Read kumam Nekemia 2 Bible Online

Nekemia 2 - kumam bible

Nekemia 2

¹I ceng moro acel i duwe me Nisan,[2] i mwaka me ot are me apugan ka Aretasereses, ango ako tero ne abaka bwini. Cako sek oudo pwodi likame ango abedo kede ning i nyim abaka bala i ceng nono.

²Aso, abaka oko penya be, “Pinyo komio itie ning aninga do di likame ituwo da? Miero bed di tie gimoro arac kowango cunyi.” Bed bala lworo oko maka,

³do ango ako waco ne be, “Adwong akwao ibed kuo nakanaka! Pinyo kamio likame aning do di bomba kobedo kakame atesin ka joakwari na tie iye otieko doko ameje, doko da mac odudubo irutei mege?”

⁴Abaka oko penya be, “Nyo kame itie mito?” Ango ako lego but Rwot atie i malo

⁵di ako dwoko ne abaka be, “Ka eyomo cunyi, doko da ka itie kede yomcuny buta, ango akwao be icwaa Yuda, i bomba kame bin koyiko iye joakwari na, tetekeny ango aot temuno gere bobo.”

⁶Abaka oko penya, di dako mere da oudo tie bedo i ngete be, “Ibino ot pi kare arom kamene, doko da ibino dwogo awene?” Aso abaka cunye oko bedo yom eko yei na ot di ango ako waco ne kare kame ango oudo apoore tieko kunono.

⁷Ango ako waco ne abaka be, “Adwong, ka etwero yomo cunyi, mia baluwan ater ne jopug me adulion atie loka tetuca me ecilet me Eupurate, pi kwenyaro gi pi yei na ngolo adulion gin paka tuno Yuda.

⁸Doko da akwao be imia baluwa ater ne Asap, en ngat kame gwoko abum me abaka, pi kwenyaro en pi mina ipirin me timo irutei me apama aluko tempulo, kede me gero apama me bomba, kede ot kame ango abino donyo bedo iye.” Abaka oko mina gi dedede kame oudo akwae, pien kisa ka Rubanga oudo tie keda.

⁹Ango ako ot but jopug me adulion atie loka tetuca me ecilet me Eupurate, di ako mino gi baluwan kowok kibut abaka. Abaka oudo ocwao jodongo me isirikalen mogo keda, karacel kede isirikalen aoto kede tien, gin kiupere keda.

¹⁰Kakame Sanabalat, dano me bomba me Bet Koron, kede Tobia, ngatic kowok ki adul me Amon, owinyo kede be dano moro oudo obino timo tic pi bero me jo me Isirael, gin cuny gi oko wang twatwal.

¹¹Ango ako ot paka tuno Yerusalem, di pi ceng adek

¹²ango likame ako waco ne ngatamoro gikame Rubanga oudo ocibo i cunya pi timo ne Yerusalem. Di do i dier iwor ango ako yai di ako donyo ooko di ako tero cuo mogo oupere keda. Le kame ango ako tero oudo obedo punda acel kenekene kame oudo ango atie wanano.

¹³Ango adonyo ooko iwor di ako donyo ki Erute me Aditot atie i bad tetu tim, di ako dok i bad tetu piny di abeo ki Atan me Twol Kiyiliyili, di ako do tuno i Erute me Woyo. Kakame ango oudo atie ot kede, oudo atie ngingico apamai kotiatiaun me bomba kede irutei kame mac odudubo.

¹⁴Di ako kato i Erute me Atan kede i Atapar me Abaka; do kanono oko bedo diding ne punda kame oudo atie wanano pi meede ot anyim.

¹⁵Aso ango ako dok piny i Aditot me Kideron di ako donyo ririo en di angingico apama. Di ako lokere dok lubo yongayo kame oudo alubo me bino, di ako donyo i bomba di abeo ki Erute me Aditot.

¹⁶Jotel me kanono likame oudo ngeo kakame ango oudo aoto iye, arabo gikame oudo aoto timo; oudo ango pwodi likame awaco ne Iyudayan, josaseredoti, jo kame koworo, jotic adongo kede ne jo ace apat kame oudo poore timo tic.

¹⁷Di do ango ako waco negi be, “Nan nenunu peko kame wan otienu iye; Yerusalem otieko popoto, doko irutei mege da otieko wang. Oikunu gero apama me Yerusalem tetekeny okwanyunu lewic ki wi wa.”

¹⁸Di ako waco negi tim me kisa kame Rubanga obedo kede buta, kede da kope kame abaka oudo owaco na. Di gin kiko waco be, “Ocakunu gedo!” Aso gin kiko jalere pi cako tic pi bero me jo dedede.

¹⁹Do kakame Sanabalat dano me Bet Koron, kede Tobia dano me Amon, kede Muarabu anyinge Gesem owinyo kede kop nono, gin kiko nyero wa nyero me acae di kiwaco be, “Nyo ino kame wun itienu timo? Benyo, itienu mito bedo kede jemo but abaka?”

²⁰Ango ako dwoko be, “Rubanga atie i malo en kame bino mino wan ocobo tic. Wan jotic mege oyaro cako gedo. Do wun iliunu kede iner moro i kom jamini me Yerusalem kede i kom kope kobedo timere iye cako anakacia.”