Read kumam Esera 5 Bible Online

Esera 5 - kumam bible

Esera 5

¹Inabin Kagai kede Sakaria wot ka Ido oko murao ne Iyudayan koudo tie Yuda kede Yerusalem i nying Rubanga me Isirael ngat koudo tie kanono.

²Di do Serubabel wot ka Selatiel kede Yosua wot ka Yekosadoki oko cako tic me temuno gero tempulo i Yerusalem, di inabin are nogo da oko donyo konyo gi.

³Cucuto nono di Tatenai, en ngapug me bad tetu tim me ecilet me Eupurate, kede Setar Bosenai, karacel kede jowot gi ace oko ot Yerusalem but gi di kiko penyo gi be, “Ngai komio wu akarunikin me temuno gero tempulo noni?”

⁴Doko kiko penyo pi mito ngeno nying jo koudo tie konyo tic me temuno gero tempulo.

⁵Do Rubanga oudo tie gwoko jotel me Iyudayan; aso jo nogo likame oko gengo gi tic paka tuno gin dwoko kop but Abaka Darias di abaka oko dwoko negi kop kede baluwa.

⁶Baluwa kame gin oudo kiwandiko but Darias somere kaman:

⁷“But Abaka Darias, wan okwao ni mulem.

⁸“Wan otie mini ngeno be, wan oko ot i adul me Yuda di oko udo be kotie temuno gero tempulo ka Rubanga adwong me Isirael. Kotie gere kede kide adongo kame kopao, kede di kosipo ipirin atek me yen i apama mere. Kotie timo tic me gere kede teko, doko da tic nono tie ot anyim oyotoyot.

⁹“Wan oko yamo kede joadongo nogo di openyo gi ngat komio gi akarunikin me temuno gero tempulo nono.

¹⁰Wan doko da oko penyo gi nying gi tetekeny wan otwer mini ngeno nying jotel me tic nono.

¹¹“Gin kiko dwoko ne wa be, ‘Wan en jotic ka Rubanga me Malo kede Piny; wan otie temuno gero tempulo kame bin sek abaka adwong me Isirael ogero paka tieko tic mere.

¹²Do pi kite kame oudo joakwari wan owango kede cuny Rubanga me Malo, en eko mino gi i cing Abaka Nebukadunesa me Babilon, en abaka me jo Kaludea. Bin Nebukadunesa oko dudubo tempulo nono di eko mamako jo etero gi Babilon bala mabus.

¹³Di do i mwaka me agege me apugan ka Sairas bala abaka me Babilon, Sairas oko mino cik be kopoore temuno gero tempulo nono.

¹⁴En eko dwoko jamini me tempulo kame kocweo kede saabu kede siliba, gin jamini kame Nebukadunesa oudo okwanyo ki tempulo i Yerusalem di eko tero gi i tempulo ka rubanga mere i Babilon. Sairas bin oko mino jamini nogi i cing icuo anyinge Sesibasa, kame en oudo ecibo pi bedo ngapug me Yuda.

¹⁵Abaka bin owaco ne pi dwoko jamini nogo di eko cibo gi i tempulo i Yerusalem, di eko mino kotemuno gero tempulo kawange kasek nono.

¹⁶Aso, Sesibasa oko ot di eko cibo kide me dud apama me tempulo nono; tic me gedo nono oko bedo ot anyim cako i kare nono tuno tin, do pwodi tempulo likame otiek.’

¹⁷“Aso, Adwong me Awora, ka twerere, mi ber komoi iwandik kasek amakere kede abakai me Babilon, pi mito ngeno ka ateteni abaka Sairas oudo omio cik be temuno gero tempulo noni i Yerusalem, di do in iko mino wa tam kame in itie kede iye.”