Read kumam 2 Iyutun 33 Bible Online

2 Iyutun 33 - kumam bible

2 Iyutun 33

¹Mwakini me dongo ka Manase oudo tie tomon kiwie are i kare kame en bin ecako kede pug. En bin eko pug i Yerusalem pi mwakini ot kany kiwie kany.

²Manase bin oko timo gikarac i nyim Rwot. En eoto lubo tim areco me atekerin kame bin Rwot oriamo tenge ki nyim jo me Isirael.

³En emedo gero kabedere me woro caljwogi kame bin papa mere Esekia orereto, etimo alutarin me woro Baal, etimo da cal me rubanga Asera, kede eko bedo woro jamini apapat kame tie i malo, di etio negi.

⁴En etimo alutarin me woro caljwogi apapat i ot ka Rwot, kabedo kame bin Rwot owaco kop i kome be, “Kobino bedo wora i Yerusalem nakanaka.”

⁵En etimo da alutarin i diakale are dedede me tempulo pi woro jamini apapat dedede kame tie i malo.

⁶En bin emio wode bala giayala awanga i Aditot me Kinom; etimo da tic me lamo gagi, oudo etio kede imuroko kame penyo tipere kede etio da kede jojwogi. En ebedo timo gikareco atot atota i nyim Rwot, di eko wango cuny Rwot.

⁷En ecibo i ot ka Rwot caljwogi kame en etimo, kabedo kame bin Rwot owaco kop i kome but Daudi kede but wode Sulumani be, “Ot noni kede Yerusalem kanoni, en kabedo kame ango atieko yero kikom adulion dedede me ikekon tomon kiwie are me jo me Isirael, pi bedo kakame kowora iye nakanaka.

⁸Ango likame bobo abino mino jo Isirael yai tenge ki lobo kame bin ango amio joakwari gi, tek di gin kigwokere di kiko bedo lubo gi dedede kame ango aciko negi, kede kiko lubo iswilia dedede kame bin ango amio Musa.”

⁹Manase bin omio gin jo Yuda kede jo me Yerusalem kitimo gikareco atot kalamo me atekerin kame Rwot omuducaro i nyim jo me Isirael.

¹⁰Rwot bin otamo kwenyaro Manase kede jo mege i kom dub gi do gin kiko dagi winyo kop mere.

¹¹Pi mano, Rwot bin oko cwano jotel me isirikalen me Asiria ot suro Yuda. Gin kiko mako Manase di kiko twene kede epingo kede irikoi, di kiko tere Babilon.

¹²I kare kame en oudo etie neno kede can, en eko mwolere twatwal i nyim Rubanga ka joakwari mege, di eko lokere but Rwot Rubanga mere eko ngangao en pi konye.

¹³Rubanga oko gamo kwac ka Manase di eko mine edok Yerusalem i ajakanut mere bobo. Manoni bin oko mino Manase ongeo be Rwot ateteni en Rubanga.

¹⁴I cen mere Manase oko medo gero wi apama me ooko me Yerusalem i bad tetu kide di eko mine edoko bor malo. En eropo wi apama nono cako ki aditot, i nget atan me Gikon kame tie i bad tetu malo me Erute me Aporogo kede adul me bomba kame kolwongo be Opel. En bin eko keto da jotel kame lo isirikalen kame bin tie i bomban kame kocelo dedede me Yuda.

¹⁵En ekwanyo tenge ki tempulo rubangan me kumbor kede caljwogi kame en oudo eketo iye, kede alutarin dedede me woro caljwogi kame en oudo egero i wi moru kame tempulo tie iye kede i kabedere apat me Yerusalem. En etero gi nogi dedede ooko me bomba di eko uco gi tenge.

¹⁶En eko temuno alutari ka Rwot di eko mino iye giayala me nywak kede me mino pwoc. En eko mino cik but jo dedede me Yuda pi gin woro Rwot, Rubanga me Isirael.

¹⁷Jo pwodi oko meede kede mino giayala i kabedere ace apapat, do kenekene gin oudo kimio gi do but Rwot Rubanga gi.

¹⁸Gi dedede apat kame bin Manase otimo, ilega mere but Rubanga mere, kede kope me inabin kabin owaco ne kop i nying Rwot, Rubanga me Isirael, gin dedede kowandiko gi i Itabu me Itatam amako Abakai me Yuda.

¹⁹Ilega mere kede kop kame Rubanga odwoko ne, dub mege dedede kede bedo mere abongo genere but Rwot, kabedere kame en bin egero me woro caljwogi kede cal me rubanga Asera kame en bin eko timo, kiton caljwogi kame en bin eworo, gin dedede kowandiko gi i Itabu me Itatam amako Inabin.

²⁰Manase bin oko to di oko yike i paco mere me abaka, di wode Amon en kame bin oko lunyo wange bala abaka.

²¹Mwakini me dongo ka Amon oudo tie ot are kiwie are i kare kame en bin ecako kede pug; en bin eko pug i Yerusalem pi mwakini are.

²²En eko timo gikarac i nyim Rwot, bala papa mere Manase. Amon obedo mino giayala but caljwogi dedede kame bin papa mere woro.

²³En bin likame eko mwolere i nyim Rwot bala kame papa mere bin oko timo, do eko meede kede timo dub kalamo me ka papa mere.

²⁴Jotic ka Amon bin oko bedo kede iik arac i kome i mung, di gin kiko neke i ode.

²⁵Do jo me lobo nono oko bin neneko jo dedede kame oudo obedo kede iik arac i kom Abaka Amon, di gin kiko cibo wode Yosia obedo abaka kawange.