Read kumam Nekemia 12 Bible Online

Nekemia 12 - kumam bible

Nekemia 12

¹Magi en nying josaseredoti kede Jolebi kame bin odwogo ki Babilon karacel kede Serubabel wot ka Selatiel kede Yesua Ngatel me Josaseredoti:

²Seraya, Yeremia, Esera, Amaria, Maluk, Katus, Sekania, Rekum, Meremot, Ido, Ginetoi, Abija, Mijamin, Maadia, Biliga, Semaya, Yoyarib, Yedaya, Salu, Amok, Kilikia, kede Yedaya. Jo nogi en kame bin obedo jotel me josaseredoti kede jo kame bin konyo gi i kare ka Yesua.

⁸Magi en Jolebi kame bin telo were me pwoc i ot ka Rubanga: Yesua, Binui, Kadamiel, Serebia, Yuda, kede Matania.

⁹Bakubukia, Uno, kede Jolebi wad gi en kame bin cungo pimere kede gin pi gamo wer.

¹⁰Yosua en kame bin obedo papa me Yoyakim; Yoyakim oko nywalo Eliasib; Eliasib oko nywalo Yoyada;

¹¹Yoyada oko nywalo Jonasan; Jonasan oko nywalo Yadua.

¹²I kare kame bin Yoyakim tie kede Ngatel me Josaseredoti, magi en josaseredoti kame oudo obedo jotel me ikekon gi: Meraya en oudo tie ngatel me ekeko ka Seraya, Kanania en oudo obedo ngatel me ekeko ka Yeremia,

¹³Mesulam ngatel me ekeko ka Esera, Yekokanan ngatel me ekeko ka Amaria,

¹⁴Jonasan ngatel me ekeko ka Maluki, Yosepu ngatel me ekeko ka Sebania,

¹⁵Adana ngatel me ekeko ka Karim, Kelakia ngatel me ekeko ka Merayot,

¹⁶Sakaria ngatel me ekeko ka Ido, Mesulam ngatel me ekeko ka Gineton,

¹⁷Sikiri ngatel me ekeko ka Abija, Pilitai ngatel me ekeko ka Moadia,

¹⁸Samua ngatel me ekeko ka Biliga, Yekonatan ngatel me ekeko ka Semaya,

¹⁹Matenai ngatel me ekeko ka Yoyarib, Usi ngatel me ekeko ka Yedaya,

²⁰Kalai ngatel me ekeko ka Salai, Eber ngatel me ekeko ka Amok,

²¹Kasabia ngatel me ekeko ka Kilikia, kede Netanel ngatel me ekeko ka Yedaya.

²²Kop amako jotel me diakale me Jolebi kede me josaseredoti bin kobedo wandiko piny i kare me Jotel me Josaseredoti gi: Eliasib, Yoyada, Jonasan, kede Yadua. Iwandik noni bin oko tieko timo i kare me apugan ka Darias abaka me Pasia.

²³Bin kobedo wandiko nying Jolebi i itabu koudo mako kope me i kare nono; kobedo wandiko gi paka tuno i kare ka Jonasan, akwar Eliasib.

²⁴Jotel me jolebi: Kasabia, Serebia, Yesua, Binui, Kadamiel kede jo kame bin lubo tien gi oko iiko ikodeta are me jower me Jolebi, pi bedo pako Rubanga bala kame Abaka Daudi oudo ociko, di kiwero were kame kileo alea.

²⁵Matania, Bakubukia, Obadia, Mesulam, Talemon, kede Akub en kame bin daro agolai kame okano iye jamini i nget irutei.

²⁶Jo nogi dedede bin otimo tic i kare ka Yoyakim wot ka Yesua, akwar Yekosadoki, kede i kare ka ngapug Nekemia, kede da i kare ka Esera, ngasaseredoti kosomo Iswil twatwal.

²⁷I kare me kwero apama me bomba me Yerusalem, bin oko kelo Jolebi Yerusalem ki kabedere dedede kame gin bin kitie bedo iye, pi bino tedo ebaga me kwero apama nono kede kilel, di kigoo were me mino pwoc but Rubanga, kede suanin abatal, adungun, kede arigirigin.

²⁸Jolebi kame bin obedo jower oudo bedo i calere koluko Yerusalem. Gin bin kiko bino ki kabedere nogo kede ki bomban koluko Netopa,

²⁹kede ki Betigiligal, Geba, kede Asimabet.

³⁰Josaseredoti kede Jolebi oko timo pwola me gin lonyere, di kiko timo kamanono da ne jo, irutei, kede apama me bomba.

³¹Ango ako coko jotel me Yuda i wi apama di ako keto gi telo ikodeta are kame oudo oyaro ot sirito rimaro bomba di kilubo wi apama, di kiwero were me mino pwoc but Rubanga. Ekodet me agege oko lubo bad tetu cam kioto tetu Erute me Oduru.

³²Kosaya kede dul me jotel me Yuda oko lubo gi ki cen.

³³Di Josaseredoti kame oko lubo gi di gin dedede kikuto agwarai gin ige: Asaria, Esera, Mesulam, Yuda, Benjamin, Semaya, kede Yeremia. Di josaseredoti mogo atino da lubo kede agwarai gi. Kikom gi oudo tie iye, Sakaria wot ka Jonasan akwar Semaya. Joakwari mege bin ribo kiton Matania, Mikaya, kede Sakur dano me ekeko ka Asap.

³⁶Joawade ace ka Sakaria kame bin oko lube gin en: Semaya, Asarel, Milalai, Gilalai, Maai, Netanel, Yuda, kede Kanani. Gin dedede oudo kimako jamini me wer acal bala kame bin Abaka Daudi dano ka Rubanga oudo goo. Esera ngat kosomo twatwal en kame bin telo ekodet noni di gin kisirito.

³⁷Kakame gin bin kiko tuno kede i erute kame bin kolwongo be Erute me Atan, gin kiko lubo kayito kame oto i Bomba ka Daudi di kiko kalamo paco mere me abaka, kiko ot kidok i Erute me Pii, kame oudo tie i bad tetu kide me bomba.

³⁸Ekodet me are me jo kame bin wero were me mino pwoc oko lubo wi apama kidok i bad tetu ngodal, di ango ako lubo gi kede dul me ekodet me jo kame oudo tie i wi apama. Wan oko sirito okalamo gedo abor malo, kabedo kame kolwongo be Gedo abor me keno me tedo mugati, di oko ot paka tuno kabedo kame kolwongo be Apama Alac.

³⁹Ki kunono wan oko ot obeo i nget Erute me Epuraimu, Erute me Aporogo, Gedo Abor kame kolwongo be Kananel, kede kame kolwongo be Tol Acel, di oko tuno kabedo kame kolwongo be Erute me Romini. Wan bin oko jik i kabedo kame kolwongo be Erute me Jodar.

⁴⁰Ikodeta are nogo dedede kame oudo tie mino pwoc but Rubanga bin oko cungo i nyim tempulo. Medo i wi jotel kame oudo tie keda,

⁴¹ekodet nango oudo ribo josaseredoti gi: Eliakim, Maseya, Miniamin, Mikaya, Elioenai, Sakaria, kede Kanania,

⁴²Maseya, Semaya, Eleasa, Usi, Yekokanan, Malikija, Elam, kede Eser. Jower bin oko wer kede dwan amalo di Yesarakia en kame telo gi.

⁴³Cenge nono jo oko mino giayala atot but Rubanga, doko jo oko bedo kede ilel adwong, pien Rubanga oudo omio gi yomcuny adwong; mon kede idwe da bin oko bedo kede ilel adwong i ceng nono. Ilelem me ilel me jo me Yerusalem oudo winyere ki kakabor twatwal.

⁴⁴Cenge nono oko yero jo kame lo agolai me kano jamini, kakame bin kogwoko iye jamini kame kotio kede i tempulo, ribo kiton acel me tomon kede cam kame geo cek ki poti. Jo nogo en kame bin raro cam ki poti kiyapiyapi kede bomban, iner me cam kame komio but josaseredoti kede Jolebi bala kame Iswil waco. Jo dedede me Yuda bin cuny gi oko bedo yom twatwal pi tic me josaseredoti kede me Jolebi,

⁴⁵pien gin oudo kiko timo pwola me lonyere kede pwola ace apat kame Rubanga bin ociko. Jower kede jodar irutei da bin oko timo tice gi di lubere kede cik kame bin Daudi kede wode Sulumani omio.

⁴⁶Cako bin sek i kare ka Daudi kede Asap, jower oudo tie kede ngat kame telo gi di kiwero were me pak kede me mino pwoc but Rubanga.

⁴⁷I kare ka Serubabel kede i kare nango, jo Isirael dedede bin mio iner me cam buli ceng but jower kede jodar irutei. Gin bin kimio Jolebi giamia kame mako gi, di Jolebi da ko poko ne josaseredoti gikame gin kipoore udo.