Read kumam Yai 15 Bible Online

Yai 15 - kumam bible

Yai 15

¹Di do Musa kede jo me Isirael oko wero ne Rwot wer ni be: “Abino wer ne Rwot, piento en etieko udo dwongo pi bwono jokwor mege; eonyo asigiran kede jo kame ringo kede gi i yi nam.

²Rwot mia teko kede twer; en kame elaka. En Rubanga na, abino pako nyinge; en Rubanga ka papa na, abino mine dwongo.

³Rwot obedo ngayi; nyinge obedo Rwot.

⁴“En eonyo cabalan ka Parao kede isirikalen mege i yi nam; elwinyo isirikalen mege kame kouro i yi Nam Akwar.

⁵Pii atut oumo gi; gin kilwiny i dud nam bala engaro.

⁶Cingi tetu cam, Okwe Rwot, tek adikinicel; cingi tetu cam onyinyito jokwor.

⁷In itieko udo twon dwongo pi bwono jokwor ni; in ijalakino gero ni oko wango gi bala yugi me arienge.

⁸Wei kame wok ki umi okuto pii oko cokere karacel; pii oko bedo ikumemei bala atukit; pii atut kame tie i dier nam oko cungo ineno bala erumakin.

⁹Jokwor owaco be, ‘Obino wapo gi di oko mako gi, obino popoko gikame oyako kibut gi bala kame cuny wa mito. Obino kwanyo ipimai wa di oko neneko gi.’

¹⁰Do wei nin oko kuto nam, di nam oko umo gi; gin kiko lwiny bala kidi apek i twon pii.

¹¹“Okwe Rwot, rubanga mene en acal bala in? Ngai kame cal bala in, ngat kacil me aura, ngat kame kolworo, kame timo giaura?

¹²In irieo badi tetu cam, di lobo oko mwonyo jokwor wa.

¹³Pi amara ni kalikame lokere, in iko telo jo ni kame ilako; in iko telo gi di igwoko gi kede teko ni tuno i kabedo ni kacil.

¹⁴Atekerin apat owinyo kop noni di kom gi oko donyo miel; lworo oko bwono jo me Pilistia.

¹⁵Lworo atek omako ijakai me Edom; jotel me Moab kom gi oko donyo miel amiela; jo dedede me Kanan kom gi oko to.

¹⁶Lworo kede inyonyong omako gi. Gin kineno teko ni, Okwe Rwot, di kiko cungo abongo yangere bala kidi naka tuno di jo nin dedede otieko kato, gin jo kame in igonyo ki bedo ipasoi.

¹⁷In itero gi di iko cibo gi i wi moru nin bala yat kame kopito, en kakame in imio odoko kabedo ni, tempulo kame in kikomi en igero.

¹⁸Rwot bino bedo pug ikar kede ikar.”

¹⁹Jo me Isirael oko ngolo nam di kibeo i kakatek. Do kakame asigiran ka Parao kede cabalan mege kede jo kame ringo kede gi odonyo kede i yi nam, Rwot oko dwoko pii me nam omwonyo gi.

²⁰Anabi Miriamu, amin me Aaron oko mako ayekeyeke i cinge, di mon dedede ace da oko mako ayekeyeke i cing gi, di kiko donyo lube di kimielo.

²¹Miriamu oko cako negi wer be, “Werunu but Rwot, piento en etieko udo dwongo pi bwono yi; eonyo asigiran kede jo kame ringo kede gi i yi nam.”

²²Musa oko mino jo oyai ki Nam Akwar di eko telo gi ot i wi tim me Sur. Gin kiko ot sapali me ceng adek i wi tim abongo udo pii.

²³Di do kiko tuno kakame kolwongo be Mara, do likame kiko sobolo mato pii me kanono pien oudo ekec. Manono en komio oudo kolwongo kanono be Mara.[6]

²⁴Di jo oko bedo kede ingungur but Musa di kiwaco be, “Wan obino mato nyo?”

²⁵Musa oko kok but Rwot di Rwot oko nyuto ne yat moro, en eko uco yat nono i yi pii, di pii oko doko ber me amata. Rwot oko mino gi iswilia, di en eko tamo gi ki kuno.

²⁶En ewaco negi be, “Ka ibinunu winyo dwana, ango Rwot Rubanga wu, di ikounu timo gi kopoore i nyima, di ikounu lubo cik na kede iswilia na, likame abino mino tuwo moro mako wu bala tuwo kame oudo amio omako jo me Misiri. Ango en Rwot, ngat kame cango wu.”

²⁷Di do kiko tuno Elim, kakame oudo tie iye ataneko tomon kiwie are kede tugere ot kanyaare; gin kiko gero kimere gi kuno i nget pii.