Read kumam Yai 2 Bible Online

Yai 2 - kumam bible

Yai 2

¹I kare nono i cuo me ot ka Lebi oko nyomo dako Ngalebi,

²di dako nono oko nywalo atin. Di bin en eneno be enywalo atin awobi acil, en eko kane pi dwete adek.

³Kakame eneno kede be oudo likame bobo etwero meede kede kane, en eko kwanyo ebukit kame kotimo kede aladoi di eko puce kede emina tetekeny kur pii tuce. En eko cibo atin i yie di eko ot rwake i otol me dog ecilet.

⁴Amin me atin nono oko cungo i kakabor pi neno gikame oyaro timere ne.

⁵Nyar ka Parao oko ot pi bol i ecilet, di anyira akonye oko ber donyo latao di kiririo dog ecilet. En eko neno di ebukit tie i dier otol di eko cwano nyako ngakonye pi ot kwanye.

⁶Kakame en eyabe kede, en eko neno atin tie iye; atin oudo tie koko, di kisa oko mako nyar ka Parao i kome. En ewaco be, “Miero di man obedo atin me Ngaeburania.”

⁷Amin me atin nono oko penyo nyar ka Parao be, “Aoti akel ni dako Ngaeburania moro bin gwok ni atin noni?”

⁸En eko dwoko be, “Ebo.” Aso, nyako nono oko ot di eko kelo toto me atin nono kikokome.

⁹Nyar ka Parao oko waco ne dako nono be, “Teri atin noni ioti igwok na, ango abino culi.” Aso, dako nono oko tero atin di eko ot gwoke.

¹⁰Kakame atin odongo kede, en eko tere but nyar ka Parao di nyako nono oko game pi bedo bala wode. En eko cako nyinge Musa, piento en ewaco be, “Ango awote ki pii.”

¹¹ Ceng moro acel di Musa otieko dongo, en eko wok ki paco ka Parao eko ot roto jo mege, di eko neno epone kame oudo kotie dino gi kede timo tic atek. En eko neno di dano me Misiri tie bungo Ngaeburania moro, dano acel kikom jo mege.

¹²En eko ngongolo piny, kakame eneno kede be likame ngatamoro oudo tie nene, eko neko dano me Misiri nono di eko kano kome i asinge.

¹³Oru mere en doko eko dok kuno di eko neno Iburanian are di kitie yi; en eko waco ne ngat koudo rac kibut gi be, “Pinyo komio itie bungo Ngaeburania wadu?”

¹⁴Icuo nono oko dwoko ne be, “Ngai koketi bedo ngapug kede ngangolkop wa? Benyo, imito neka bala kame ineko kede dano me Misiri?” Lworo oko mako Musa di eko tamo kene be, “Ateteni kotieko ngeno kop noni.”

¹⁵Kakame Parao oko winyo kede kop nono, en eko tamakino pi neko Musa, do Musa oko lwi eringo ot bedo i lobo me Midian. Ceng moro acel Musa oudo tie bedo i dog atan,

¹⁶di anyira kanyaare ka ngasaseredoti me Midian oko bino pi koto twomo pii di kiweko i atuba, tetekeny diegi kede romini ka papa gi mat pii.

¹⁷Do jokwat mogo oko bino di kiko riamo gi tenge, do Musa oko yai di eko konyo gi di eko mino diegi kede romini omato pii.

¹⁸Kakame gin kidok kede but papa gi Yesero, en eko penyo gi be, “Pinyo komio tin wun isunyunu dwogo?”

¹⁹Gin kiko dwoko be, “Icuo moro me Misiri en okonyo wa ki cing jokwat; doko da en eko twomo pii di eko mino diegi kede romini wa omato.”

²⁰En eko penyo anyira mege be, “Icuo nono tie tuai? Pinyo komio iwekenu kuno? Otunu ilwongenu ebin enywak kede wa cam.”

²¹Aso, Musa oko yei ot bedo paco nono, di Yesero oko mino Musa nyare anyinge Sipora pi nyomere kede.

²²Sipora oko nywalo atin awobi, di Musa oko cako nyinge Geresom, piento en ewaco be, “Ango abedo ngakumbor i lobo noni.”

²³Ingei mwakini mogo, Parao me Misiri oko to. Jo me Isirael oudo pwodi tie meede cur kede peko kame oudo kitie iye bala mabus, di kikok pi kony. Di gin oudo kitie bala mabus kamanono, koko gi oko tuno but Rubanga.

²⁴Rubanga oko winyo cur gi di eko yutuno isikan kame oudo etimo kede Aburaam, Isaka kede Yakobo.

²⁵Rubanga oneno peko me jo me Isirael di eko paro pirgi.