Read kumam 2 Iyutun 7 Bible Online

2 Iyutun 7 - kumam bible

2 Iyutun 7

¹Kakame Abaka Sulumani otieko kede ilega mere, mac oko bino wok ki malo di eko wango giayala kame oudo komio, di rieny me deyo ka Rubanga oko romo yi tempulo dedede.

²Josaseredoti likame oko twero donyo i yi tempulo pien oudo epong kede rieny me deyo ka Rwot.

³Kakame jo me Isirael oneno kede mac di wok ki malo, kede doko di rieny me deyo ka Rwot di oromo yi tempulo, gin kiko luro wi gi piny i diakal, di kiko woro Rubanga di kimie pwoc di kiwaco be, “En eber, pien amara mere kalikame lokere bedo nakanaka.”

⁴Di do Abaka Sulumani kede jo dedede kame bin tie kede en, oko mino giayala but Rwot.

⁵Sulumani oko mino bala giayala me nywak but Rwot doke tutumia ot are kiwie are (22,000), kede romini tutumia tol acel kede ot are (120,000). Aso, abaka kede jo dedede me Isirael oko bin kwero ot ka Rubanga kamano.

⁶Josaseredoti oudo ocungo i kabedo kame komio gi; Jolebi da oko cungo kargi, di kitie pako Rwot Rubanga kede jamini me goc kame bin Abaka Daudi otimo me pako Rwot, di kiwero be, “Amara mere bedo nakanaka!” I bad tetucel kakame pimere kede gi, josaseredoti oudo tie kuto agwarai di jo dedede me Isirael tie cungo.

⁷Cenge nono da abaka oko kwero cuny diakal kame oudo tie i nyim ot ka Rwot. En emio giayala awanga kede giayala me alos kede kakamio me giayala me nywak kanono. En etimo kamanono pien alutari me nyonyo buronsi kame oudo tie i nyim Rwot oudo titidi twatwal likame eromo giayala nogi dedede.

⁸Aso, Sulumani kede jo me Isirael dedede oko tedo ebaga pi ceng kanyaare. Twon ekodet me jo en kame bin tie kunono, jo kame bin owok cako ki Lebo Kamat tuno i esamai me ikor me Misiri.

⁹Gin bin kitieko ceng kanyaare kwero alutari, kede doko ceng kanyaare kwero Ebaga me Kimere. I ceng me ajikini gin kiko bedo i cokere kacil,

¹⁰di do i ceng kolubo mere, en ceng me ot are kiwie adek me duwe me kanyaare, Sulumani oko peruno jo odok i miere gi di kilelo, doko di cuny gi yom twatwal pi bero dedede kame Rwot otimo ne Daudi kede ne Sulumani, kede ne jo mege me Isirael.

¹¹Di do bin Sulumani otieko gero ot ka Rwot kede paco me abaka di eko cobo timo gi dedede kame oudo eiko,

¹²Rwot bobo oko neeno bute iwor di oko waco ne be, “Ango atieko winyo ilega ni, doko atieko gamo tempulo noni pi bedo kakame komia kiye giayala.

¹³Ka ango acego malo di ako gengo kot cwei, amoto ka acwao obonyo obino dudubo lobo noni, arabo ka acwao aumpuli i kom jo na,

¹⁴ka gin kiko turere i cuny gi, di kiko mona, di kiko lokere tenge ki gikareco gi, ango abino winyo kwac gi i malo di ako sasiro gi, di ako cango peko atie i lobo gi.

¹⁵Aso, nan ango abino yabo wanga, doko abino ciko yita i kom ilega kame kotimo i kabedo noni.

¹⁶Ango ayero ot noni, doko atieko lonye pi bedo kakame kowora kiye nakanaka; wanga kede cunya bino bedo iye pi kare dedede.

¹⁷Aso, ka in ibino timo tic na kede genere, bala kame Daudi papa ni bin otimo, di itimo gi dedede kame ango aciko ni, di ilubo pwony kede iswilia na,

¹⁸ango abino sipakino ajakanut ni i Isirael, bala kame bin ango acikere kede but papa ni Daudi di awaco ne be, ‘Likame in ibino bedo abongo ngat kame lunyo wangi bala abaka me Isirael.’

¹⁹Do ka wun ikounu lokere tenge, di ikounu weko gwoko cik kede iswilia na kame ango atieko mino wu, do di ikounu donyo timo tic ne rubangan apat di iworunu gi,

²⁰ango abino kwanyo wu tenge ki lobo kame amio wu, di ot kame ango atieko lonyo pi bedo mera noni ako bino weko, eko bino doko gikame atekerin apat golao di kicao.

²¹“Bed bala tempulo noni nan jo uro kitek, jo dedede kame beo i ngete kom gi bino to di kipenyere be, ‘Pinyo bo komio Rwot otimo gikame cal kamanono ne lobo noni kede ot noni?’

²²Di do gin kiko bino waco be, ‘Pien gin kiweko Rwot Rubanga gi, ngat kame bin okwanyo joakwari gi ki lobo me Misiri, di gin kiko dak but rubangan mogo icegun, di kiko donyo woro gi, doko di kitimo negi tic. Pi manono, Rwot otieko kelo can noni i kom gi.’ ”