Read kumam Esera 7 Bible Online

Esera 7 - kumam bible

Esera 7

¹Ingei mwakini atot atota, di Aretasereses en oudo abaka me Pasia, Esera oko bino Yerusalem di ewok ki Babilon. Joakwari ka Esera oudo lubere kaman: Esera oudo obedo wot ka Seraya, wot ka Asaria, wot ka Kilikia, wot ka Salum, wot ka Sadoki, wot ka Akitub, wot ka Amaria, wot ka Asaria, wot ka Merayot, wot ka Serakia, wot ka Usi, wot ka Buki, wot ka Abisua, wot ka Penekasi, wot ka Eleasar, wot ka Aaron. Esera oudo obedo dano atie kede ngec atut i kom iswilia kame Rwot Rubanga me Isirael bin omio Musa; aso abaka bin oko mino Esera gi dedede kame en epenyo, pien Rwot oudo tie konye.

⁷Jo ace da me Isirael, kame ribo josaseredoti, Jolebi, jower, kede jodar me irutei me tempulo, kede jotic me tempulo oko upere kede Esera ot Yerusalem i mwaka me kanyaare me apugan ka Aretasereses.

⁸En eyai ki Babilon i ceng me agege me duwe me agege, di do pi kony ka Rubanga eko tuno Yerusalem i ceng me agege me duwe me kany.

¹⁰Esera bin ocibo cunye siyao Iswil ka Rwot, timo gikame iswil nono mito, kede pwonyo jo me Isirael kop kame tie iye.

¹¹Abaka Aretasereses oko mino Esera baluwa; Esera oudo obedo ngasaseredoti kede ngat kosiyao odocon iswil ka Rwot kede cik mege but jo me Isirael. Baluwa nono waco kaman:

¹²“Baluwa kowok kibut Aretasereses, abaka me abakai, but Esera, ngat kosiyao odocon iswil ka Rubanga me Malo.

¹³“Ango atie mino cik be, jo dedede me Isirael, amoto josaseredoti gi arabo Jolebi kame tie i ajakanut na di cuny gi winyo pi dok Yerusalem karuno upere kede in.

¹⁴Ango kede kansulo na otie cwani Yuda kede Yerusalem pi neno ka jo tie gwoko Iswil ka Rubanga wu, Iswil kame nataman koketo i cingi.

¹⁵Doko da ipoore tero siliba kede saabu kame ango kede kansulo na cuny wa owinyo pi mino but Rubanga me Isirael, ngat kame tempulo mere tie Yerusalem.

¹⁶Ipoore da tero siliba kede saabu kame ibino udo ki adul lung me Babilon, karacel kede giamia kame jo kede josaseredoti kwanyo kede mit me cuny gi ken gi pi tempulo atie Yerusalem, en tempulo ka Rubanga gi.

¹⁷“Ipoore tic kede lim nono kede rieko iko wilo twonin, imerekekin, romini apwodi bwong karacel kede alos kede giamata me bwini kame koyalo gi kede, di do iko bino yalo gi i wi alutari atie i tempulo i Yerusalem.

¹⁸Itwero bino tic kede siliba kede saabu kame bino dong pi wilo gikame in kede jo ni cunyu mito, di lubere kede mit ka Rubanga wu.

¹⁹Ipoore mino Rubanga i Yerusalem jamini me tic dedede kame oudo komii me timo tic i tempulo.

²⁰Do ka tie gimoro ace kame komito kibuti me timo tic i tempulo, ibino gamo sente me wile ki dero kano lim ka abaka.

²¹“Ango atie mino cik but jo dedede kame tio i dero me kano lim me adul atie i bad tetu tim me ecilet me Eupurate kaman: gi dedede kame Esera ngasaseredoti penyo kibutu, en ngat kosiyao odocon Iswil ka Rubanga me Malo, poore itiunu kede teko wu dedede pi neno be imienu.

²²Itwerunu mine siliba kalikame kalamo kilo tutumia adek kede tol ongwon (3,400), kede engano kalikame kalamo kilo tutumia tomon (10,000), kede bwini kame romo lita tutumia are (2,000), kede mo me olibeti da kame romo lita tutumia are (2,000), kede munyo atot bala kame mitere.

²³Miero iketunu cunyu pi neno be imiunu jamini dedede kame Rubanga me Malo mito pi tempulo mere, tetekeny kur lilo mere pot i koma kede i kom abakai ace kame bino lunyo wanga waru.

²⁴Doko da wan otie mino wu ngeno be likame ipoorenu raro esolo me epone dedede kibut josaseredoti, Jolebi, jower, jodar, jo kame timo tic i tempulo, arabo jo ace dedede kame timo tic amakere kede tempulo.

²⁵“In Esera, di itio kede rieko kame Rubanga omii, yer jopug kede jongolkop pi pugo jo me adul atie i bad tetu tim me ecilet me Eupurate. Kipoore bedo jo kame ngeo Iswil ka Rubanga di kiko donyo pwonyo Iswil nono but jo kame kwie.

²⁶Jo dedede kalikame bino lubo Iswil ka Rubanga wu arabo iswilia kame abaka oketo kobino mino gi alola kaman: kobino neko gi, arabo kobino riamo gi tenge ki piny gi, arabo kobino mako jamini gi, arabo kobino tweno gi i otkol.”

²⁷Esera oko waco be, “Pak bed but Rwot, en Rubanga ka joakwari wa. En emio abaka obedo kede cuny kacal kaman me mino tempulo katie Yerusalem dwongo.

²⁸Doko da en emio abaka kede kansulo mere lung karacel kede jotic mege atek obedo kede amara buta. Rwot Rubanga na okonya di eko mina abedo kede nwangcuny, di ako sobolo coko jotel me ude me Isirael di ako dwogo kede gi.”