Read kumam Esita 7 Bible Online

Esita 7 - kumam bible

Esita 7

¹Aso, abaka kede Kaman bin oko ot camo ebaga kede Esita

²tien me are. Di gin bin kitie mato bwini, abaka bobo oko penyo Esita be, “Dako na Esita, nyo kame in imito be atim ni? Wac na di ango ako bino mini. Ango abino mini akadi kiton dul me ajakanut na.”

³Di dako mere Esita oko gamo be, “Okwe abaka, ka ango ayomo cunyi, kede ka in iyei, ango akwao be weka kur neka kede jo na da wek kur konek gi. Manono en kwac na.

⁴Pien ango kede jo na kotieko cato wa be miero komuducaro wa, konek wa di oko tieko wa pitipit. Ka koto oudo ocato wa bala ipasoi kenekene, ango koto oudo aling di likame ako loli; do likame tie ngakwor moro kame karuno culo wang kei noni but abaka.”

⁵Di Abaka Sereses oko penyo dako mere Esita be, “Ngai inonono, doko etie tuai, en ngat kame eparo be etwero timo akodi gi noni?”

⁶Esita oko gamo be, “Ngakwor wa, nganek wa, obedo Kaman icuo arac noni!” Lworo atek oko mako Kaman i nyim abaka kede dako mere.

⁷Abaka oko yai ki ebaga kede twon gero di eko ot i poto me paco mere, do Kaman oko dong ngangao Esita pi lako kuo mere, piento en oudo eneno be abaka oudo otieko moko tam mere pi neke.

⁸Kakame abaka oko dwogo kede i ot me ebaga, eudo Kaman oudo inonono inonono opoto i kom kame Esita oudo tie bedo iye pi kwano kisa kibute. Di abaka oko waco be, “Benyo, kom en etwero suro akadi dako na i nyima, doko i oda?” Kakame abaka owaco kede kop noni, oyotoyot di jotic mege umo wi Kaman.

⁹Di Karabona, ngat acel kikom abwocin ka abaka oko waco be, “Neningo, gikame Kaman oudo oiko me deno Modekai ngat kolako kuo ka abaka ica cungo i paco mere. Boro mere malo tie mita ot are kiwie are!” Abaka oko waco be, “Otunu imiunu gi nono dee.”

¹⁰Aso, gin kiko liero Kaman di kiko dene i gikame en oudo eiko me deno Modekai. Di do gero ka abaka oko kwei.