Read kumam Esera 1 Bible Online

Esera 1 - kumam bible

Esera 1

¹I mwaka me agege me apugan ka Abaka Sairas me Pasia, Rwot oko mino gikame oudo ewaco ki dog enabi Yeremia ocobere. Rwot oko supo cuny Abaka Sairas me Pasia pi wandiko cik di eko cwano i ajakanut mere lung; cik nono waco kaman:

²“Ango Abaka Sairas me Pasia atie waco kaman: Rwot Rubanga me Malo otieko mina ajakanuto dedede me wi lobo, doko da etieko mina tic me gero ne tempulo i Yerusalem, i lobo me Yuda.

³Akwao Rubanga bed tie kede wun dedede jo kobedo jo mege. Nan koyei ne wu ot Yerusalem di ikounu temuno gero tempulo ka Rwot, Rubanga me Isirael, en Rubanga kame koworo i Yerusalem.

⁴Jo mege kodong kabedere dedede, jo me kabedere nogo poore konyo gi kede siliba, saabu, jamini ace, kede leini, kede da giamia me bercuny kame gin kibino tero i tempulo ka Rubanga i Yerusalem.”

⁵Jotel me miere me jo me ekeko ka Yuda kede me ka Benjamin, kede da josaseredoti kede Jolebi kede jo dedede kame Rubanga oudo omulo cuny gi, gin dedede kiko iikere pi ot temuno gero tempulo ka Rubanga i Yerusalem.

⁶Jokio gi oko konyo gi kede jamini kame kotimo kede siliba, saabu, kede jamini ace apat, kede leini, kede da jamini ace me wel amalo, ribo i kom jamini kame oudo kipoore mino bala giayala me bercuny i tempulo.

⁷Abaka Sairas kikome oko kwanyo bakulin kede ikopon kame Abaka Nebukadunesa oudo okwanyo ki tempulo i Yerusalem di eko lokere keto gi i abilan me rubangan mege.

⁸En eko mino gi but Miteredat, ngakan jamini, di Miteredat oko maro gi ne Sesibasa, ngapug me Yuda

⁹kaman: Kalayan me saabu me mino giamia, gin ot adek; kalayan me siliba, gin tutumia acel (1,000); pale, gin ot are kiwie kanyangon;

¹⁰kalayan atino me saabu, gin ot adek; kalayan atino me siliba, gin tol ongwon kede tomon (410); jamini ace apat, gin tutumia acel (1,000).

¹¹Jamini dedede oudo tie tutumia kany kede tol ongwon (5,400), magonogi ribo jamini kame kotimo kede saabu kede siliba, kede jamini ace kame Sesibasa bin otero kakame en kede jo ace koudo tie bala mabus obukui oyai kede ki Babilon kiko dok Yerusalem.