Read kumam Esita 1 Bible Online

Esita 1 - kumam bible

Esita 1

¹Di bin en etie i kom mere me ajakanut koudo tie Susa, en bomba adwong me Pasia, Abaka Sereses bin pugo adulion akalamo tol acel kede ot are kiwie kanyaare (127), cako ki India tuno Abisinia.

³I mwaka me adek me apugan mere, en eko iiko ebaga ne jotic mege kede jotel me apugan. Isirikalen me Pasia kede Media, karacel kede jotel kede jopug me adulion da oudo tie kunono.

⁴En oudo ebedo nyuto abar me ajakanut mere kede deyo kede dwongo mere pi dwete kanyape.

⁵Ingei manono abaka oko iiko ebaga ne jo dedede koudo tie i bomba me Susa, jo obaro kede jocan di rom aroma. Ebaga nono oko tieko ceng kanyaare di oudo kotie came i diakal me paco ka abaka.

⁶Oudo kotubuso diakal nono kede isukan ebululu ebululu kede atar kame kotimo kede epamba, di oko twetweo gi kede ausin akwakwar i kom mwolere me siliba kame oudo tie i kom ipirin kame kotimo kede kidi mabol. Komini me bedo kame kotimo kede saabu kede siliba oudo tie i diakal nono. Pi tubuso diakal nono oko namo iye kidi mabol atar, kede kidi ace arieny arienya, kede kide ace me erangi apapat.

⁷Oudo kopoko ne jo giamata kede ikopon kame kotimo kede saabu, di kotimo buli acelacel di pat kede icegun. Abaka oudo li kede woro kede bwini.

⁸Dano oudo mato bwini bala kame cunye mito, pien abaka oudo owaco ne jotic mege pi mino buli dano rom me bwini kame cunye mito.

⁹Kakame manono oudo tie timere kede, Basati abaka adako oudo da tie mino mon camo ebaga i ot ka abaka.

¹⁰I ceng me kanyaare me ebaga, Abaka Sereses oudo tie matere di etie kede yomcuny, di eko lwongo abwocin kanyaare koudo obedo jotic mege akonye, gin en Mekuman, Bisita, Karabona, Bigita, Abagata, Setar, kede Karakas.

¹¹En eko ciko gi pi ot omo Basati abaka adako di etie ngapo ocoro mere me ajakanut. Abaka nono oudo obedo dako acil adikinicel, omio Abaka Sereses oudo mito nyuto cilo mere ne jotic adongo kede wele dedede koudo ocokere.

¹²Do kakame jotic nogo oko ot waco ne kede abaka adako Basati cik kame abaka Sereses oudo omio gi, Basati oko dagi ot kunono. Manoni oudo oko mino cuny Sereses owang twatwal.

¹³Aso abaka oudo onare pepenyo tam kibut jo atie kede niang atut i kom kop amako iswilia kede itok.

¹⁴Jo kame en oudo enare pepenyo tam kibut gi gin ige: Karasena, Setar, Adamata, Tarusi, Meresi, Marasena, kede Memukan; gin oudo kibedo jotic adongo kanyaare me Pasia kede Media kame oudo tero tice adongo i ajakanut nono.

¹⁵En eko waco negi be, “Ango, Abaka Sereses acwao jotic na but abaka adako Basati di acike pi bino buta, en eko dagi winyo kop na. Nan iswil waco be nyo kame opoore timo ne dako noni?”

¹⁶Di Memukan oko waco ne abaka kede jotic mege adongo be, “Abaka adako Basati otieko bedo kede acae but abaka ribo kiton jotic mege adongo dedede, kede da kiton but cuo dedede me ajakanut noni.

¹⁷Buli dako acelacel me ajakanut noni bino cako bedo kede acae but cware tek kame ewinyo gikame abaka adako noni otimo. Gin kibino donyo waco be, ‘Abaka Sereses oudo omio abaka adako Basati cik pi ot bute, do en eko dagi.’

¹⁸Di pwodi ceng atin likame okato, mon me jotic adongo me Pasia kede Media kotieko winyo ikiteso ka abaka adako Basati bino cako bedo kede epali but joacwog gi, di manono ko bino mino cwog gi doko ger negi.

¹⁹Aso, adwong ka in iyei, wot cik be Basati likame doko bino tuno i nyimi, in abaka, di iko mino kowandiko cik nono piny i kom iswilia me Pasia kede Mede, tetekeny kur dikimaca doko koloke. Di do in iko mino kom mere me abaka adako but dako moro ace kame ber kalamo en.

²⁰Kame cik kame in iwoto nono oko winyere kabedo dedede me ajakanut alac noni, mon dedede bino bedo kede wor but cwog gi, bed bala kibaro amoto kijocan.”

²¹Abaka kede jotic mege adongo oko gamo tam nono, di abaka oko timo gikame Memukan oudo owaco.

²²En eko wandiko baluwan i adulion dedede kame abaka pugo, but jo dedede kede iwandik kede leb kame gin kitwero somo, di ewaco negi pi cuo dedede bedo kede akarunikin akalamo dedede i miere gi.