Read kumam Nekemia 5 Bible Online

Nekemia 5 - kumam bible

Nekemia 5

¹Koko oko wokun kibut jo, cuo karacel kede mon gi, i kom Iyudayan wad gi.

²Mogo kikom gi oudo tie waco be, “Wan otie kede jo atot, omito alos me acama tetekeny obed kuo.”

³Jo ace apat oudo waco be, “I kare me kec wan osingao poti wa, poti me olok, kede ude wa pi udo alos me acama.”

⁴Doko jo apat da oudo waco be, “Wan okopao sente me culo esolo kame abaka ongolo ne wa pi poti wa kede pi poti me olok.

⁵Wan obedo ateker acel kede gin. Mam idwe wada cal acala kede mergi? Do di wan otie cato idwe wa bala ipasoi. Anyira wa mogo kotieko tero tetek. Wan oli do kede teko moro, doko da poti wa kede poti wa me olok otieko doko me ka jo apat.”

⁶Cunya oko wang twatwal iesawa kame awinyo kede koko gi.

⁷Ango ako bedo tamo kop nono di ako bunano jotel kede jotic adongo di awaco ne gi be, “Wun itienu dino Iyudayan wadu!” Ango ako lwongo cokere adwong pi bunano gi,

⁸di ako waco negi be, “Wan otieko timo bala kame teko wa twero di oko culo cul me dwoko Iyudayan wad wa kame oudo kocato but atekerin apat; do nan wun bobo itienu medo cato joawade wu, kame wan doko opoore wilo pi dwoko!” Jotel oko ling titi abongo yamo gimoro.

⁹Ango ako waco be, “Gikame wun itienu timo likame ber. Ipoorenu bedo kede lworo but Rubanga di ikounu donyo timo gikame opoore, tetekeny kur atekerin apat ud gikame kiromo nyero wa iye.

¹⁰Ango kede jowota kede jotic na obedo kopao jo sente kede alos. Ojikunu do penyo cul kibut gi.

¹¹I ceng me tin dwokenu gi poti gi, poti me olok, poti gi me olibeti, kede ude gi, kede da magoba kame oudo gin kiculo wu i wi sente, alos, bwini, kede mo kame gin oudo kigamo kibutu.”

¹²Gin kiko waco be, “Wan obino dwoko negi jamini gi dedede abongo mito cul moro kibut gi. Wan obino timo gikame in iwaco.” Ango ako lwongo josaseredoti ako mino gi kikwongere pi timo gikame kicikere iye.

¹³Di ango ako lalako negi isau kobedo abiel me ekanso na di awaco negi be, “Akwao Rubanga lalako ngat acelacel ki ode kede kikom jamini mege dedede, ka likame egwoko cikere noni. Akwao be elalako gi kamanoni di kiko dong abongo gimoro.” Jo dedede kame oudo tie kanono oko waco be, “Amen,” di kiko donyo pako Rwot. Di jo oko cobo cikere gi.

¹⁴Doko da medo i wi manono, pi mwakini tomon kiwie are kame ango apugo kede adul me Yuda, cako i mwaka me ot are me apugan ka Aretasereses, tuno i mwaka me ot adek kiwie are me apugan mere, ango kede imiegu na likame ocamo cam kame oudo kopoore mino ngapug me adul.

¹⁵Jopug ace kocako nango pug oudo omio jo yeno yec apek; gin oudo kigamo cam kede bwini kibut jo medo i wi sente akaya me siliba ot ongwon. Akadi jotic gi da obedo dino jo. Do ango likame ako timo kamanono, pien ango atie kede wor but Rubanga.

¹⁶Ango aketo teko na dedede temuno gero apama di likame ako wilo gimoro amaka; jotic nango dedede oudo ocokere kunono timo tic.

¹⁷Jo kame oudo camo ki emesa nango oudo tie tol acel kede ot kany (150), gin Iyudayan kede jotel gi, medo i kom jo ace kame oudo wok ki atekerin apat kame kio kede wa.

¹⁸Buli ceng acelacel ango oudo aneko twon acel, romini kanyape abeco, kede gwen atot atota; doko da ingei buli ceng tomon ango oudo akelo bwini anyen. Do ango oudo angeo be manoni oudo twero bedo bala yec apek ne jo, aso omio likame ango ako penyo pi gamo jamini kame ngapug me adul oudo poore udo.

¹⁹Okwe Rubanga, akwai iyutuno jamini dedede kame ango atimo ne jogi di iko timo na iye bero.