Read kumam Esita 5 Bible Online

Esita 5 - kumam bible

Esita 5

¹I ceng me adek Esita oko ngapo igoen mege me abaka adako di eko ot cungo i diakal me yie me paco ka abaka, di epimere kede agola alac kame kom ka abaka me ajakanut tie iye. Abaka oudo tie bedo i kom mere me ajakanut di epimere kede ekeko.

²Kakame abaka oneno kede Esita abaka adako di etie cungo i diakal, cunye oko bedo yom i kome, di eko mako ebela mere me saabu di eko cwano cinge pi en mulo, Esita oko yito malo kunono di eko mulo wi ebela nono.

³Abaka oko waco ne be, “Nyo inonono, Esita? Nyo kame itie mito? Wac nango gi nono, akadi di dul me ajakanut nango ango abino mini.”

⁴Esita oko dwoko ne be, “Adwong me awora, ka cunyi yom iye, ango akwao be in kede Kaman ibinunu i ebaga kame ango aiko piri iwor atin.”

⁵Abaka oko mino cik be ter Kaman bute awakawaka, tetekeny kioti i ebaga kame Esita oudo oiko. Aso abaka kede Kaman oko ot i ebaga ka Esita.

⁶Kakame oudo kitie do mato kede bwini, abaka oko penyo Esita be, “Wac na gikame in imito di ango ako bino mini. Ango abino mini gikame ipenyo, akadi bed bala ipenya pi mini dul me ajakanut na.”

⁷Esita oko dwoko be,

⁸“Ka ango ayomo cunyi in abaka, kede ka cunyi yom pi cobo gikame ango akwai, ango atie mito be in kede Kaman diki bobo ibedunu wele na i ebaga ace kame ango atie iiko ne wu, di do ango ako bino waco ni gikame ango amito.”

⁹Kakame Kaman oyai kede ki ebaga cunye oudo yom di tam mere ber. Do kakame en eko neno Modekai di tie cungo i erute me paco ka abaka, di Modekai oko dagi cungo malo kede nyuto ne wor kakame en oudo etie beo kede, Kaman oko doko ger ne Modekai.

¹⁰Do en eko didio gero mere di eko ot paco. Kakame etuno kede paco en eko cwano kop kolwongo jowote di eko lwongo dako mere Seresi da but gi.

¹¹En eko donyo wakere negi pi twon abar mere, pi awobe atot kame oudo etie kede, pi kite kame abaka okobe kede i tic me ruom amalo, kede pi kite kame abaka omio pire obedo tek kede kalamo jotic icegun.

¹²En eko meede kede yamo be, “Do likame mano kenekene, ango kenekene en kame Esita abaka adako olwonga i ebaga mere pi bedo kede abaka. Doko elwongo wa pi dok i ebaga ace diki.

¹³Do magi dedede likame timo nango bero moro tek di pwodi ango atie neno Eyudayat Modekai tie bedo i erute me paco ka abaka.”

¹⁴Dako mere Seresi kede jowote oko waco ne be, “Mi ger gi me deno jo, di diki odiko iko waco ne abaka pi mino kodei Modekai iye; di do in iko bino upere kede abaka i ebaga di cunyi yom.” Kaman oko tamo be manono oudo obedo tam aber, aso en eko mino kogero gi me deno jo.