Read kumam Nekemia 4 Bible Online

Nekemia 4 - kumam bible

Nekemia 4

¹Kakame Sanabalat owinyo kede be wan oudo otie temuno gero apama, cunye oko wang twatwal di eko donyo nywaro wan Iyudayan.

²En ewaco i nyim jowote kede i nyim isirikalen me Samaria be, “Nyo kame Iyudayan agoro nogi paro be kitie timo? Benyo, kimito temuno gero bomba noni bobo? Benyo, kiparo be kame kimio giayala kibino sobolo timo tic noni i ceng acel? Arabo kiparo be kitwero udo kide me gedo ki atukit me apama kame mac owango noni?”

³Tobia oudo tie cungo kanono i ngete, di eda eko medo be, “Apama kame gin kitie gero no akadi ekwee da twero yito iye di eko tyaikin piny!”

⁴Ango ako lego be, “Okwe Rubanga, winy kite kame kitie nywaro wa kede! Mi nyero kame kinyero wa kede dok i wi gin, di iko mino mamako gi di oko tero gi obukui bala mabus.

⁵Kur ium raco gi, doko da kur isasiro gi, pien gin kibedo nywaro wan jo kame otie gedo.”

⁶Aso, wan oko meede kede tic me gero apama, di apama oko dongo paka tuno kakame tie dul me boro mere ot malo; pien jo oudo tie kede cuny me tic.

⁷Do kakame Sanabalat, kede Tobia, kede Imuarabun, kede jo me Amon kede Asidod oko winyo kede be gedo me iiko apama me Yerusalem oudo tie nyiko anyim kiber, kede da be kabedere atwolo koudo odong i apama oudo kotie cuculo, cuny gi oko wang twatwal.

⁸Aso gin dedede kiko timo iik arac karacel pi bino suro Yerusalem di kiko kelo atotolun iye.

⁹Do wan oko lego but Rubanga di oko keto jodar pi kuro bino gin iceng kede iwor.

¹⁰Jo me Yuda oudo tie kede wer gi be, “Teko wa me yeno jame tie tiek; apama kongingidun kame opoore gwaro tero tenge dwong adikinicel. Epone mene kame wan obino tieko kede gero apama noni?”

¹¹Di jokwor wa nogo oko waco be, “Likame gin kibino ngeno, doko da likame gin kibino neno wa paka tuno wan tuno i kom gi di oko neko gi, di oko jiko tic gi.”

¹²Do Iyudayan kame oudo bedo iyapiyapi kede gin oko bino but wan kalamo tien tomon pi kwenyaro wan i kom iik arac kame jokwor wa oudo tie kede i kom wa.

¹³Aso ango ako mino jo tongini, ipimai kede imalia di ako cicibo gi di lubere kede ude gi me anywali, kabedere kame apama oudo pwodi cecek kiye.

¹⁴Ango ako neno be jo oudo do tie kede lworo, di ango ako waco ne jo kame koworo kede ne jotel kede jo dedede apat be, “Kur ibedunu kede lworo i kom gi. Yutununu be Rwot obedo ngat adwong kame kolworo, di ikounu yi pi joawade wu, awobe wu, anyira wu, mon wu, kede pi miere wu.”

¹⁵Jokwor wa oko winyo be wan oudo otieko ngeno iik gin, kede be Rubanga oudo otieko totolo iik gi nono. Di do wan dedede oko dok i tic me iiko gero apama.

¹⁶Cako i kare nono ot anyim, dul me jotic nango en oudo timo tic me gedo, di dul ocelu tie cungo daro jokwor di kingapo ibukui me gwoko kom gi, kede di kimako tongini, ibukui kede imalia i cing gi. Jotel wa oko bedo mino kony koromo but jo

¹⁷koudo tie temuno gero apama. Akadi jo kame oudo yeo jamini me gedo da oudo tio kede cing gi acel di cing gi ocelu tie mako gi me yi.

¹⁸Doko da buli dano koudo tie gedo oudo tio di erwako epima i piere. Dano koudo poore kuto agwara me cako yi oudo bedo karacel kede ango.

¹⁹Ango ako waco ne jo kame koworo nogo kede ne jotel kede jo ace apat be, “Wan otie timo tic i apama abor adikinicel, manono oko mino wa osasarun otie obocoboco.

²⁰Ka iwinyunu koko me agwara, poore icokerenu buta. Rubanga wa bino yi pirwa.”

²¹Aso, buli ceng cako obai tuno iwor di acerin owok, dul me jo kikom wa oudo timo tic me gero apama di dul ocelu tie cungo daro jokwor kede tongini i cing gi.

²²Doko da ango ako waco ne jotel me tic karacel kede jotic gi pi donyo buto Yerusalem iwor, tetekeny okaruno donyo daro bomba iwor di otio iceng.

²³Aso ango karacel kede imiegu na ace, kede jotic na, kede jodar koudo tie buta, wan oko donyo buto iwor abongo gonyo igoen. Doko da oudo obuto kede jamini me yi i cing wa.