Read kumam Nekemia 1 Bible Online

Nekemia 1 - kumam bible

Nekemia 1

¹Man en itatam amako gikame Nekemia wot ka Kakalia otimo. I duwe me Kisileb,[1] i mwaka me ot are me Aretasereses bedo bala abaka me Pasia, ango Nekemia oudo atie Susa, i bomba adwong.

²Omina acel, kame nyinge Kanani oko tuno di ewok ki Yuda. En oudo eupere kede jo ace. Ango ako penyo gi kop i kom Iyudayan koudo odok ki Babilon kakame oudo komako gi di oko tero gi iye bala mabus, kede da kop i kom Yerusalem.

³Gin kiko waco na be jo koudo obwot ki obukui di kiko dok paco i lobo gi tie kede peko adwong twatwal, doko da jokumbor kame kio kede gi oudo tie neno gi kede acae. Kiwaco na da be apamai me Yerusalem oudo kotuturo, doko da be mac oudo odudubo irutei mege.

⁴Kakame ango awinyo kede kope nogi, ango ako bedo piny di ako donyo koko pi ceng mogo, di akanyo kec kede di alego but Rubanga atie i malo.

⁵Ango ako lego be, “Okwe Rwot Rubanga atie i malo, in idwong twatwal doko wan olwori. Kede genere in igwoko isikan ni but jo kame mari di kigwoko cik ni.

⁶Ngoloro ango di iko ciko yiti winyo kwac na kame ango akwao iceng kede iwor pi jotic ni, gin jo me Isirael. Ango atuco i nyimi be wan jo me Isirael odubo i nyimi. Ango kede jo me oda kede jo ace odubo i nyimi.

⁷Wan otimo ni raco adwong, likame wan otimo gikame in iciko ne wa. Likame wan ogwoko iswilia kame imio wa kibut Musa ngatic ni.

⁸Yutuno kop kame oudo iwaco ne ngatic ni Musa be, ‘Ka likame ibedunu jo agenere buta, abino sasaro wu i diere me atekerin apat.

⁹Do ka ilokerenu dwogo buta di ikounu gwoko cik na, ango abino dwoko wu i kabedo kame ango ayero pi jo wora kiye, akadi bed bala oudo isasarunu kakabor.’

¹⁰“Rwot, magonogi en jotic ni, jo ni amaki. In ilako gi kede twer ni adwong kede teko ni.

¹¹Okwe Rwot, nan do winy kwac na kede kwac ka jotic ni ace kame tie kede mit me bedo kede wor buti. Tin mi gi dedede cobere na kiber di iko mino abaka bed kede cuny me kisa buta.” I kare nono ango en kame oudo abedo ngat kame mio bwini kame abaka mato.