Read kumam Nekemia 11 Bible Online

Nekemia 11 - kumam bible

Nekemia 11

¹Jotel me jo oudo do tie bedo Yerusalem. Jo apat dedede oko bin uco alulu pi yero jo me diakal acel i kom buli diakale tomon, kame bino ot bedo i bomba kacil me Yerusalem, di jo icegun dedede ko dong bedo i bomban apat.

²Di jo oko bedo kede pwoc but jo dedede kame bin oko kwanyere ken gi pi ot bedo Yerusalem.

³I bomban apat, jo me Isirael, josaseredoti, Jolebi, jotic me tempulo, kede ikwae ka jotic ka Sulumani bin bedo i lobere gi amako gi i bomban gi. Nying kame lubo nogi en kobedo me jotel me adul me Yuda kame bin bedo Yerusalem:

⁴Ataya wot ka Usia. Joakwari mege bin gin en, Sakaria, Amaria, Sepatia, kede Makalalel, gin ikwae ka Peresi wot ka Yuda.

⁵Maseya wot ka Baruk. Joakwari mege bin gin en, Kolokose, Kasaya, Adaya, Yoyarib, kede Sakaria, gin ikwae ka Sela wot ka Yuda.

⁶Ikwae ka Peresi dedede kame bin bedo Yerusalem oudo tie tol ongwon kede ot kanyape kiwie kanyauni (468), gin dedede jo atek i yi.

⁷Salu wot ka Mesulam. Joakwari mege bin gin en, Yoed, Pedaya, Kolaya, Maseya, Itiel, kede Yesaya.

⁸Jo ace me ekeko ka Benjamin bin gin en: Gabai kede Salai, gin joawade ka Salu kiyapiyapi. Gin dedede jo tol kanyangon kede ot are kiwie kanyauni (928).

⁹Yoweri wot ka Sikiri en kame bin ngatel gi, kede Yuda wot ka Kasenua en kame bin lubo tien ngat kame lo bomba.

¹⁰Ngasaseredoti me agege me bedo kunono en Yedaya wot ka Yoyarib, kede Yakin.

¹¹Me are en Seraya wot ka Kilikia. Joakwari mege bin gin en, Mesulam, Sadoki, Merayot, kede Akitub ngat kame bin tie Ngatel me Josaseredoti.

¹²Jo me ekeko noni kame bin timo tic i tempulo, gin dedede oudo kitie jo tol kanyauni kede ot are kiwie are (822). Ngasaseredoti me adek bin en Adaya wot ka Yerokam. Joakwari mege bin en, Pelalia, Amisi, Sakaria, Pasikur, kede Malikija.

¹³Gin dedede jo me ekeko noni kame bin tie jotel me diakale oudo kitie jo tol are kede ot ongwon kiwie are (242). Ngasaseredoti me ongwon me donyo bedo kunono bin en Amasai wot ka Asarel. Joakwari mege bin gin en, Asai, Mesilemot, kede Imer.

¹⁴Jo tol acel kede ot are kiwie kanyauni (128) me ekeko noni bin obedo isirikalen atek i yi. Ngatel gi bin en Sabidiel wot ka Kagedolim.

¹⁵Magi en Jolebi kame bin oko donyo bedo Yerusalem: Semaya wot ka Kasub. Joakwari mege bin gin en, Asirikam, Kasabia, kede Buni.

¹⁶Sabetai kede Yosabad, gin en jotel kame bin lo Jolebi kame timo tic i ooko me tempulo.

¹⁷Matania wot ka Mika. Joakwari mege bin gin en Sabadi kede Asap. Matania en kame bin telo jower me tempulo i kare me ilega me mino pwoc. Bakubukia en kame bin lubo tien Matania. Abuda wot ka Samua da bin tie kunono. Joakwari mege bin gin en, Galal kede Yedutun.

¹⁸Jolebi dedede kame bin bedo i bomba kacil me Yerusalem oudo tie jo tol are kede ot kanyauni kiwie ongwon (284).

¹⁹Akub, Talemon, kede joawade gi, gin dedede jo tol acel kede ot kanyaare kiwie are (172).

²⁰Jo apat dedede me Isirael, kiton josaseredoti kede Jolebi kame bin odong, bin oko dong bedo i lobere gi amako gi i bomban icegun me Yuda.

²¹Jotic me tempulo bin bedo Yerusalem i adul kame kolwongo be Opel di Sika kede Gisipa en kame telo gi.

²²Usi wot ka Bani en kame bin telo Jolebi kame bedo Yerusalem. Joakwari mege bin obedo: Kasabia, Matania, kede Mika. En oudo ebedo dano me ekeko ka Asap, jo me ekeko kame bin kop amako wer i ot ka Rubanga tie i cing gi.

²³Cik bin tie kame abaka omio amako kop me wer i ot ka Rubanga, epone kame jo me ikekon apapat miero lei kede tic me telo wer i tempulo buli ceng.

²⁴Petakia wot ka Mesesabel, akwar Seera dano me ekeko ka Yuda, en kame bin cungo ne jo Isirael but abaka me Pasia i kope kame mako gi.

²⁵Jo atot bin bedo i bomban kame iyapiyapi kede poti gi. Jo me ekeko ka Yuda oudo bedo Kiriat Araba, Didon, kede Yekabesel, kede i calere me nget bomban nogi.

²⁶Gin bin kibedo da i bomban me Yesua, Molada, Betepelet,

²⁷Kasarasual, Beereseba kede calere me ngete,

²⁸Sikilag, Mekona kede calere me ngete,

²⁹Enirimon, Sora, Yaramut,

³⁰Sanoa, Adulam, kede calere me nget gi. Kibedo da Lakis kede i poti me ngete, kede Aseka kede calere mege. Aso, jo Yuda bin oko bedo i adul kame cakere ki Beereseba i bad tetu piny ape ape tuno i aditot me Kinom i bad tetu malo.

³¹Jo me ekeko ka Benjamin da bin bedo Geba, Mikimas, Aija, Betel kede calere mege,

³²Anatot, Nob, Anania,

³³Kasor, Rama, Gitaim,

³⁴Kadid, Seboim, Nebalat,

³⁵Lod, kede Ono, kede i Aditot me Jo Tic Cing.

³⁶Ikodeta mogo me Jolebi kame oudo bedo Yuda bin oko cwano gi ot bedo kede jo Benjamin.