Read kumam Yai 10 Bible Online

Yai 10 - kumam bible

Yai 10

¹Di Rwot oko waco ne Musa be, “Ot but Parao. Ango atieko mine ebedo ngaepali, en karacel kede jotic mege, me wek ango atim giaura i diere gi,

²tetekeny itwerunu bino waco ne idwe kede ikwae wu epone kame ango amio kede jo me Misiri odoko kede gituko na, kede giaura kame ango atimo i diere gi. Manono bino mino gi kingeo be ango en Rwot.”

³Aso, Musa kede Aaron oko ot but Parao di kiko waco ne be, “Rwot, Rubanga me Iburanian owaco be, ‘Ibino tero kare arom kamene di pwodi likame iturere i nyima? Wek jo na yai, tetekeny kioti kiwora.

⁴Pien ka in idagi weko jo na yai, diki ango abino cwano obonyo i lobo kame in ipugo.

⁵Gin kibino umo lobo pukupuk. Kibino camo gi dedede kobwot likame akako odudubo, akadi kiton yen kame tie obar da.

⁶Gin kibino pong i yi ude ni kede me jotic ni, kede i yi ude me jo dedede me Misiri. Manoni bino bedo gikame jonywal wu kede joakwari likame oneno cako gin bedo kuo i wi lobo.’ ” Musa oko lokere di eko yai tenge kibut Parao.

⁷Jotic ka Parao oko penye be, “Lono bino bedo mino wan peko paka tuno awene? Wek jo me Isirael yai oti, tetekeny kioti kiwor Rwot Rubanga gi; benyo, pwodi likame iniang be lono otieko kelo peko i lobo me Misiri?”

⁸Oko dwoko Musa kede Aaron but Parao di Parao oko waco negi be, “Otunu iworunu Rwot Rubanga wu! Do alu kikokome en kame bino ot?”

⁹Musa oko waco be, “Wan dedede obino ot, joatino kede joadongo; wan obino ot kede awobe wa kede anyira wa kede leini wa, piento miero wan ooti otim ebaga me woro Rwot.”

¹⁰Parao oko waco negi be, “Ka ango aweko wu iotunu kede mon kede idwe wu, udo ateteni Rwot tie kede wu. Etie kakaler be wun itienu kede iik moro arac i tamu.

¹¹Mano likame timere! Cuo kenekene en aoti woro Rwot ka manono en gikame wun itienu mito.” En eko riamo gi tenge ki nyime.

¹²Rwot oko waco ne Musa be, “Riei badi di imako ebela ni i wi lobo me Misiri, me wek obonyo bin iye di kiko camo giatui dedede kame oudo obwot likame akako odudubo.”

¹³Aso, Musa oko rieno bade i wi lobo me Misiri di ebela mere tie i cinge, di Rwot oko mino yamo me tetu kide obuko piny yuluyul kede iwor kiakia; kakame piny oko ru kede, yamo me tetu kide nono oudo obwoto obonyo.

¹⁴Obonyo obino di kiko raramun kabedere dedede me Misiri; twon ekodet me obonyo kalikame pwodi lem ngatamoro oneno, doko epone mere likame bino medo nenere.

¹⁵Kiumo wi lobo me Misiri dedede, omio lobo oko doko col acola; gin kiko camo pote kede anyakini dedede kame akako oudo oweko, likame tie pote, yat amoto giapita moro kame oko dong i Misiri.

¹⁶Parao oko lwongo Musa kede Aaron awakawaka di eko waco negi be, “Atieko dubo i nyim Rwot Rubanga wu kede but wuda.

¹⁷Sasirunu ango kicel bobo di ikounu kwano Rwot Rubanga wu ekwany tenge alola arac noni ki buta.”

¹⁸Musa oko yai kibut Parao di eko ot lego but Rwot.

¹⁹Rwot oko mino yamo owilun buko wok ki tetu tim, di yamo nono oko kolo obonyo paka i Nam Akwar; likame tie obonyo moro akadi acel oko dong i lobo me Misiri.

²⁰Do Rwot oko mino Parao obedo ngaepali, di eko dagi ne jo me Isirael yai.

²¹Rwot oko waco ne Musa be, “Ting cingi malo tetekeny colo bed tie i lobo me Misiri dedede, ebed colo acucucuc.”

²²Musa oko tingo cinge malo di colo acucucuc oko bedo tie i lobo me Misiri pi ceng adek.

²³Dano oudo likame twero neno dano ngawote, di likame tie ngatamoro oko twero nyiko karamoro i ceng nogo; do jo dedede me Isirael oudo tie kede lero kakame kibedo iye.

²⁴Parao oko lwongo Musa di eko waco ne be, “Otunu iworunu Rwot. Otunu akadi kede mon kede idwe wu da; do romini, diegi kede dok wu miero dong kan.”

²⁵Do Musa oko waco be, “Miero imi wada leini kame wan obino ot mino kede wango bala giayala awanga but Rwot Rubanga wa.

²⁶Wan miero oter leini wa, likame tie acel moro kame bino dong, pien miero wan oyer mogo abeco kikom gi kame obino tic kede me woro Rwot Rubanga wa. Doko da likame wan otwero ngeno leini mege en kame wan obino tic kede gi me woro Rwot Rubanga wa kwanyo di wan otieko tuno kunono.”

²⁷Rwot oko mino Parao obedo ngaepali, omio likame oudo etie yei ne jo me Isirael yai.

²⁸Parao oko waco ne Musa be, “Irwa tenge ki nyima! Kur iyei na neni doko i wanga, pien i ceng kame ango abino neni doko kede i wanga, ibino to.”

²⁹Musa oko dwoko be, “Iyamo kakare! Likame ango bobo abino neno wangi.”