Read kumam Nekemia 7 Bible Online

Nekemia 7 - kumam bible

Nekemia 7

¹Kakame kotieko kede gero apama di oko sisipo ikekon me irutei mege, oko do yero jodar, jower, kede oko mino Jolebi ace da tice gi.

²Ango ako cibo jo are pi bedo joloc me bomba me Yerusalem: omina Kanani kede Kanania, ngat koudo telo isirikalen adaro apama me cel. Kanania oudo obedo dano agenere, doko da oudo etie kede wor but Rubanga kalamo jo ace atot.

³Ango ako waco negi be, “Likame kopoore yabo irutei me Yerusalem paka tuno di ceng otieko dongo malo; doko da kopoore cecego gi otieno di pwodi jodar da tie cungo kanono likame kiyai. Doko da yerunu jodar kikom jo kame bedo Yerusalem di ikounu cicibo gi daro kabedere mogo, di ace apat ko dong donyo mamano nget ude gi.”

⁴Yerusalem oudo obedo bomba adwong twatwal, do jo kame oudo tie iye nonok, doko da oudo pwodi likame kogero iye ude atot.

⁵Rubanga oko minango tam me coko jotel kede jodongo me tice di ako donyo wapo nying joakwari gi. Ango ako udo iwandik kame wapere me nying joakwari me jo kame oudo ocako dwogo ki obukui, kakame oudo komako gi di oko tero gi iye. Gikame audo iye ine:

⁶Jo atot koudo tie bala mabus obukui oko yai ki Babilon, di kiko dwogo Yerusalem kede Yuda, ngat acelacel i bomba me turgi. Jo me miere gin oudo bin tie bedo Babilon bala mabus cako i kare kame Abaka Nebukadunesa omako gi kede di eko tero gi kunono.

⁷Jotel gin oudo obedo Serubabel, Yosua, Nekemia, Asaria, Ramia, Nakamani, Modekai, Bilisan, Misiperet, Bigibai, Nekum, kede Bana.

⁸Magi en nying jo me Isirael, kede wel me jo me ude apapat kodwogo ki obukui: Ikwae ka Paros, jo tutumia are kede tol acel kede ot kanyaare kiwie are (2,172);

⁹me ka Sepatia, jo tol adek kede ot kanyaare kiwie are (372);

¹⁰me ka Arak, jo tol kanyape kede ot kany kiwie are (652);

¹¹me ka Pakat Moab (magonogo en ikwae ka Yesua kede Joab), jo tutumia are kede tol kanyauni ki tomon kiwie kanyauni (2,818);

¹²me ka Elam, jo tutumia acel kede tol are kede ot kany kiwie ongwon (1,254);

¹³me ka Satu, jo tol kanyauni kede ot ongwon kiwie kany (845);

¹⁴me ka Sakai, jo tol kanyaare kede ot kanyape (760);

¹⁵me ka Binui, jo tol kanyape kede ot ongwon kiwie kanyauni (648);

¹⁶me ka Bebai, jo tol kanyape kede ot are kiwie kanyauni (628);

¹⁷me ka Asagad, jo tutumia are kede tol adek kede ot are kiwie are (2,322);

¹⁸me ka Adonikam, jo tol kanyape kede ot kanyape kiwie kanyaare (667);

¹⁹me ka Bigibai, jo tutumia are kede ot kanyape kiwie kanyaare (2,067);

²⁰me ka Adin, jo tol kanyape kede ot kany kiwie kany (655);

²¹me ka Ater (kolwonge da be Esekia), jo ot kanyangon kiwie kanyauni (98);

²²me ka Kasum, jo tol adek kede ot are kiwie kanyauni (328);

²³me ka Besai, jo tol adek kede ot are kiwie ongwon (324);

²⁴me ka Karip, jo tol acel kede tomon kiwie are (112);

²⁵me ka Gibeon, jo ot kanyangon kiwie kany (95).

²⁶Magi en wel me jo oko dwogo di kolubo kede nying bomban kame bin joakwari gi obedo iye: ki Betelem kede Netopa, jo tol acel kede ot kanyauni kiwie kanyauni (188);

²⁷ki Anatot, jo tol acel kede ot are kiwie kanyauni (128);

²⁸ki Bet Asimabet, jo ot ongwon kiwie are (42);

²⁹ki Kiriat Yearim, Kepira, kede Berot, jo tol kanyaare kede ot ongwon kiwie adek (743);

³⁰ki Rama kede Geba, jo tol kanyape kede ot are kiwie acel (621);

³¹ki Mikimas, jo tol acel kede ot are kiwie are (122);

³²ki Betel kede Ai, jo tol acel kede ot are kiwie adek (123);

³³ki Nebo, jo ot kany kiwie are (52);

³⁴ki Elam ocelu, jo tutumia acel kede tol are ki ot kany kiwie ongwon (1,254);

³⁵ki Karim, jo tol adek kede ot are (320);

³⁶ki Jeriko, jo tol adek kede ot ongwon kiwie kany (345);

³⁷ki Lod, Kadid, kede Ono, jo tol kanyaare kede ot are kiwie acel (721);

³⁸ki Sena, jo tutumia adek kede tol kanyangon ki ot adek (3,930).

³⁹Magi en wel me jo oko dwogo ki ude acelacel me josaseredoti: me ka Yedaya (ikwae ka Yesua), jo tol kanyangon kede ot kanyaare kiwie adek (973);

⁴⁰me ka Imer, jo tutumia acel kede ot kany kiwie are (1,052);

⁴¹me ka Pasikur, jo tutumia acel kede tol are kede ot ongwon kiwie kanyaare (1,247);

⁴²me ka Karim, jo tutumia acel kede tomon kiwie kanyaare (1,017).

⁴³Magi en wel me jo oko dwogo ki buli ot me Jolebi: me ka Yesua kede Kadamiel (ikwae ka Kodabia), jo ot kanyaare kiwie ongwon (74).

⁴⁴Jower: ikwae ka Asap, jo tol acel kede ot ongwon kiwie kanyauni (148).

⁴⁵Jodar irutei me tempulo: ikwae ka Salum, me ka Ater, me ka Talemon, me ka Akub, me ka Katita, kede me ka Sobai, gin dedede jo tol acel kede ot adek kiwie kanyauni (138).

⁴⁶Magi en nying ude me jo kame timo tic i tempulo, kame bin ikwae gi oko dwogo: Sika, Kasupa, Tabaot,

⁴⁷Keros, Sia, Padon,

⁴⁸Lebana, Kagaba, Salamai,

⁴⁹Aanan, Gidel, Gekar,

⁵⁰Reaya, Resin, Nekoda,

⁵¹Gasam, Usa, Pasea,

⁵²Besai, Meunim, Nepusesim,

⁵³Bakabuk, Kakupa, Karakur,

⁵⁴Baselit, Mekida, Karasa,

⁵⁵Barakos, Sisera, Tema,

⁵⁶Nesia, kede Katipa.

⁵⁷Magi en nying ude me jotic ka Sulumani kame bin oko dwogo ki obukui: Sotai, Soperet, Perida,

⁵⁸Yala, Darakon, Gidel,

⁵⁹Sepatia, Katil, Pokeret Kasebaim, kede Amon.

⁶⁰Wel dedede me ikwae ka jotic me tempulo kede me ka jotic ka Sulumani kame oko dwogo ki obukui oudo tie tol adek kede ot kanyangon kiwie are (392).

⁶¹Oudo tie jo tol kanyape kede ot ongwon kiwie are (642) koudo odwogo da ki obukui, gin jo me ikekon ka Delaya, Tobia, kede Nekoda, do oudo likame tie gikame gin kitwero nyuto kede be gin kibedo jo me Isirael. Gin bin kidwogo ki bomban me Tel Mela, Tel Karasa, Kerub, Adon, kede Imer.

⁶²

⁶³Doko da ude mogo me josaseredoti likame oko twero udo iwandik kame nyuto wapere me joakwari gi; ude nogo ige: Kabaya, Kakos, Barisilai. (Kwaru me josaseredoti me ot ka Barisilai oudo bin onyomo dako me ot ka Barisilai me Gilead, di do en bin eko tero nying ot kame ore oudo owok kiye nono.) Pi kite kame gin likame kiko twero nyuto kede wapere me joakwari gi, omio likame oko gamo gi pi bedo josaseredoti.

⁶⁴

⁶⁵Ngapug oko waco negi be likame kipoore camo cam kame koyalo ne Rubanga tuno di kotieko tic kede Urim kede Tumim pi udo niang i kom kop nono.

⁶⁶Wel me jo dedede kodwogo ki obukui oudo tie tutumia ot ongwon kiwie are kede tol adek ki ot kanyape (42,360),

⁶⁷medo i wi jotic acuo kede amon tutumia kanyaare kede tol adek ki ot adek kiwie kanyaare (7,337), kede jower tol are kede ot ongwon kiwie kany (245) kobedo cuo kede mon.

⁶⁸Oudo kitie kede asigiran tol kanyaare kede ot adek kiwie kanyape (736), kede leini acal bala punda tol are kede ot ongwon kiwie kany (245),

⁶⁹aguraguran tol ongwon kede ot adek kiwie kany (435), kede pundan tutumia kanyape kede tol kanyaare ki ot are (6,720).

⁷⁰Jo atot kame bin telo ude apapat oko mino kony me temuno gero tempulo. Ngapug me adul bin oko mino kilo kanyauni me saabu, kalayan ot kany, kede ikanson tol kany kede ot adek (530) me josaseredoti.

⁷¹Jotel mogo me ude apapat bin oko mino kilo tol acel kede ot kanyape kiwie kanyauni (168) me saabu, kede kilo tutumia acel kede tol are kede ot kany (1,250) me siliba.

⁷²Jo ace apat oko mino kilo tol acel kede ot kanyape kiwie kanyauni (168) me saabu, kilo tol acel kede ot ongwon (140) me siliba, kede ikanson ot kanyape kiwie kanyauni me josaseredoti.

⁷³Aso, josaseredoti, Jolebi, jodar irutei, jower, jo ace apat, jotic me tempulo, kede jo dedede me Isirael oko bin dok bedo i bomban kame bin joakwari gi bedo iye.