Read kumam Yai 25 Bible Online

Yai 25 - kumam bible

Yai 25

¹Rwot oko waco ne Musa be,

²“Wace jo me Isirael pi mina giamia. Gam giamia dedede kame ngat acelacel bino kwanyo bala kame cunye tele kede.

³Mage en giamia kame in ibino gamo kibut gi: saabu, siliba, kede nyonyo buronsi;

⁴igoen ebululu ebululu, akwakwar, kede akwar kame kotimo kede yer me romini; igoen apwot kame meny, igoen kame kotimo kede yer me diegi,

⁵launi kame konyongo me romini kede imukulen ace; ibaon me yen kame kolwongo be akasia;

⁶mo me italan; jamini kame ngwece gi mit me nyalo mo me wir, kede odok adunya kame ngwe kur;

⁷kide me wel kame kolwongo be onik kede kide apat me wel kame kobino keto i kom epod kede i kom isau me kor.

⁸Jo poore timo nango Kabedo Kacil, tetekeny abed i diere gi.

⁹Timenu karacel kede jamini me yie dedede bala kame ango abino nyuto ne wu.”

¹⁰Rwot oko waco be, “Wace gi kitim sanduku kede ebao me yat akasia; boro mere bino bedo puti ongwon, laco mere puti are kede boro mere malo puti are.

¹¹In ibino puno yie kede ngee kede saabu kame kojililo, doko iko toko ngee kede saabu rimaro.

¹²Ibino timo alung ongwon me saabu di iko cibo gi i tiene ongwon, alung are tetucel kede are da tetucel.

¹³Ibino timo ibaon me yat akasia me yene, di iko puno gi kede saabu,

¹⁴iko rwako ibaon nogo i wang alung nogo i nget sanduku tuni tuni, me yene.

¹⁵Miero wek ibaon nogo bedi i alung nogo; kur wot gi tenge.

¹⁶Ibino keto i yie kide are abatal kame ango abino mini, kame kowandiko iye cik.

¹⁷“Tim kom me kisa[14] mere kede saabu kame kojililo; boro mere miero bed puti ongwon kede laco mere puti are.

¹⁸Tim cerubim are kede saabu; tet gi kede enyondo,

¹⁹acel i ajikini me kom me kisa tetucel, acel da tetuca mere. Tim gi di kitie kicel kede kom me kisa.

²⁰Ibino mino cerubim nogo yararo bwom gi kiko umo kom me kisa. Gin kibino nenere di nyim gi oluro neno kom me kisa.

²¹In ibino cibo kide abatal are kame ango abino mini i yi sanduku nono di iko cibo kom me kisa i wie.

²²Ango abino riamo kedi kanono, i wi kom me kisa nono, i dierediere me cerubim are kame tie i wie, di ako bino mini cik na dedede pi mino jo me Isirael.

²³“Ibino timo emesa kede ebao me yat akasia; boro mere poore bed puti adek, kede laco mere puti acel kede dul, kede boro mere malo poore bed puti are.

²⁴Ibino puno kome dedede kede saabu kame kojililo di iko toko ngete kede saabu rimaro.

²⁵Tim ne ebao kame gwako tiene rimaro, di laco mere rom kede yi cing dano, kede iko toko ebao nono kede saabu rimaro en.

²⁶Tim alung ongwon me saabu di iko keketo gi i isondana ongwon dedede, buli acel i tiene acel.

²⁷Alung kame korwako iye ibaon me yeno emesa kobino keto di iyapiyapi kede ebao kame rimaro tiene.

²⁸Ibino timo atekai me yat akasia di iko puno gi kede saabu, di oko tic kede gi me yeno emesa nono.

²⁹Ibino timo kede saabu suanin kede bakulin mege me dunyo odok angwe kur, kede da cupan kede ikopon mege me giayala amata.

³⁰Di iko bino keto mugati kame koyalo buta i wi emesa, di eko bedo tie iye nakanaka.

³¹“Ibino timo gicibo etala kede saabu kame kojililo. Ibino teto dude piny kede epir mere kede enyondo; ikopon mege kame gwako ature kede ature mege ibino teto ribere i kome.

³²Ebino bedo tie kede jange kanyape kame yai i ngete, adek tetucel doko adek tetu ocelu.

³³Ajange acelacel kikom jange kanyape nogo miero bed kede ikopon adek kame kotimo bala ature kede pote kame gwako ature kede ature iye.

³⁴I kor epir me gicibo etala bino bedo iye ikopon ongwon kame kotimo bala ature.

³⁵Kikom jange kanyape nogo, i dierediere me tien buli jange are, miero bed tie iye pote kame gwako ature acel i kor epir me gicibo etala.

³⁶Gicibo etala, karacel kede ajange mege kiton ature miero tet kede enyondo kikom saabu kame kojililo di kitie kicel.

³⁷Ibino timo ne italan kanyaare di iko keto gi di gin dedede kiliel kicaro anyim.

³⁸Makasi me kwanyo mac kede sinia mere kobino timo kede saabu kame kojililo.

³⁹Gicibo etala kede jamini mege nogi dedede bino mito saabu kame kojililo kame peko mere romo kilo ot adek kiwie kany.

⁴⁰Miero inen be itimo gi bala kame oudo anyuto ni i wi moru.”