Read kumam Nekemia 10 Bible Online

Nekemia 10 - kumam bible

Nekemia 10

¹Ngat kame bin ogeo keto cinge i cikere nono en ngapug, Nekemia wot ka Kakalia, di do Esedekia da oko keto cinge. Jo kame nying gi lubo nogi da bin oko keto cing gi:

²Seraya, Asaria, Yeremia, Pasikur, Amaria, Malikija, Katus, Sebania, Maluk, Karim, Meremot, Obadia, Danieri, Gineton, Baruk, Mesulam, Abija, Mijamin, Masia, Biligai, Semaya.

⁹Yesua wot ka Asania, Binui dano me ekeko ka Kenadad, Kadamiel, Sebania, Kodia, Kelita, Pelaya, Aanan, Mika, Rekob, Kasabia, Sakur, Serebia, Sebania, Kodia, Bani, kede Beninu.

¹⁴Paros, Pakat Moab, Elam, Satu, Bani, Buni, Asigad, Bebai, Adoniya, Bigibai, Adin, Ater, Esekia, Asur, Kodia, Kasum, Besai, Karip, Anatot, Nebai, Magipiasi, Mesulam, Kesir, Mesesabel, Sadoki, Yadua, Pelatia, Aanan, Anaya, Kosea, Kanania, Kasub, Kalokesi, Pilika, Sobek, Rekum, Kasabana, Maseya, Akia, Aanan, Anan, Maluk, Karim, kede Bana.

²⁸Wan jo Isirael, josaseredoti, Jolebi, jodar irutei, jower, jotic me tempulo, kede jo apat dedede kame pi lubo Iswil ka Rubanga, otieko pokere kede jokumbor kame tie bedo i lobo wa, wan karacel kede mon wa, idwe wa dedede kodongo, kame do romo niang gikame wan otie timo,

²⁹wan dedede okwongere karacel kede jotel wa, doko oyei be ilam miero mak wa ka oko ture. Wan okwongere be obino bedo i kuo kame Iswil ka Rubanga mito ne wa, Iswil kame Rubanga bin omio but Musa ngatic mere; wan obino lubo gi dedede kame Rwot, Rubanga wa ciko ne wa, doko obino gwoko iswilia mege kede pwony mege dedede.

³⁰Wan likame obino nyomere kede jokumbor kame tie bedo i lobo wa.

³¹Ka ngakumbor moro oko kelo alos mere arabo gire moro pi cato ne wan i ceng Sabato arabo i ceng kacil moro, wan likame obino wilo jame gi. Buli mwaka me kanyaare wan likame obino puro poti wa, doko obino jalo banyi dedede likame koculo.

³²Buli mwaka wan ngat acelacel bino kwanyo guram kany me siliba pi konyo tic me ot ka Rubanga.

³³Manoni bino konyo pi udo Mugati kame koyalo but Rwot, giayala me alos kede giayala awanga kame koyalo but Rwot buli ceng; giayala kame komio i ceng Sabato, giayala kame komio i kare me Ebaga me Por Duwe, kede i ibagai apat; kede giayala kacil apat, giayala me kwanyo dub me jo Isirael, kede jamini dedede apat kame mitere me timo tic me tempulo.

³⁴Wan jo ace, kede josaseredoti, kede Jolebi, obino uco alulu buli mwaka, pi yero jo me ekeko kame bino mwodo yen me wango giayala kame komio but Rwot Rubanga wa, bala kame Iswil waco.

³⁵Wan omoko be obino tero i tempulo, buli mwaka, engano kame wan ogeo nyaro kede anyakini kame geo cek ki yen wa kame kopito.

³⁶Wan omoko da be obino mino idwe awobe kao wa but josaseredoti i tempulo, bala kame Iswil waco, di oko mino gi but Rubanga. Wan obino da mino but Rubanga roce kame doke wa cako nywalo, idwe romini kame kocako nywalo arabo idwe diegi kame kocako nywalo.

³⁷Wan obino tero but josaseredoti i tempulo buli mwaka, alos me engano kame kogeo nyaro, kame konyongo me timo mugati, kede giayala apat me bwini, mo me olibeti, kede anyakini me epone dedede, kame kobino keto i agolai me kano jame i tempulo ka Rubanga wa. Doko da wan obino tero but Jolebi, acel me tomon me gi dedede kame wan opuro i poti wa, pien gin en kame kiraro acel me tomon ki bomban wa.

³⁸Ngasaseredoti, akwar Aaron, miero bed tie i kare kame Jolebi gamo kede acel me tomon me jamini. Jolebi bino tero i agolai me kano jame i tempulo, acel me tomon me jamini dedede kame gin kiraro.

³⁹Jo me Isirael kede Jolebi bino tero jamini kame gin kimio; engano, bwini, kede mo me olibeti, i agolai kame kogwoko iye jamini kame kotio kede i tempulo; kanono en kame josaseredoti kame tie i wang tic, jodar irutei me tempulo, kede jower me tempulo bedo iye. Wan likame obino ajajalun i kop amako ot ka Rubanga wa.