Read kumam Esita 4 Bible Online

Esita 4 - kumam bible

Esita 4

¹Kakame Modekai oniang kede gi dedede kame kotimo, en eko nyinyilo igoen mege pi cwercuny, di eko ngapo epuko, kede eko puco buru i wie, di eko donyo ot i dier bomba di eboroboro koko.

²En eko ot paka i erute me paco ka abaka; en likame eko donyo i paco pien likame oudo koyei ne jo kame ngapo ipukoi donyo kunono.

³I adulion dedede kame oudo komio jo ongeo kiye cik kame abaka oudo owoto, Iyudayan oudo tie kede iturur adwong, di kikanyo kec kede di kikok kede di kiparere, di jo atot kikom gi oudo ngapo ipukoi kede di kibuto i buru.

⁴Kakame anyira koudo gwoko Esita kede abwocin oko ot waco ne kede gikame Modekai oudo tie timo, cunye oko dubere; en eko cwano ne Modekai igoen pi ngapo akaka ngapo epuko, do Modekai oko dagi igoen nogo.

⁵Di Esita oko lwongo Katak, ngat acel kikom abwocin ka abaka, kame oudo koyero ne pi konye, di eko cwane but Modekai pi neno nyo koudo tie timere kede pinyo.

⁶Katak oko ot ooko but Modekai kakaler me bomba i nget erute me paco ka abaka.

⁷Di Modekai oko waco nen gi dedede kotimere ne, kede wel sente kame Kaman ocikere pi keto i dero me kano lim ka abaka pi muducaro Iyudayan.

⁸Modekai doko da oko mine acel kikom baluwan kame oudo kocwao ki Susa, kame mio cik be poore muducaro Iyudayan. Modekai oko kwane pi tero ne Esita baluwa nono di eko tatamo ne kop nono, di eko kwano Esita pi ot but abaka pi kwane pi bedo kede kisa i kom Iyudayan.

⁹Katak oko timo kamanono,

¹⁰di Esita oko dwoke kede kop but Modekai be,

¹¹“Iswil tie amako donyo i diakal me yie pi neno abaka; jotic mege dedede kede jo mege ngeo iswil noni. Ngatamoroni kame donyo tetek ot neno abaka di likame kolwonge alwonga, ngat nono kopoore neko. Kwanyo kenekene ka abaka ocwao ebela mere me saabu di dano nono oko mako, manono en kamio dano nono bwot. Do ango nataman atieko duwe acel di pwodi likame abaka olwonga doko pi ot bute.”

¹²Kakame Modekai owinyo kede kop kame Esita ocwao,

¹³Modekai oko waco ne jo nogo pi dwoko ne Esita kop kame waco be, “Kur ipar be pi kite kame in itie kede i paco ka abaka, manono bino mini ibwot kikom Iyudayan ace apat.

¹⁴Ka in iling alinga i kare kacal bala man, Iyudayan bino udo alako kame wok ki karamoro ace, do in kede jo me ot ka papa ni ibinunu to. Ngai bo ngeo, cengemogo bin komii ruom me abaka adako pi timo gimoro i kare noni!”

¹⁵Di Esita oko dwoko ne Modekai kop be,

¹⁶“Oti icok Iyudayan dedede atie Susa karacel, di ikounu kanyo kec di ilegunu pira. Kur icamunu gimoro akadi mato gimoro pi ceng adek kede iwor da adek. Ango karacel kede anyira kame konya wada obino timo kamanono. Ingei manono ango abino ot but abaka tetek bed bala iswil likame yei; ka ango abino to pi timo kamanono, ango do ayei.”

¹⁷Modekai oko ot di eko timo gi dedede kame Esita oudo owaco ne.