Read kumam Yai 26 Bible Online

Yai 26 - kumam bible

Yai 26

¹Rwot oko waco ne Musa be, “Ger yi taberenakol kede isukan acil me poko agolai, isukan ameny tomon. Isukan nogo miero kotim kede ausin me erangi ebululu ebululu, akwakwar kede akwar; kobino kuno cal me cerubim i kom isukan nogo.

²Boro me esuka acelacel bino bedo mita tomon kiwie are kede laco mere bino bedo mita are; isukan dedede bino bedo rorom.

³Kui isukan kany iribakino gi karacel, di bobo iko timo kamanono da kede icegun kany kame odong.

⁴Dodolo egoe kame erangi mere ebululu ebululu iko kune ilak esuka me ooko me abunge acelacel.

⁵I lak abunge me agege, dodolo egoe nono tien ot kany, di bobo iko dodolo egoe me lak abunge me are da tien ot kany, di kipimere kede me abunge me agege.

⁶Ibino timo agoc ot kany me saabu di iko tic kede gi me ribakino abungeta me isukan nogo karacel, tetekeny taberenakol bed acel alutu.

⁷“Ibino da timo isukan tomon kiwie acel kame kotimo kede yer me diegi, me umo taberenakol.

⁸Tim gi di kirorom, boro me esuka acelacel miero bed mita tomon kiwie adek kede laco mere miero bed mita are.

⁹Ibino kuno isukan kany iribakino gi karacel i abunge acel, di iko kuno kanyape kame odong da i abunge acel. Esuka me kanyape mere ibino bane eko dokere i nyim taberenakol.

¹⁰Kui egoe kame kodolo tien ot kany i lak esuka me ooko me abunge acelacel.

¹¹Tim agoc ot kany kame kotimo kede nyonyo buronsi di iko kokodo gi kakame kododolo me esuka pi ribakino abungeta me isukan nogo tetekeny kibed di kitie kicel.

¹²Dul me wi esuka kame dong i yi eema, ibino liere ledo i ngei taberenakol.

¹³Isukan me eema laco gi bino kalamo kede dul mita; dul mita kame dong nogo bino ledo i nget taberenakol pi ume.

¹⁴“Ibino bobo da timo ne eema nono aum ace are, acel kame kotimo kede lau me oromo kame konyongo, kede kame ume ki ooko kame kotimo kede emukule apwot.

¹⁵“Ibino timo ne taberenakol ibaon me yat akasia kame kosipo me timo ipirin mege.

¹⁶Boro me ebao acelacel me epir miero bed puti tomon kiwie kany, kede laco mere poore bed bala puti are.

¹⁷Ebao acelacel poore bedo kede tiene are me ribakino gi karacel; ibino timo kamanono ne ibaon dedede me purem me taberenakol.

¹⁸Ibino timo ipirin me taberenakol kaman: ipirin ot are kame kocibo i ngete kame tie i bad tetu piny mere,

¹⁹kede ibino da timo kede nyonyo siliba agangeta ot ongwon kame koketo i dud ibaon ot are nogo, agangeta are i dud buli ebao acelacel me gango tiene are.

²⁰I nget taberenakol tetu ocelu da kame dok i bad tetu malo, tim ibaon me ipirin ot are,

²¹kede agangeta ot ongwon kame kotimo kede nyonyo siliba. Ket agangeta are i dud buli ebao acelacel.

²²I ngei taberenakol tetu kame dok i bad tetu tim ibino timo ipirin kanyape,

²³kede ipirin are me isondana me ngee kuno.

²⁴Ipirin me isondana nogi bino pokere i tetu piny, do kibino ribere i wi gi malo, i alung me agege. Ipirin are me isondana nogo kobino timo gin kamanono.

²⁵Manono bino mino ipirin me ngee bedo kanyauni, di dud epir acelacel tie kede agangeta are are kame kotimo kede siliba.

²⁶“Ibino timo ari tomon kiwie kany me ebao me yat akasia, ari kany pi ipirin me tetucel me taberenakol,

²⁷kede da bobo ari kany pi ipirin me tetu ocelu, kede bobo kany me ipirin me ngee, tetu kame dok i bad tetu tim.

²⁸Ari me diere, kame beo ikor ibaon me ipirin, bino rire yai ki lak taberenakol tetucel naka tuno tetu ocelu.

²⁹Ibino puno ibaon me ipirin kede saabu di iko keto negi alung kame kotimo kede saabu, me rwako ari. Ari nogo da miero kopui kede saabu.

³⁰Sip taberenakol di ilubo kite kame oudo konyuto ni i wi moru.

³¹“Ibino timo egoe kame poko agola kede egoe kame meny, kame kotimo kede ausin me erangi ebululu ebululu, akwakwar, kede akwar. Kobino kuno iye cal me cerubim kede diru.

³²Ibino liere i kom ipirin ongwon me yat akasia kame kopuo kede saabu, ipirin kame tie kede akod kame kotimo kede saabu di kicungo i kom agangeta kame kotimo kede siliba.

³³Ibino liero egoe me isenge nono piny me akodeta kame ledo ki wi taberenakol, di iko keto Sanduku me Isikan i yi isenge nono. Egoe me isenge nono bino poko Kabedo Kacil kede Kabedo Kacil Kalamo.

³⁴Ibino keto kom me kisa i wi Sanduku me Isikan.

³⁵Ibino keto emesa kame kocibo iye mugati kame koyalo but Rwot ooko me isenge, di iko keto gicibo etala i bad kame dok tetu piny, di epimere kede emesa. Ibino keto emesa i bad kame dok tetu malo.

³⁶“Ibino timo egoe me galao ekeko me Eema; time kede ausin me erangi ebululu ebululu, akwakwar, kede kame kwar di oko tubuso en kede egoe ameny kame korurujo di okuwo ausin iye kede piso.

³⁷Ibino timo ne egoe me galao ekeko nono ipirin kany me yat akasia, di iko puno gi kede saabu, kede iko keto negi akod kame kotimo kede saabu; ibino da timo ne ipirin nogo agangeta kame kotimo kede nyonyo buronsi.”