Read kumam 2 Iyutun 31 Bible Online

2 Iyutun 31 - kumam bible

2 Iyutun 31

¹Aso, kakame ebaga otiek kede, jo dedede me Isirael kame oudo tie kunono oko yai ot i bomban me Yuda dedede di gin kiko mumuko ipirin me kide kame oudo kosisipo me woro caljwogi, kitotongo da piny ipirin acungo pi rubanga Asera, di kiko dudubo alutarin kede kabedere me woro caljwogi i piny dedede me Yuda kede Benjamin, kede i piny me Epuraimu kede Manase. Di do jo dedede me Isirael oko dok i bomban gi, ngat acelacel odok ture.

²Abaka Esekia oko popoko josaseredoti kede Jolebi i ikodeta, di lubere kede tice gi. Tice kame en emio josaseredoti kede Jolebi gin en, mino giayala awanga kede giayala me nywak, woro Rubanga i tempulo kede mino pwoc kede pak i irutei me tempulo.

³Abaka oko kwanyo leini mege amake pi bedo giayala awanga kame komio but Rwot odiko kede otieno, kede giayala awanga kame komio i ceng Sabato, i Ebaga me Por Duwe, kede i ibagai apat kame iswil ka Rwot ociko be poore tedi.

⁴Abaka oko mino cik but jo kame bin bedo Yerusalem pi gin kelo giayala kame obedo iner me josaseredoti kede Jolebi, tetekeny gin kijal kare gi lung timo gikame Iswil ka Rwot mito.

⁵Oyotoyot di kop nono otuno but jo, jo Isirael oko mino jamini atot twatwal: gin kimio engano kame geo cek, bwini, mo me olibeti, mokic, kede jamini apat dedede kame kopuro apura; kede kiko tero da acel me tomon me gi dedede kame gin oudo kitie kede.

⁶Jo Isirael kede Yuda kame bin bedo i bomban me Yuda oko gida tero acel me tomon me doke, romini, kede acel me tomon me jamini dedede kame gin oudo kikwero but Rwot Rubanga gi, di gin kiko keto gi i atukito.

⁷Gin bin kicako coko giamia gi nogi i duwe me adek, di kiko tieko i duwe me kanyaare.

⁸Kakame Esekia kede jotel oko bino kede di gin kiko neno atukito nogo, gin kiko pako Rwot kede kiko pwono jo mege me Isirael.

⁹Esekia oko penyo josaseredoti kede Jolebi kop i kom giamia nogo.

¹⁰Ngatel me josaseredoti Asaria, akwar Sadoki oko waco ne be, “Cako i kare kame jo ocako kelo kede giamia gi i tempulo, wan obedo tie kede cam kame romo wa di cam atot da oko dong. Manoni otimere pien Rwot omio jo mege winyo.”

¹¹Di Esekia oko mino gi cik be miero kiik agolai me kano jame i tempulo; di gin kiko timo kamanono.

¹²Di do gin kiko bedo kede genere di kiko tero giamia nogo dedede kede acel me tomon i tempulo. Gin kiko keto Ngalebi kame nyinge Konania pi bedo ngadwong kame loo jamini nogo, di omin mere Simei oko bedo ngat kame konye i tic nono.

¹³Abaka Esekia kede ngatel me josaseredoti Asaria bin oko keto Jolebi tomon pi bedo jo kame konyo Konania kede omin mere Simei. Jolebi nogo bin gin en, Yekiel, Asasia, Nakat, Asakel, Yerimot, Yosabad, Eliel, Isimakia, Makat, kede Benaya.

¹⁴Kore wot ka Imina, Ngalebi kame bin obedo ngadar Erute me Bad tetu Kide me tempulo, en kame bin obedo ngadwong me gamo giamia me bercuny kame jo oudo mio but Rubanga, doko en nono kame oudo epopoko gi ne josaseredoti kede Jolebi.

¹⁵Jo agenere kame bin konye gin en, Eden, Miniamin, Yesua, Semaya, Amaria, kede Sekania. Jo nogi bin popoko giamia nogo i miere me josaseredoti, i bomban kame kitie iye, di lubere kede tic kame oudo opoko negi. Gin bin kipoko giamia nogo but joatino kede joadongo di rorom.

¹⁶Gin oudo likame kilubo ikekon me joakwari. Gin bin kiko poko giamia nogo but cuo dedede, cako kibut jo me mwakini ot adek[7] ot malo, dano kame oudo tie kede tic kame en etimo buli ceng i tempulo i ekodet gi.

¹⁷Bin kowandiko josaseredoti i tic di kolubo kede ude me joakwari gi, do Jolebi cako ki mwakini me dongo ot are ot kede malo, bin kowandiko gi i tic di kolubo kede ikodeta gi.

¹⁸Josaseredoti bin kowandiko karacel kede idwe gi, mon gi, kede jo ace akuo i cing gi; pien gin oudo miero kibed di kiikere pi timo tic ka Rwot esawa moroni kenekene.

¹⁹Aso, i kom kop amako josaseredoti, ikwae ka Aaron, kame oudo tie bedo i calere me nget bomban me Yuda, tie cuo kame bin koyero ayera pi tero ne gin jame, kede ne Jolebi kame oudo kowandiko nying gi.

²⁰Abaka Esekia oko bedo timo kamanono i Yuda lung. En bin eko timo gikame ber, kame opoore, doko en oudo ebedo kede genere but Rwot Rubanga mere.

²¹Tice dedede kame bin en eko timo amako tempulo, arabo amako lubo Iswil kede cik ka Rubanga, en etimo gi kede cunye lung; manono en komio gi dedede oko bedo ne kiber.