Read kumam Esita 3 Bible Online

Esita 3 - kumam bible

Esita 3

¹Ingei kare moro, Abaka Sereses oko mino icuo anyinge Kaman wot ka Kamedata ruom amalo me bedo ngadwong me jotel me apugan. En oudo ebedo akwar Agag.

²Abaka oko mino cik be poore jotic mege dedede mi Kaman wor di kiriondiko piny kede di kiluro ne wi gi. Jo dedede oko donyo timo kamanono, kwanyo Modekai kenekene en oko dagi.

³Jotic ace me ka abaka oko penye pinyo komio en edagi lubo cik kame abaka omio;

⁴gin kiko bedo ngangao en buli ceng pi eda timo kamanono, do en eko dagi di ewaco negi be, “Ango abedo Eyudayat.” Gin kiko tero kop nono ne Kaman pi neno ka kop ka Modekai twero dong kamanono.

⁵Kakame Kaman oneno kede be Modekai oudo likame riondiko akadi luro i nyime pi mine wor, en eko doko ger adikinicel.

⁶Kakame en eniang kede be Modekai oudo obedo Eyudayat, en eko paro pi neko Modekai ribo kiton Iyudayan dedede. En eko timo iik me neko Iyudayan dedede i ajakanut ka Sereses lung.

⁷I mwaka me tomon kiwie are me apugan ka Sereses, i duwe me Nisan, en duwe me agege, Kaman oko mino kouco alulu (kolwonge be purim) pi mito udo ceng kopoore kede duwe kopoore me cobo iik nono. Alulu bin oko mako ceng me tomon kiwie adek me duwe me Adar, en duwe me tomon kiwie are.

⁸Kaman oko waco ne abaka be, “Tie jo me ateker moro kosarakin i ajakanut ni dedede, doko kitie i adulion dedede. Gin kitie kede itok kame pat kede itok me jo me atekerin apat, doko da gin likame kilubo iswilia ka abaka; aso likame eber nin kanyakino bedo kede gin.

⁹Aso kame etie gikame yomo cunyi, in abaka, adwong koto iwoto iswil me neko gi. Ka in itimo kamanono ango abino keto siliba akalamo kilo tutumia tol adek kede ot ongwon (340,000) i dero me kano lim me abaka pi tic kede gi i kop amakere kede apugan me ajakanut noni.”

¹⁰Abaka oko kwanyo mwola mere ki cinge, mwola kobedo alama meren me abaka, di eko mine but Kaman ngakwor me Iyudayan, en wot ka Kamedata, di ebedo akwar Agag.

¹¹Abaka oko waco ne be, “Jo kede sente gi obedo megi; in tim kede gi gikame in ineno be ber nin.”

¹²Aso, i ceng me tomon kiwie adek me duwe me agege, Kaman oko lwongo ikalanin di eko mino gi cik pi wandiko cik kame kowoto, i leb kede i egere me iwandik dedede kame kotio kede i ajakanut gi nono, di oko bino cwacwao gi but jopug, jotel, kede jotic adongo i adulion dedede. Baluwan nogo oudo kowandiko kede nying Abaka Sereses di oko dongo iye alama mere me abaka.

¹³Di do oko cwano jo tero baluwan nogo i adulion dedede me ajakanut. Baluwan nogo oudo mio cik me neneko kede me tieko Iyudayan dedede, adongo kede atino, mon kede idwe, i ceng acel, en ceng me tomon kiwie adek me duwe me tomon kiwie are, en duwe me Adar. Oudo kopoore ngongolo gi abongo cuny me kisa, di oko tero jamini gi.

¹⁴Kope kame tie i yi baluwan nogo oudo kopoore mino jo dedede me adulion dedede ngeno, tetekeny kibed di kiikere pi ceng nono.

¹⁵Jo kame oudo tero baluwan oko lubo cik kame abaka omio di kiko ot awakawaka tero baluwan, di oko somo cik nono ne jo dedede me bomba me Susa. Di do abaka kede Kaman oko bedo piny kidonyo amata karacel, di do oudo wi jo me bomba otieko totolun.