Read kumam Esita 2 Bible Online

Esita 2 - kumam bible

Esita 2

¹Ingei manono, akadi ingei cuny Abaka Sereses kwei, do en pwodi eko dong di eyutuno gikame Basati otimo, kede da kop me cik kame en eko wandiko piny amakere kede en.

²Di jotic kame gwoko abaka oko waco be, “Adwong, wek komoi ni nyako moro kiyapakina kalikame pwodi ongeo icuo.

³Koto iyero jotic mogo ki adulion dedede me ajakanut ni, di iko mino gi kicok anyira dedede acil kalikame pwodi ongeo cuo di kiko kelo gi kakame in igwoko kiye mon ni i bomba adwong me Susa kan. Di do in iko bino keto gi i cing Kegai, en abwocit ngat kame lo kope amakere kede mon nin, di oko bino mino gi sut kede moe amio jo doko cil.

⁴Di do in iko bino kwanyo nyako acel kame yomo cunyi kalamo, di iko mine ebed abaka adako kawang Basati.” Kop noni oko yomo cuny abaka di eda eko timo kamanono.

⁵Aso bin tie i bomba me Susa kunono Eyudayat kame nyinge Modekai wot ka Yair, wot ka Simei, wot ka Kis, dano me ekeko ka Benjamin.

⁶Kakame Abaka Nebukadunesa me Babilon omako kede Abaka Yekoyakin di eko tere obukui bala mabus, karacel kede jo ace apat, Modekai da oudo obedo ngat acel kikom gi.

⁷En oudo etie kede acen mere anyinge Esita kame en oudo ebedo gwoko paka dongo, pien toto mere kede papa mere oudo otieko to. Esita oudo obedo nyako acil adikinicel.

⁸Kakame abaka omio kede cik pi mono anyira acil, bin oko tero anyira atot i paco me abaka i bomba me Susa, i cing Kegai ngat koudo telo kop amako mon me abaka; Esita da oudo obedo ngat acel kikom gi.

⁹Esita oko yomo cuny Kegai kalamo di do en eko mine moe dedede amitere me medo mine doko cil, kede da oko donyo mine cam abeco. Oko yero ne agola aber kalamo di oko mine anyira kanyaare kame koyero ki paco ka abaka pi donyo gwoke.

¹⁰Modekai oudo oko coro Esita be kur ewac ne ngatamoro be en ebedo Ayudayat, Esita da oko lubo kop mere.

¹¹Buli ceng Modekai oudo cucungo i diakal me kakame mon oudo bedo iye kanono pi mito niang kite kame kuo ka Esita tie kede, kede gikame otimere ne.

¹²Oko bin bedo iiko kom anyira nogo pi mwaka acel; dwete kanyape me agege oudo kosuto gi kede mo me maya, di bobo oko bin meede suto gi kede moe angwe kur me mon pi dwete kanyape. Di do ingei manono buli nyako acelacel oko donyo ot but Abaka Sereses pi iwor acel.

¹³Nyako kame oudo tie yai ki kabedo me mon ot but abaka oudo penyo gimoroni dedede kame cunye tie mito ot kede kunono.

¹⁴Buli nyako oudo oto but abaka otieno di eko dwogo odiko, di eko donyo bedo kabedo ace me mon kame abwocit anyinge Sasagasi en oudo gwoko, en ngat kame oudo gwoko mon ka abaka kalikame enyomo. Nyako moroni oudo likame yai ki kanono dok but abaka, kwanyo ka en oudo eyomo cuny abaka di abaka oko lwonge kede nyinge pi dok bute.

¹⁵Ceng oko tuno me Esita da ot but Abaka. Esita oudo obedo nyar ka Abikail neru me Modekai, en nyako kame Modekai oudo obedo gwoko bala nyare. Aso Esita likame oko ngapo gimoro ace kwanyo kenekene gikame abwocit Kegai, ngat koudo daro mon ka abaka owaco ne be engapi. Jo dedede koudo oneno Esita wang gi oudo pwoye.

¹⁶Aso i mwaka me kanyaare me apugan ka Sereses, i duwe me tomon, en duwe me Tebet, oko bin tero Esita i ot ka abaka but Sereses.

¹⁷Abaka bin cunye oko maro Esita kalamo anyira apat dedede; Esita oudo oyomo cuny abaka kalamo anyira icegun dedede, di do abaka oko bin ngapo ne ocoro me ajakanut i wie di oko mine edoko abaka adako kawang Basati.

¹⁸Di do abaka oko tedo “Ebaga ka Esita” di eko lwongo iye jotice mege adongo kede jopug, en oudo ebedo ebaga adwong twatwal. En eko mino ceng nono obedo ceng adwong di jo likame oko timo iye tic moro i ajakanut mere lung. Cenge nono da en eko mino jo giamia kame porere kede ruom mere me abaka.

¹⁹I kare nono kame oudo kotie mono kede anyira kalikame ongeo cuo, bin abaka oko yero Modekai di oko mine ruom me ngapug.

²⁰Do Esita oudo likame otuco ne jo ateker mere kede joawade mege, bala kame Modekai oudo owaco ne. En bin elubo kop kame Modekai owaco ne noni, bala kame oudo da ebedo lubo kede kop mere sek.

²¹I kare nono kame Modekai oudo obedo kede ngatic me paco ka abaka, Bigitana kede Teresi, abwocin are kame oudo daro ekeko kame donyo i agolai ka abaka oko bin doko ger di kiko iiko tam arac me neko Abaka Sereses.

²²Do Modekai oko ngeno kop gi nono, di en eko waco ne Esita abaka adako, di Esita oko waco ne abaka kop nono di ewaco ne be Modekai en kongeo iik gi nono.

²³Abaka bin oko mino kongingico kop nono; kakame koudo kede be kop nono tie me ateni, bin oko tweno ngut cuo nogo di oko liero gi paka to. Abaka bin oko mino kowandiko kop noni di en etie neno i itabu amako kope me ajakanut mere.