 Iyutun 30

¹Abaka Esekia bin oko cwano kop but jo Isirael kede jo Yuda dedede, di eko wandiko baluwan da but jo Epuraimu kede jo Manase, pi lwongo gi bino i tempulo i Yerusalem, pi tedo Ebaga me Kalamo pi woro Rwot, Rubanga me Isirael.

²Abaka kede jotel kede jo dedede me Yerusalem oudo otieko moko tam gi pi tedo Ebaga me Kalamo i duwe me are,

³pien gin bin likame kiko karuno tedo ebaga nono i kare mere pien josaseredoti kotieko lonyere oudo pwodi nonok, doko jo da oudo pwodi likame ocokere Yerusalem.

⁴Abaka kede jo dedede kame oudo ocokere oko neno be iik nono oudo poore.

⁵Aso gin kiko moko be poore rab kop nono i Isirael lung, cako ki Beereseba tuno Dan, be jo dedede poore bin di kiko tedo Ebaga me Kalamo pi woro Rwot, Rubanga me Isirael, i Yerusalem; pien gin oudo pwodi likame kitedo ebaga nono di jo tot iye bala kame iswil mito.

⁶Joor oko ot ririmo Isirael kede Yuda lung di kitero baluwan koyai kibut abaka kede jotel, bala kame abaka oudo ociko. Baluwa nono oudo waco be, “Okwe wun jo Isirael, dwogunu but Rwot, Rubanga ka Aburam, Isaka, kede Yakobo, tetekeny amoto edwog bobo but wanunu jo anonok nogi kobwot ki cing abakai me Asiria.

⁷Kur ibedunu cal bala joakwari wu kede jo Isirael wadu kame bin likame oko bedo kede genere but Rwot, Rubanga ka joakwari gi, di manono oko mine emio lobo gi odong nono abongo jo, bala kame nataman inenunu.

⁸Kur ibedunu kede epali bala bin joakwari wu, do lubunu kop ka Rwot. Bianu i tempulo mere kame en etieko lonyo atwal, di ikounu woro Rwot Rubanga wu, tetekeny ewek bedo ger ne wu.

⁹Pien ka wun idwogunu but Rwot, jo komako joawade wu kede idwe wu di kiko tero bala mabus bino bedo kede cuny me kisa i kom gi di gin kiko weko gi kidwogo i lobo noni. Rwot Rubanga wu mwol doko en etie kede cuny me kisa, en ebino gamo wu ka wun idwogunu bute.”

¹⁰Joor oko ot ririmo bomban dedede kame bin tie i piny me Epuraimu kede Manase, ape tuno Sebulun. Do jo oko bedo nyero gi anyera di kicao gi.

¹¹Jo anonok kenekene ki ekeko ka Aser, Manase, kede Sebulun en oko mwolere di kiko yei ot Yerusalem.

¹²Rubanga oudo tie tic kede jo Yuda pi mino gi bedo kede cuny acel me lubo kop mere kame abaka kede jotel oudo ociko negi.

¹³Jo atot twatwal bin oko cokere Yerusalem i duwe me are pi tedo ebaga me mugati kame arup li iye.

¹⁴Gin kiko cako tic di kiko kwanyo alutarin apat dedede kede alutarin kame oudo koyalo iye odok angwe kur kame oudo tie Yerusalem, di kiko ot uco gi i Aditot me Kideron.

¹⁵Di i buto duwe tomon kiwie ongwon me duwe me are gin kiko ngongolo romini me Ebaga me Kalamo. Lewic oko mako josaseredoti kede Jolebi kalikame oudo olonyere mak atek, di do gida kiko lonyere di kiko tero giayala awanga i tempulo.

¹⁶Gin kiko donyo timo tic gi i tempulo di kilubo iswil ka Musa, dano ka Rubanga. Jolebi oko tero remo me giayala but josaseredoti, di gin kiko kikiro en i wi alutari.

¹⁷Pien oudo jo atot kame tie kacokere likame olonyere, Jolebi en kame oko do ngongolo romini me Ebaga me Kalamo ne jo dedede kalikame oudo olonyere, pi mino gi bedo gikacil but Rwot.

¹⁸Jo atot kame oudo obino ki Epuraimu, Manase, Isakar, kede Sebulun oudo likame olonyere, manono oko mino gin oudo kicamo Ebaga me Kalamo i yore kalikame poore. Abaka Esekia oko lego pirgi kaman: “Okwe in Rwot aber, sasiro jo dedede

¹⁹kame keto cuny gi moni, in Rwot Rubanga ka joakwari wa, bed bala gin likame kilubo cik me kabedo kacil, cik amako lonyere.”

²⁰Rwot oko gamo ilega ka Esekia; en eko sasiro jo di likame eko timo negi peko moro.

²¹Jo Isirael kame oudo tie Yerusalem oko tedo ebaga me mugati kame arup li iye pi ceng kanyaare kede kilel adwong; di Jolebi kede josaseredoti oko bedo pako Rwot buli ceng, di kigoo jamini me wer ne Rwot kede teko gi dedede.

²²Esekia oko pwono Jolebi dedede pi apiranut kame gin oudo kiko nyuto i tic ka Rwot. Aso, jo oko camo ebaga pi ceng kanyaare, di kimio giayala me nywak kede kimio pwoc but Rwot, Rubanga ka joakwari gi.

²³Di jo dedede kocokere oko bobo yei pi meede kede tedo ebaga pi ceng kanyaare ace; aso, gin bobo kiko tedo ebaga kede kilel pi ceng kanyaare.

²⁴Abaka Esekia me Yuda oudo omio jo twonin tutumia acel (1,000) kede romini tutumia kanyaare (7,000) pi bedo giayala, di jotel oko gida kwanyo twonin tutumia acel (1,000) kede romini tutumia tomon (10,000). Josaseredoti atot twatwal oko lonyere.

²⁵Jo dedede kocokere oko bedo kede kilel, jo Yuda, josaseredoti kede Jolebi, jo dedede koyai ki Isirael, jokumbor koyai ki Isirael, kede jokumbor kame oudo tie bedo Yuda.

²⁶Ilel adwong oko bedo Yerusalem, pien cako i kare ka Sulumani wot ka Abaka Daudi me Isirael likame oudo tie gimoro kacal kamanono kobedo Yerusalem.

²⁷Josaseredoti kede Jolebi oko yai malo di kiko cungo; gin kiko lamo ne jo winyo, di Rubanga oko winyo kwac gi i malo kabedo mere.