Read kumam 2 Iyutun 6 Bible Online

2 Iyutun 6 - kumam bible

2 Iyutun 6

¹Di Abaka Sulumani oko lego be, “Rwot in itieko waco be in ibino bedo i edou acol cucucuc.

²Ango atieko gero nin ot me deyo, kakame in ibino bedo iye pi kare lung.”

³Di do abaka oko lokere but jo di eko lamo winyo ne jo dedede kocokere me Isirael, di gin dedede kitie cungo.

⁴En ewaco be, “Pak bed but Rwot, Rubanga me Isirael, en ngat kame kede teko mere etieko cobo timo gikame bin en ecikere iye di ewaco kede doge but papa na Daudi be,

⁵‘Cako i kare kame ango bin akwanyo kede jo na me Isirael ki Misiri, ango pwodi likame ayero bomba moro me ekeko moro me jo me Isirael kame poore ger iye ot, kakame kobino wora iye; doko da ango likame ayero ngatamoro pi bedo ngatel me jo na me Isirael.

⁶Do nataman ango ayero Yerusalem pi bedo kakame kobino wora kiye, doko da atieko yero Daudi pi bedo ngapug me jo na me Isirael.’ ”

⁷Sulumani oko meede be, “Papa na Daudi oudo tie kede tam me gero ot me woro Rwot, Rubanga me Isirael.

⁸Do Rwot bin oko waco ne be, ‘In itimo ber pi bedo kede tam me mito gero nango ot me wora,

⁹akadi kamanono da, in en kalikame ibino gero ot nono, do wodi kame in ibino nywalo en kame bino gero nango tempulo.’

¹⁰“Aso, Rwot nataman otieko cobo cikere mere, pien ango nataman atieko lunyo wang papa na Daudi bala abaka me Isirael, doko atieko gero ot me woro Rwot, Rubanga me Isirael.

¹¹Ango atieko cibo i tempulo Sanduku me Isikan, kame kide abatal me isikan ka Rwot tie iye, isikan kame bin en etimo kede jo me Isirael.”

¹²Di do Sulumani oko ot di en eko cungo i nyim alutari i nyim jo dedede me Isirael, di en eko tango cinge malo.

¹³(Sulumani bin oudo otimo kede nyonyo buronsi kakame koyito iye pi yamo kede jo. Oudo laco mere tie mita are kede sentimita ot are, kede boro mere da kamanono; boro mere malo oudo tie mita acel kede sentimita ot adek. En bin eko kete i diakal. En eko yito kanono di eko riondiko kakame jo dedede twero nene kiye di eko kiarao bade malo.)

¹⁴En eko lego be, “Okwe Rwot, Rubanga me Isirael, likame tie Rubanga moro kame cal bala in, i malo arabo piny i dud lobo! In igwoko isikan ni doko in inyuto amara ni kalikame lokere but jotic ni kame lubo kop ni kede cuny gi lung.

¹⁵In itieko gwoko isikan ni kame bin imio but ngatic ni papa na Daudi; in bin icikere di iwaco kede dogi, di tin in iko mine ecobere kede teko ni.

¹⁶Pi manono, Okwe Rwot, Rubanga me Isirael, ango akwai igwok cikere ni but ngatic ni papa na Daudi, cikere kame bin in iwaco iye be, ‘In likame ibino bedo abongo ngat kame lunyo wangi bala abaka me Isirael, kenekene ikwae ni poore gwok yote me kuo gi, di gin kiko lubo iswilia na bala kame in itimo.’

¹⁷Pi manono, Okwe Rubanga me Isirael, mi kop kame in bin icikere iye but ngatic ni papa na Daudi cobere.

¹⁸“Do in, Okwe Rubanga, kom ateteni ibino donyo bedo i lobo kan kede jo? Akadi malo lung likame romi, kara do benyo benyo kame ot noni kame ango atieko gero bino romi kede?

¹⁹Ango akwai, Okwe Rwot Rubanga na, tim ber iwiny kwac na kede ingangai na, ango ngatic ni; ango abako doga buti iwiny kwac na kame akelo buti tin.

²⁰Gwok ot noni iceng kede iwor, kabedo noni kame in itieko yamo i kome be kobino wori kiye. Aso ango akwai iwiny kwac na ka ango aloko nyima tetu ot noni di ako ilega.

²¹Winy ingangai na kede me jo ni me Isirael ka gin kiloko nyim gi tetu kabedo noni di kiko ilega. Okwe winy wa i malo kabedo ni; winy kwac wa di iko sasiro wa.

²²“Ka dano moro otimo dub but dano ocelu di oko mine be elairo, di oko kele lairo i alutari nin i ot noni,

²³Okwe Rwot winy i malo di iko ngolo kop i dierediere me jotic ni. Mi alola but ngat kame tie kede raco di iko dwoko ne rac mere i wie, do mi ngat kame li kede raco moro bed kiber bala kame poore ne.

²⁴“Ka jokwor oko bwono jo ni me Isirael pien gin kitimo dub buti, di do gin kiko bobo lokere buti, di kilwongo nyingi, kede di kikwai di kibako dog gi buti i ot noni,

²⁵winy kwac gi i malo. Sasiro dub ka jo ni me Isirael, di iko bobo dwoko gi i lobo kame bin in imio gi kede joakwari gi.

²⁶“Ka malo oko cegere di kot oko bedo li, pien gin kitimo dub buti omio in iko mino gin alola, di do gin kiko swilaro ki dub gi di kiko loko nyim gi tetu kabedo noni di kiko ilega di kilwongo nyingi,

²⁷tim ber iwiny kwac gi i malo. Sasiro dub ka jotic ni, jo me Isirael. Pwony gi yongayo me kuo aber kame poore kilubi, di iko mino kot cwei i lobo noni kame in itieko mino jo ni pi doko mergi.

²⁸“Ka kec opoto i piny arabo aumpuli, amoto ceng owango cam i poti, arabo obonyo amoto ekutele, arabo ka jokwor ka jo ni oluko gi i bomba gi moro, arabo ka aumpuli moro amoto tuo moroni omako gi,

²⁹tim ber iwiny kwac gi. Ka ngatamoroni kenekene kikom jo ni me Isirael, arabo jo ni dedede me Isirael atie kede cwercuny, oko lego di kirieo cing gi tetu ot noni,

³⁰tim ber iwiny kwac gi i malo kabedo ni. Sasiro gi di iko konyo gi. Tim negi gikame poore kede yote me kuo gi, gikame in ingeo kame tie i cuny gi, pien in keni en kame ingeo gikame tie i cuny dano acelacel.

³¹Manono bino mino gin kilwori pi kare dedede kame gin kibedo kede i lobo nono, lobo kame in bin imio joakwari wa.

³²“Iepone acel nono, ka jokumbor, jo kalikame obedo jo ni me Isirael, oko bino ki piny abor pien kiwinyo iruo me nyingi, twer ni kede teko ni, di gin kiko bino lego buti i ot noni,

³³tim ber iwiny kwac gi i malo kabedo ni. Tim negi gikame kikwai pire, tetekeny jo dedede me wi lobo ngei di gin kiko bedo kede lworo buti, bala jo ni me Isirael. Di do gin kiko bino ngeno be ot noni kame ango atieko gero obedo meri.

³⁴“Ka jo ni bino ot yi kede jokwor gi, karamoroni kenekene kame in ibino cwano gi iye, di gin kiko lego buti di kiloko nyim gi tetu bomba noni kame in itieko yero, kede tetu ot noni kame ango atieko gero nin,

³⁵tim ber iwiny ilega kede ingangai gi i malo, di iko mino gi kibwon jokwor gi.

³⁶“Ka gin kiko timo dub buti, pien likame tie dano moro kalikame timo dub, di in cunyi oko wang negi di iko mino gi i cing jokwor gi, tetekeny koter gi tenge bala mabus i lobo me jokwor gi, kakabor amoto kiyapiyapi;

³⁷ka i lobo kame kotero gi iye kunono bala mabus, di wi gi oko yabere di kiko swilaro, di kiko bako dog gi buti di kiwaco be, ‘Wan otieko dubo, doko otimo gi kalikame poore, wan otimo gikarac’;

³⁸ka gin kiko swilaro kede cuny gi dedede kede kuo gi lung i lobo ka jokwor gi kunono, jo koudo otero gi bala mabus, di gin kiko lego buti di kiloko nyim gi tetu lobo noni kame bin in imio but joakwari gi, kede bomba noni kame in itieko yero, kede ot noni kame ango atieko gero nin,

³⁹tim ber iwiny kwac gi kede ingangai gi i malo kabedo ni, di iko sasiro jo ni kotimo dub buti.

⁴⁰“Nan do, Okwe Rwot Rubanga na, yab wangi di iko ciko yiti i kom ilega kame jo bino timo ki kanoni.

⁴¹Rwot Rubanga, nan yai malo di iko donyo i kabedo me wei ni, in karacel kede Sanduku me Isikan ni, en gianena me twer nin. Mi josaseredoti ni winyo i gi dedede kame kitimo, di iko mino jo ni bed kede yomcuny pi bero ni but gi.

⁴²Okwe Rwot Rubanga, kur ilokere dagi abaka kame in itieko wiro. Yutuno amara ni kalikame lokere kame oudo itie kede but ngatic ni Daudi.”