Read kumam Esita 9 Bible Online

Esita 9 - kumam bible

Esita 9

¹Aso, i duwe me tomon kiwie are, en duwe me Adar, i buto duwe tomon kiwie adek, en oudo ebedo ceng kame oyaro cobo timo kede cik ka abaka. Ceng nono en kame jokwor me Iyudayan oudo tie kede gen me bedo kede twer i kom gi iye, do oudo kotieko loke edoko ceng kame Iyudayan bino bedo kede twer i kom jokwor gi.

²Cenge nono Iyudayan oko cokere i bomban kame oudo kitie iye in adulion dedede kame Abaka Sereses bin pugo, pi yi kede ngatamoroni kame bino mito suro gi. Do jo dedede oudo tie kede lworo i kom gi omio oudo likame tie ngatamoro kame oudo twero kanyakino ot yi kede gi.

³Jotel me adulion dedede, jopug kede jo kame bin cungo ne abaka oko gango Iyudayan pien gin oudo kilworo Modekai.

⁴Pien Modekai oudo odoko dano kame pire tek i paco ka abaka, doko nyinge oudo odoko iruo i adulion dedede di twer mere meede ameda.

⁵Aso, Iyudayan oko neneko jokwor gi kede epima, kingongolo gi, di kiko muducaro gi; gin oudo kiko timo ne jokwor gi bala kame cuny gi mito.

⁶I Susa, bomba adwong, Iyudayan bin oko neko jo tol kany (500).

⁷Gin bin kiko neko da Parasandata, Dalipon, Asapata,

⁸Porata, Adalia, Aridata,

⁹Paramasita, Arisai, Aridai, Baisata,

¹⁰gin awobe ka Kaman wot ka Kamedata, ngakwor me Iyudayan. Do gin bin likame kiko yako jame.

¹¹Wel me jo kame bin oko neko i Susa oko mino but abaka cenge nono.

¹²Abaka oko waco ne dako mere Esita be, “I Susa kenekene Iyudayan otieko neko jo tol kany, kiton awobe tomon ka Kaman. Nyo do kame nat kiko timo i adulion dedede kame ango apugo! Benyo, tie bobo gimoro ace kame in nataman imito? In wac nango di ango ako bino mini.”

¹³Esita oko gamo be, “Ka manoni yomo cunyi abaka, ango akwai iyei ne Iyudayan atie Susa diki bobo gin kitim gikame ceng atin in iko yei negi timo. Doko mi cik di oko kelo liele tomon me awobe ka Kaman di oko liero gi i gikame kodeo kode jo.”

¹⁴Abaka oko mino cik be miero tim kop noni. Cik noni bin oko mino i Susa, di oko liero liele tomon me awobe ka Kaman.

¹⁵Iyudayan kame bin tie Susa oko da cokere i buto duwe tomon kiwie ongwon me duwe me Adar, di gin kiko neko jo tol adek (300) i Susa; do gin likame bin kiko yako gimoro.

¹⁶Iyudayan kame bin tie i adulion apat da oko gida cokere pi yi pi gwoko kuo gi. Gin kiko lako kuo gi ki cing jokwor gi kede neko jo tutumia ot kanyaare kiwie kany (75,000) kame bin dagi gi. Do gin likame bin kiko yako gimoro.

¹⁷Manoni bin otimere i buto duwe tomon kiwie adek me duwe me Adar. I ceng alubo mere, i buto duwe tomon kiwie ongwon, gin kiko wei di kiko mino ceng nono obedo me tedo ebaga kede me ilel.

¹⁸I buto duwe tomon kiwie kany Iyudayan kame bin tie Susa oko wei di gin kiko tedo ebaga, ingei neko jokwor gi i buto duwe tomon kiwie adek kede i buto duwe tomon kiwie ongwon.

¹⁹Manoni en komio Iyudayan kame bedo i calere gwoko buto duwe tomon kiwie ongwon me duwe me Adar bala ceng me ilel, ceng me tedo ebaga kede me mino giamia me cam but jo icegun.

²⁰Modekai bin oko wandiko gi kotimere nogi, di eko cwano baluwan but Iyudayan dedede kame bin tie i adulion dedede kame Abaka Sereses pugo, adulion kiyapiyapi kiton me tenge,

²¹di ewaco negi pi gwoko buto duwe tomon kiwie ongwon kede tomon kiwie kany me duwe me Adar bala ceng me wei buli mwaka.

²²Ceng nogi en kame bin Iyudayan oudo kede wei ki cing jokwor gi. Duwe noni en kame bin oko loko iye cwercuny kede iturur me Iyudayan oko doko kare me ilel kede me yomcuny. Gin bin oko waco negi pi mino kare noni bedo me tedo ibagai kede mino giamia me cam but jo icegun kede but jocan.

²³Aso, Iyudayan bin oko lubo kop kame Modekai owaco di kiko donyo tedo ebaga nono buli mwaka bala itok.

²⁴Kaman wot ka Kamedata, akwar Agag doko en ngakwor me Iyudayan, bin ouco alulu pi moko ceng me neko Iyudayan; en oudo etimo iik me muducaro gi pi tieko gi pitipit.

²⁵Do Esita bin oko ot but abaka di eko kwane pi lako kuo me Iyudayan. Abaka bin oko wandiko cik be iik arac kame Kaman oudo oiko i kom Iyudayan miero kolokere timo i kom en, kede be Kaman kede awobe mege miero kolier gi i gikame kodeo kede jo.

²⁶Manono en komio kolwongo ceng me wei nogo be Purim, pien kiyai ki alulu kame bin kolwongo be Purim. Aso, pi baluwa ka Modekai kede pi gi dedede kame bin otimere negi,

²⁷Iyudayan bin oko mino manoni obedo bala iswil kame mako gin, ikwae gi, kede ngatamoroni kame bino lokere di eko doko Ngayudaya. Iswil nono waco be buli mwaka i kare kame kotieko moko, ceng are nogi gin kibino gwoko bala kame Modekai owaco.

²⁸Ceng are nogi kopoore yutuno di oko gwoko gi i kare me lwak dedede, i diakale dedede, i adulion kede i bomban dedede. Iyudayan likame miero wek gwoko ceng nogi me Purim, akadi ikwae gi da likame miero wek tedo ebaga me yutuno gi.

²⁹Abaka adako Esita, nyar ka Abikail, karacel kede Modekai, oko eda wandiko baluwa kame moko kitek kop me baluwa me are kame Modekai oudo owandiko amako Purim.

³⁰Baluwa noni bin oko cwano but Iyudayan dedede kame bin tie i adulion tol acel kede ot are kiwie kanyaare (127), kame bin abaka Sereses pugo. Baluwa noni bin kwao ne Iyudayan mulem kede bedo abongo elol moro,

³¹kede emio gi cik be gin kede ikwae gi miero kigwok ceng me Purim i kare kame kotieko moko, bala kame gin kitieko gamo kede iswil me kanyo kec kede me koko jo oto. Cik noni Modekai kede Esita en kame bin omio.

³²Cik kame Esita omio en kame bin omoko iswilia me Purim, di oko wandiko en piny i itabu.