Read kumam 2 Iyutun 34 Bible Online

2 Iyutun 34 - kumam bible

2 Iyutun 34

¹Mwakini me dongo ka Yosia oudo tie kanyauni i kare kame bin en ecako kede pug; en bin eko pug i Yerusalem pi mwakini ot adek kiwie acel.

²En bin eko timo gikame poore i nyim Rwot; en ebedo timo gi dedede bala bin kwaru mere Daudi, abongo parao tenge.

³I mwaka me kanyauni me apugan ka Yosia, di pwodi oudo en atin awobi, en eko cako woro Rubanga ka kwaru mere Daudi. Di i mwaka me tomon kiwie are me apugan mere, en eko cako muducaro kabedere me woro caljwogi, cal me rubanga Asera, kede caljwogi apat dedede i Yuda kede i Yerusalem.

⁴En emio jo omumuko alutarin ka Baal, kede alutarin me wango odok angwe kur kame bin iyapiyapi kede gi. Gin kimumuko cal me rubanga Asera, kede caljwogi kame kopao kede me nyonyo kame kotwako; gin kingingido gi di kiko kikiro gi i wi atesin me jo kame bin obedo mino giayala but gi.

⁵En eko wango cogere me josaseredoti aworo caljwogi i wi alutarin gi nogo. Epone noni en kame bin Yosia oko lonyo kede Yuda kede Yerusalem.

⁶En etimo gi acel noni da i bomban kede i adulion dedede kame bin kodudubo me Manase, Epuraimu, kede Simeon, kede kiton tuno Naputali.

⁷I adulion dedede kame abaka me Isirael bin pugo, Yosia orereto alutarin kede cal me rubanga Asera di eko ngingido gi kidoko purupuru, kede eko tuturo alutarin me wango odok angwe kur dedede. Di do en eko dok Yerusalem.

⁸I mwaka me tomon kiwie kanyauni me apugan mere, di do bin en etieko lonyo lobo kede tempulo, Abaka Yosia oko cwano Sapan wot ka Asalia, Maseya ngapug me bomba, kede Yoa wot ka Yekoyasi, en kalani, pi gin ot iiko tempulo ka Rwot Rubanga.

⁹Cuo adek nogi oko ot but Ngatel me Josaseredoti Kilikia di gin kiko mine sente kame oudo Jolebi kame bin daro irutei me tempulo ocoko. Jolebi nogo oudo ocoko sente nogo kibut jo Epuraimu kede Manase, kibut donge me jo Isirael kede jo Yuda dedede, kibut jo Benjamin kede jo me Yerusalem.

¹⁰Sente nogi bin oko mino i cing jotic kame telo tic me ot ka Rwot; me wek gin kimi sente nogo but jotic kame tie iiko ot,

¹¹gin en, jopac kede jogedo, tetekeny gin kiwil kede ibaon kede kide me iiko ude kame abakai me Yuda oudo oweko odubere.

¹²Jotel tic nogo bin oko bedo jo kame genere twatwal. Jolebi kame bin oko keto pi neno tic gi noni gin en, Yakat kede Obadia, ikwae ka Merari, karacel kede Sakaria kede Mesulam, ikwae ka Kokat. Jolebi apat, gin dedede jo kame bin tie kede diru me gono jamini me wer,

¹³bin koketo gi neno tic me jo ayeo jamini, kede da gin nogo en kame bin kinyuto ne jo koudo timo tice apat dedede gi me atima. Jolebi apat bin obedo joigigir, jodongo me tice, kede jodar irutei.

¹⁴Kakame gin oudo kitie kwanyo kede sente kame jo oudo okelo i ot ka Rwot, pi tero ooko, ngasaseredoti Kilikia oko udo itabu me Iswil kame bin Rwot omio Musa.

¹⁵Kilikia Ngatel me josaseredoti oko waco ne kalani Sapan be, “Ango atieko udo itabu me Iswil i ot ka Rwot.” Kilikia oko mino itabu nono but Sapan.

¹⁶Sapan oko tero itabu nono but abaka, di eko waco ne da be, “Wan otie timo gi dedede bala kame in oudo iciko.

¹⁷Wan otieko tero sente kame oudo okano i ot ka Rwot di oko mino gi i cing jotic kede nyampalan gi.”

¹⁸Di bobo eko waco ne abaka be, “Kilikia ngasaseredoti omia itabu moro tie kan.” Di en oko somo itabu nono ne abaka kede dwan amalo.

¹⁹Kakame abaka owinyo kede kope kame kosomo ne ki itabu me Iswil, en eko nyinyilo igoen me kome pi cwercuny.

²⁰Di abaka oko mino cik but Kilikia ngasaseredoti, Akikam wot ka Sapan, Abidon wot ka Mikaya, kalani Sapan, kede but Asaya ngatic mere di ewaco negi be,

²¹“Otunu di ikounu penyo Rwot pira kede pir jo me Yuda dedede kede jo kame pwodi odong i Isirael, i kom kope me itabu kame kotieko udo noni. Rwot otieko lilo kede wan kitek pien joakwari wa likame oko lubo kope mege. Likame gin kitimo gikame itabu noni waco.”

²²Aso, Kilikia ngasaseredoti, Akikam, Acibor, Sapan, kede Asaya oko ot penyo anabi Kuluda dako ka Salum wot ka Tokat, akwar Kasara; Salum oudo obedo ngat kame bin gwoko igoen me ot ka Rwot. Kuluda oudo tie bedo Yerusalem i adul anyen, kakame gin kioto tatamo ne iye gikame oudo otimere.

²³En bin eko waco negi be poore kidok di kiko waco ne ngat kooro gi be

²⁴Rwot Rubanga me Isirael waco be, “Ango ateteni abino kelo can i kom kabedo noni kede i kom jo kame bedo iye, can dedede kame kowandiko i itabu kame kotieko somo ne abaka me Yuda.

²⁵Ango abino timo manono pien gin kitieko weka di kiko lokere mino giayala but rubangan apat. Gin kitieko wango cunya kede gi dedede kame gin kibedo timo, pi manono, gin kitieko mina alilo kede kabedo noni, doko lilo na noni likame bino kwei.

²⁶Do abaka, ngat kooro wu pi bino penya, wun ibinunu waco ne be Rwot Rubanga me Isirael waco kaman: In iwinyo kope kame kowandiko i yi itabu,

²⁷di iko swilaro, doko iko mwolere i nyima, di iko inyinyilo igoen me komi di ikok, kakame in iwinyo kede di ango ayamo irac i kom kabedo noni kede i kom jo kame bedo iye. Ango atieko gamo ilega nin.

²⁸Pi mano, in likame ibino neno can kame ango abino kelo i kom kabedo noni. Ango abino kelo can noni ingei in to di oko yiki kede mulem.” Cuo nogo bin oko dok tero kop noni but abaka.

²⁹Di do Abaka Yosia oko lwongo joadongo me Yuda kede me Yerusalem dedede bute.

³⁰Di en eko yai kede gin dedede di kiko ot i ot ka Rwot, karacel kede josaseredoti, Jolebi kede jo dedede, jocan kede joabar. Di do abaka oko somo di jo dedede winyo, kope dedede me itabu me isikan kame bin koudo i ot ka Rwot.

³¹Abaka oko cungo kabedo mere di eko timo isikan i nyim Rwot be en ebino lubo Rwot, ebino gwoko cik, iswilia kede pwony mege, kede cunye lung kede kuo mere dedede, kede da be en ebino timo gi dedede amako isikan nono bala kame kowandiko i itabu kame koudo nono.

³²Di do en eko mino jo Benjamin kede jo dedede kame oudo tie Yerusalem ocikere pi gida gwoko isikan nono. Aso, jo me Yerusalem oko bedo lubo kope me isikan kame gin oudo kitimo kede Rubanga ka joakwari gi.

³³Abaka Yosia bin oko kwanyo tenge caljwogi dedede kame oudo tie i adul me jo Isirael, di eko mino jo dedede kame oudo tie i Isirael odonyo woro Rwot Rubanga gi. Pi kare me kuo mere lung, jo likame oweko woro Rwot, Rubanga ka joakwari gi.