Read kumam 2 Iyutun 35 Bible Online

2 Iyutun 35 - kumam bible

2 Iyutun 35

¹Abaka Yosia oko tedo Ebaga me Kalamo i Yerusalem pi mino Rwot wor. Gin kingongolo romini me tedo ebaga nono i buto duwe tomon kiwie ongwon me duwe me acel.

²En epoko ne josaseredoti tice kame gin kipoore timo i tempulo di eko supo cuny gi pi timo tic me tempulo.

³En eko waco ne Jolebi, gin jopwonye me Isirael, jo kame kokwero but Rwot be, “Ketunu Sanduku me Isikan kacil i tempulo kame Abaka Sulumani wot ka Daudi ogero. Wun likame bobo poore imeedenu kede yene, do poore idonyunu timo tic ne Rwot Rubanga wu kede ne jo Isirael, gin jo mege.

⁴Iikerenu di lubere kede ikodeta me ikekon me joakwari wu pi timo tic, di lubere kede gikame kowandiko kame Abaka Daudi me Isirael kede wode Sulumani bin ociko.

⁵Cungunu kabedo kacil kame kopoko ne wu di lubere kede ikekon ka joakwari me Isirael, di jo me buli ekeko acelacel me joakwari ko bedo tie kede Jolebi kame bino konyo gi.

⁶Ngongolunu romini me Ebaga me kalamo, lonyerenu, iikunu jamini kame mitere pi imiegu wu. Lubunu kope dedede kame Rwot bin omio Musa.”

⁷Di do Abaka Yosia oko mino giayala me Ebaga me Kalamo, pi jo dedede kame oudo tie kunono. En ekwanyo romini kede diegi apwodi dongo adonga tutumia ot adek (30,000), kede twonin tutumia adek (3,000).

⁸Jodongo me tic mege da pi mit me cuny gi oko gida kwanyo ne jo giayala, di kiko mino but josaseredoti kede Jolebi. Kilikia, Sakaria, kede Yekiel, gin jotel me tempulo, oko mino josaseredoti romini kede diegi apwodi dongo adonga tutumia are kede tol kanyape (2,600), kede twonin tol adek (300), pi bedo giayala me Ebaga me Kalamo.

⁹Konania da, kede imiegu mege Semaya kede Netanel, Kasabia, Yeyel kede Yosabad, gin jotel me Jolebi, oko gida kwanyo romini kede diegi apwodi dongo adonga tutumia kany (5,000), kede twonin tol kany (500), di kiko mino Jolebi pi bedo giayala me Ebaga me Kalamo.

¹⁰Kakame bin kotieko iiko kede gi dedede me tedo Ebaga me Kalamo, josaseredoti kede Jolebi oko ot cungo kabedere gi bala kame abaka oudo ociko.

¹¹Jolebi oko ngongolo romini kede diegi nogo di gin kiko yango gi, di josaseredoti oko kikiro remo i kom alutari.

¹²Jolebi oko poko tenge giayala awanga pi popoko ne jo, di lubere kede ikodeta me ikekon me joakwari gi, tetekeny kikaruno mino giayala nogo but Rwot bala kame kowandiko i itabu ka Musa. Gin kiko timo kamanono da kede twonin.

¹³Gin kiko bulo romini me Ebaga me Kalamo bala kame iswil waco, di kiko tedo giayala kacil kede agune, sepulan adongo kede ayapak, di kiko popoko ne jo awakawaka.

¹⁴I cen mere Jolebi oko gida iiko cam gi kede me josaseredoti ikwae ka Aaron, pien josaseredoti oudo obedo timo tic me mino giayala awanga kede me kakamio tuno iwor. Manono en omio Jolebi oko iiko cam pirgi kede josaseredoti ikwae ka Aaron.

¹⁵I kare kame jo oudo tie camo kede Ebaga me Kalamo, jower ikwae ka Asap bin odong bedo kabedere kame bin kopoko negi, di lubere kede cik kame bin Daudi omio; gin bin en: Asap, kede Keman, kede Yedutun enabi ka abaka. Jodar irutei da oko dong daro irutei. Gin likame kiweko kabedere gi me tic, pien Jolebi icegun oudo oiko cam di kiko tero negi.

¹⁶Aso, bala kame Abaka Yosia oudo ociko, cenge nono oko tieko timo gi dedede amakere kede woro Rwot, gwoko Ebaga me Kalamo, kede mino giayala awanga i wi alutari.

¹⁷Jo dedede me Isirael kame bin tie Yerusalem i kare nono oko tedo Ebaga me Kalamo kede Ebaga me Mugati kame li kede Arup, pi ceng kanyaare.

¹⁸Likame tie akodi Ebaga me Kalamo moro kame koudo kotedo bala manoni cako i kare ka enabi Samuel; likame tie abaka moro me Isirael kame bin otedo Ebaga me Kalamo bala kame Abaka Yosia oko tedo, en kede josaseredoti, Jolebi, kede jo me Yuda, jo Isirael, kede jo me Yerusalem.

¹⁹Ebaga me Kalamo noni bin kotedo i mwaka me tomon kiwie kanyauni me apugan ka Yosia.

²⁰I ngei magonogi dedede, di do Yosia otieko iiko ot ka Rwot, Abaka Neko me Misiri oko ot kede isirikalen mege pi yi Karekemis i nget ecilet me Eupurate. Yosia kede isirikalen mege oko ot kunono pi yi kede en.

²¹Do Neko oko cwano joor bute pi waco ne be, “Nyo kame in itie mono kibuta, in abaka me Yuda? Ango tin likame abino pi yi kedi, do ango abino pi yi kede jo kame tie yi keda, doko Rubanga otieko cika pi timo kamanono awakawaka. Wek piem kede Rubanga, ngat kame tie keda, ka li, en ebino muducaro in.”

²²Do Yosia oko dagi winyo kop ka Neko, ngat kame oudo Rubanga oyamo kede ateteni, di eko ngapo angapito kamio jo kwie di eko ot yi kede en. En eko meede kede ot di eko yi kede Neko i ebar me Megido.

²³Kakame oudo kitie yi kede, isirikalen oko gweno Abaka Yosia kede emal; en eko waco ne jotic mege be, “Kwanyanu iteranu tenge, pien kowana kirac.”

²⁴Aso, jotic mege oko kwanye ki cabala mere di oko kete i cabala ace kame en oudo etie kede kunono, di gin kiko dwoke Yerusalem, kakame eko to iye. En bin oko yike i limbo me joakwari mege. Jo dedede me Yuda kede Yerusalem oko koko Yosia.

²⁵Enabi Yeremia bin oko teto wer me koko Abaka Yosia; tuno tin cuo kede mon kame wero pwodi wero wer noni ka kitie yutuno Yosia. Manono oko doko itok i Isirael. Wer noni kowandiko en i kom were me koko.

²⁶Gi dedede apat kame Yosia bin otimo, genere mere i lubo gikame kowandiko i Iswil ka Rwot,

²⁷gikame en bin eko timo, cako ki agege tuno i atiekini, kowandiko i Itabu me Itatam amako Abakai me Isirael kede Yuda.