Read kumam 2 Iyutun 5 Bible Online

2 Iyutun 5 - kumam bible

2 Iyutun 5

¹Epone no en kame bin tic kame Abaka Sulumani otimo me gero ot ka Rwot oko tiek kede. En bin eko tero jamini dedede kame oudo papa mere Daudi omio but Rwot di eko keto gi i agolai me kano jamini i tempulo. Jamini nogo bin ribo siliba, saabu kede ace apat.

²Di do Abaka Sulumani bin oko lwongo joadongo me Isirael kede jotel me ikekon, jotel me ude me joakwari me Isirael, pi gin bino bute Yerusalem tetekeny kikwany Sanduku me Isikan ka Rwot ki Sion, Bomba ka Daudi, di kiko tere i tempulo.

³Jo dedede me Isirael bin oko cokere but Abaka Sulumani i kare me Ebaga me Kimere i duwe me kanyaare.

⁴Kakame joadongo me Isirael otieko cokere kede, Jolebi oko tingo Sanduku me Isikan

⁵di kiko tere i tempulo. Jolebi kede josaseredoti bin oko da kobo i tempulo Eema me riamo kede jamini mege kacil dedede.

⁶Abaka Sulumani kede jo dedede me Isirael kame oudo ocokere bute oko cungo i nyim Sanduku me Isikan, di gin kiko mino giayala angola me romini kede twonin atot tot kalikame marere.

⁷Di do josaseredoti oko tingo Sanduku me Isikan kiko tere kabedo mere, i Kabedo Kacil Kalamo, i dud bwom cerubim.

⁸Pien oudo cerubim nogo oyaro bwom gi i kabedo me Sanduku me Isikan, tetekeny bwom gi nogo oudo umo wi Sanduku me Isikan kede atekai me tinge da.

⁹Atekai nogo oudo bocoboco twatwal, ka dano moro oudo ocungo i nyim Kabedo Kacil Kalamo, en oudo ekaruno neno wi gi; do likame oudo kokaruno neno gi ki ooko. Atekai nogo pwodi tie kunono tuno tin.

¹⁰Gimoro ace oudo likame tie i yi Sanduku nono kwanyo kenekene kide abatal are nogo kame bin Musa oketo iye i moru me Sinai, i kare kame bin Rwot otimo kede isikan kede jo me Isirael, di gin bin kiyai ki Misiri.

¹¹Josaseredoti dedede koudo tie kanono oko lonyere abongo popoko ikodeta gi. Jolebi kobedo jower dedede, gin en Asap, Keman, kede Yedutun, kede jo me ude kame gin kiwok kiye, oudo tie ngapo igoen aliamaliam. Jolebi oko cungo i bad tetu kide me alutari, di kitie kede bule kede adungu, di josaseredoti tol acel kede ot are (120) tie kuto agwarai. Jo oudo tie wer di okuto agwarai di ogo bule kede jamini ace me goc, di dwan gi upere kede wer. Oudo kitie pako Rwot di kiwero be, “Opakunu Rwot, piento en eber, doko amara mere bedo nakanaka.” Kakame josaseredoti oudo tie donyo kede ooko me tempulo, edou oko umo yi tempulo pukupuk, omio josaseredoti likame oko karuno timo tic gi, pien rieny me deyo ka Rwot oudo oromo yi tempulo dedede.