Read kumam Nekemia 6 Bible Online

Nekemia 6 - kumam bible

Nekemia 6

¹Sanabalat, Tobia, Gesem kede jokwor wa ace apat oko winyo be wan oudo otieko gero apama likame doko tie karamoro atwolo kodong iye, bed bala likame oudo pwodi odudupo ikekon me irutei.

²Aso, Sanabalat kede Gesem oko cwano kop lwonga di kiwaco be, “Bia di oko riamo kedi i calo acel me ebar me Ono.” Manoni oudo obedo rieko gi me mono epone me timo nango can.

³Ango ako cwano jo but gi pi waco negi be, “Ango atie timo tic apire tek, likame ango atwero bino kuno. Ango likame akaruno mino tic cungo pi ango bino butu.”

⁴Gin kiko bedo cwano lwongo nono buta tien ongwon, do ango ako bedo dwoko negi kop acel nono.

⁵Iepone acel nono Sanabalat oko cwano ngatic mere buta tien me kany kede baluwa kalikame komwono.

⁶Baluwa nono oudo somere kaman: “Rwonge osarakin i diere me atekerin be in kede Iyudayan ace itienu mito bedo kede tim me jemo, be manono en komio itienu gero apama; kiton Gesem da tie waco kop acel nono. Rwonge noni waco be in itie mito doko abaka,

⁷kede da be in itieko iiko inabin mogo pi ot tuco i Yerusalem be in en ibedo abaka me Yuda. Kop noni ateteni bino tuno but abaka, pi manono ango atie kede tam be oriamakin di oko nyamo kop noni.”

⁸Ango ako dwoko ne baluwa kame waco be, “Kope dedede kame in itie waco obedo kope me abe, kope go in iteto kede wii.”

⁹Gin oudo kitie mito mino wa lworo be tetekeny owek tic. Do ango ako lego be, “Do nan, Okwe Rubanga, mia abed tek.”

¹⁰Ceng acel ango ako ot welao Semaya wot ka Delaya, en akwar Meketabel. En oudo lworo omake likame etwero wok ki ode. En eko waco na be, “Ango kede in ooti i Kabedo Kacil me tempulo di oko gono ikekon, pien kitie bino mito neki; ateteni iwor atin kitie bino neki.”

¹¹Ango ako dwoko be, “Dano bala ango likame sobolo ringo ot gwokere i tempulo pi laro kuo mere. Ango likame abino ot!”

¹²Ango ako niang be Rubanga oudo kom likame owaco ne Semaya kop moro akadi acel, do Tobia kede Sanabalat en oudo owile pi minango ikwenyar nono.

¹³Gin oudo kiwile pi minango lworo di ako timo dub i yore nono, tetekeny gin kipwok nyinga di kiko mina lewic.

¹⁴Ango ako lego be, “Okwe Rubanga na, yutuno gikame Tobia kede Sanabalat otimo di iko mino gi alola; mi anabi Noadia kede inabin apat da alola, gin jo kame kitamo mina lworo.”

¹⁵Tic me gero apama oko tiek i ceng me ot are kiwie kany me duwe me Elul.[3] Tic nono oudo otieko ceng ot kany kiwie are.

¹⁶Kakame jokwor wa me atekerin me kio oniang kede be tic oudo otiek, teko gi oko tiek, pien oudo kiniang be Rubanga en okonyo wan timo tic noni.

¹⁷I kare nono dedede jotel me Iyudayan oudo obedo cwano ne Tobia baluwan di eda edwoko negi.

¹⁸Jo atot me Yuda oudo gango tam mere piento en oudo enyomo nyar ka Sekania wot ka Arak. Medo i wi manono wode anyinge Yekokanan oudo onyomo nyar ka Mesulam wot ka Berekia.

¹⁹Jo oudo yamo akadi i nyima bero kame Tobia otimo, doko da oudo kitero ne Tobia kope dedede kame ango awaco. Aso, Tobia oko meede cwano na baluwan di etamakino pi mina lworo.