Read kumam Nekemia 8 Bible Online

Nekemia 8 - kumam bible

Nekemia 8

¹I buto duwe acel me duwe me kanyaare jo oko cokere kakaler koudo tie i nyim Erute me Pii. Gin kiko penyo Esera, en ngat koudo obedo ngasaseredoti kede dano kosiyao odocon Iswil kame bin Rwot omio jo me Isirael kibut Musa; kipenye pi somo negi itabu me Iswil nono. Esera oko kelo Itabu me Iswil nono di eko cungo i nyim ekodet me cuo, mon, kede iduwe adito koudo ocokere.

³Esera oko somo negi Iswil ka Musa i nyim Erute me Pii kanono cako odiko sek tuno esawa me i dier iceng.

⁴Esera oudo tie cungo malo i wi ibaon kame oudo kogero pi kop nono. Cuo koudo tie cungo i bade tetu cam gin ige: Matitia, Sema, Anaya, Uria, Kilikia, kede Maseya. Cuo koudo tie cungo i bade tetu ngodal gin ige: Pedaya, Misael, Malikija, Kasum, Kasabadana, Sakaria, kede Mesulam.

⁵Kakame Esera oudo tie cungo kede malo i wi ibaon kame kogero, jo dedede oko ciko wang gi i kome. Cucuto di en eyabo itabu, gin kiko cungo malo.

⁶Esera oko waco be, “Pak bed but Rwot, en Rubanga adwong!” Jo dedede oko dwoko be, “Amen! Amen!” Gin dedede kiko riondiko di kiluro wi gi piny pi woro Rwot.

⁷Ingei manoni, jo oko dong kargi nono di Jolebi mogo oko donyo gonyo negi dwong me kope kame tie i Iswil kame oudo kosomo nono, Jolebi nogo gin ige: Yesua, Bani, Serebia, Yamin, Akub, Sabetai, Kodia, Maseya, Kelita, Asaria, Yosabad, Aanan, kede Pelaya.

⁹Di Nekemia, en ngat koudo obedo ngapug me adul, Esera, ngat oudo obedo ngasaseredoti kede ngapwony me Iswil, kede Jolebi kame oudo tie gonyo ne jo dwong me Iswil nono oko waco ne jo dedede be, “Ceng katin obedo ceng kacil i nyim Rwot Rubanga wu, aso kur itururunu amoto koko.” Pien jo dedede oudo tie koko kakame kiwinyo kede kope me Iswil.

¹⁰Nekemia oko waco negi be, “Dokunu i miere wu ikounu tedo ebaga kede cam abeco kede bwini amit, di ikounu poko mogo da imiunu jo kame li kede gimoro, pien ceng katin obedo ceng kacil i nyim Rwot. Doko da kur ibedunu kede cwercuny pien yomcuny kame Rwot mio wu bino mino wu teko.”

¹¹Jolebi oko donyo dino cuny jo di kiwaco negi be, “Kweunu cunyu, ceng katin obedo ceng kacil i nyim Rwot.”

¹²Aso jo dedede oko dok i miere gi di kiko cam kede mato bwini kede kilel, di kiko mino cam but jo kame oudo li kede gimoro da, pien gin oudo kiniang gikame kosomo negi.

¹³I ceng me are me duwe me kanyaare, jotel me ude me joakwari, karacel kede josaseredoti kede Jolebi oko cokere but Esera ngapwony me Iswil, pi siyao kop me Iswil nono.

¹⁴Gin kiko udo kakame kowandiko i Iswil kame Rwot oudo omio Musa nono be, jo me Isirael poore bedo i kimere i kare me Ebaga me Kimere.

¹⁵Aso, gin kiko cwano kop i Yerusalem dedede kede i bomban ace apat be, “Otunu i wi imukuran di ikounu kelo ajange me olibeti, me maitol, me tugere, kede ajange me yen ace, ikounu bino timo kede gi kimere bala kame kowandiko i Iswil.”

¹⁶Aso jo oko ot obar di kiko kelo ajange me yen nogo di kiko gero kede gi kimere, ngat acelacel kakopetere me wi ode, kede da i diakale, kede i diakal me tempulo, kede kacokere kame tie i nyim Erute me Pii kede Erute ka Epuraimu.

¹⁷Di jo dedede koudo odwogo ki obukui kakame oudo kitie iye bala mabus oko gero kimere di kiko donyo bedo i yi gi. Cako i kare ka Yosua wot ka Nun tuno i ceng noni oudo jo likame obedo timo kamanono. Jo oko bedo kede kilel adwong adikinicel.

¹⁸Aso, Esera oko bedo somo ne jo Iswil ka Rubanga cako i ceng me agege me ebaga paka tuno i ceng me ajikini. Gin kiko tedo ebaga pi ceng kanyaare, di i ceng me kanyauni kiko bedo kede cokere kacil me cego ebaga, bala kame oudo Iswil mito.