Read kumam Yai 17 Bible Online

Yai 17 - kumam bible

Yai 17

¹Jo dedede me Isirael oko yai ki wi tim me Sin, di kiko donyo ot di kikokobo akokob, bala kame oudo Rwot ociko negi. Gin bin kiko gero kimere gi Repidim, do pii me amata oko bwono gi i kanono.

²Jo oko donyo lok kede Musa di kiwaco ne be, “Mi wa pii me amata.” Musa oko waco negi be, “Itienu lok keda pinyo? Pinyo komio itienu tamo Rwot?”

³Do orio oudo oneko jo twatwal omio kiko meede ngunguro but Musa di kiwaco ne be, “Pinyo komio ikwanyo wa ki Misiri di iko kelo wa kan to orio, wan karacel kede idwe wa kede leini wa?”

⁴Musa oko kok but Rwot be, “Abino timo jogi nadi? Gin kitieko iikere pi didipo ango kede kide.”

⁵Rwot oko waco ne Musa be, “Kwany joadongo mogo me Isirael iupere kede gi iko ot anyim me jo; mak ebela kame bin ijwato kede pii me ecilet me Nail da i teri.

⁶Ango abino cungo i nyimi i moru me Sinai. Di in iko jwato lela di pii me amata ko bino wok kiye ne jo.” Musa oko timo kamanono i nyim joadongo me Isirael.

⁷En eko cako nying kanono be Masa[9] kede Meriba,[10] pien jo me Isirael oudo ongunguro but Rwot di kitame kakame kiwaco kede be, “Benyo, Rwot tie kede wa arabo li?”

⁸Jo me Amalek oko ot suro jo me Isirael i Repidim.

⁹Musa oko waco ne Yosua be, “Yer ne wa jo mogo ot yi kede jo Amalek diki. Ango abino cungo i wi moru di amako ebela ka Rubanga i cinga.”

¹⁰Yosua oko timo bala kame Musa owaco ne di eko yi kede jo Amalek, di oudo Musa, Aaron kede Kur oyito malo i wi moru.

¹¹Kame bad Musa oudo okiar malo, jo me Isirael oudo bwono jo Amalek; do ka oudo edwoko bade piny, jo Amalek oudo ko bwono jo me Isirael.

¹²Do bad Musa oko jony, omio gin kiko kelo ne kidi di eko bedo i wie. Aaron kede Kur oko donyo mako bade di kikiarao gi malo, ngat acel bade tetucel kede ngat ocelu da bade tetucel; manono oko mino bad Musa obedo di oriere paka tuno ceng donyo.

¹³Manono bin oko mino Yosua obwono jo Amalek atwal atwala.

¹⁴Rwot oko waco ne Musa be, “Wandiko gikame otimere noni i itabu pi mino jo iyutun. Wac ne Yosua be ango abino wearo jo Amalek atwal atwala ki dud ceng.”

¹⁵Musa oko gero alutari di eko cako nyinge “Rwot en imendera na”.

¹⁶En ewaco be, “Cinga omako imendera ka Rwot; Rwot bino yi kede jo Amalek pi kare lung.”