Read kumam Yai 28 Bible Online

Yai 28 - kumam bible

Yai 28

¹Rwot oko waco ne Musa be, “Lwong omini Aaron buti, en karacel kede awobe mege, Nadab, Abiku, Eleasar kede Itamar. Pok gi kikom jo me Isirael, tetekeny gin kitim na tic bala josaseredoti.

²Ibino timo ne omini Aaron igoen me angapa acil kame kotubuso.

³Ibino waco ne jo dedede kame karuno, jo kame ango amio diru, be gin miero kitim ne Aaron igoen me angapa pi kwere bedo ngasaseredoti kame timo tic nango.

⁴Igoen me angapa kame gin kibino timo gin ige: egoe me kor, epod, ekanso, esati abor kame kotubuso kome kede ausin, egoe kame kodwadwalo i wic, kede ausi me tweno pier. Magonogo en igoen kacil kame gin kibino timo ne omini Aaron kede awobe mege tetekeny gin kikaruno timo nango tic bala josaseredoti.

⁵Jo kame tie kede diru nogo bino timo igoen nogo kede ausi me saabu, ausin ebululu ebululu, akwakwar kede kame kwar mere, kede igoen ameny.

⁶“Gin kibino timo epod kede ausi me saabu, ausin ebululu ebululu, akwakwar kede kame kwar mere, di kotubuso kome kede ausin kede diru atek.

⁷Ebino bedo kede ausin are me epepet i ngete tuni tuni, kame kotwee kede.

⁸Rakoba kame kotubuso, kame tie iye, kobino timo iepone acel kede egoe me ausi me saabu, ausin ebululu ebululu, akwakwar kede kame kwar mere, kede egoe kame pwot.

⁹Ibino kwanyo kide are kame kolwongo be onik di iko goro nying awobe tomon kiwie are ka Yakobo i kom gi,

¹⁰nying awobe kanyape i kom kidi acel kede kanyape kame odong da i kom kidi ocelu, di lubere kede nywalo gi.

¹¹Gor nying awobe ka Yakobo i kom kide are nogo bala kame ngatet ngolo kede inyukutan i kom lilim, di iko keto gi i kom purem me iwayai me saabu kame kotado.

¹²Ibino dupo kide are nogo i kom ausin me epepet me epod, pi bedo kide me yutuno awobe ka Yakobo. Aaron bino tingo nying gi i epepet mere are pi bedo gi me iyutun.

¹³Tim purem me iwayai me saabu kame kotado,

¹⁴doko iko timo irikoi are me saabu kame kojililo di omino gi bala auno, di iko keto irikoi nogo i kom purem nono.

¹⁵“Ibino timo egoe me kor ne Ngatel me Josaseredoti kame en ebino tic kede pi ngeno gikame Rubanga mito; ibino time kede diru kede jamini kame kotimo kede epod di iko tubuso en kamanono da.

¹⁶Laco kede boro mere poore bedo rorom, boro inci kanyangon kede laco da inci kanyangon, di edokere.

¹⁷Ibino keto iye irotin ongwon me kide me wel. I eroto me agege ibino keto iye kide gi: karenelia, kirisolit kede emeradi;

¹⁸i eroto me are iko bino keto turukuse, sapir kede dayamon;

¹⁹i eroto me adek ibino keto jasinti, agate kede ametis;

²⁰kede do i eroto me ongwon mere iko keto, beril, onik kede jasipa; ibino mwono gi i kom mwola me saabu.

²¹Kikom kide tomon kiwie are nogi, kidi acelacel cungo pi ekeko acel me Isirael di ogoro nying awobe ka Yakobo i kom gi.

²²Ibino timo ne egoe me kor nono irikoi kame kotimo kede saabu kame kojililo di omino gi bala aunoi.

²³Ibino timo alung are me saabu di iko keto gi i isondana me egoe me kor, tetu wie malo,

²⁴di iko rwako irikoi are me saabu, kame komino bala aunoi nogo i yi alung are nogo.

²⁵Ibino tweno wi irikoi nogo tetu odong i kom purem are me saabu noka, di manono ko bino mino kotweo egoe me kor nono i kom ausin me epod i anyim.

²⁶Ibino bobo timo alung are me saabu di iko keto gi i isondana me egoe me kor nono, tetu piny mere, i lake me yie kame kio kede epod.

²⁷Ibino da bobo timo alung are ace me saabu di iko keto gi tetu piny me ausin are nogo me epepet me epod, i tetu nyime kakame ausin riamo iye kede epod, malo me rakoba kame kotubuso me epod.

²⁸Kobino tweno alung me egoe me kor koribo i kom alung me epod kede ausi ebululu ebululu, tetekeny egoe me kor di ko buto i wi rakoba me epod di likame eko ledo ki kom epod.

²⁹“Aso, i kare dedede kame Aaron donyo kede i Kabedo Kacil, en ebino ngapo egoe me kor kame nying awobe ka Yakobo tie iye, ebino ngape egongere kede cunye, pi bedo gi me iyutun.

³⁰Ibino keto Urim kede Tumim[15] i yi egoe me kor di gin kiko bedo i cuny Aaron i kare kame en edonyo kede i nyima; iepone nono Aaron bino tic kede gi pi ngeno gikame ango amito ne jo me Isirael nakanaka.

³¹“Ekanso kame kongapo kede epod miero erangi mere bed ebululu ebululu.

³²Miero kotuc ngute bed diere pi kakame korwako iye wic, di oko toko kuno ngute nono kede ausi tetekeny kur eyeci.

³³I lake piny ibino kuno cal me anyakini me yat kame kolwongo be pomagurunet kede ausin me erangi ebululu ebululu, akwakwar kede kame kwar mere, rimaro lak ekanso nono dedede, di acwirin kame kotimo kede saabu culere i diere gi rimaro lak ekanso.

³⁵Aaron bino ngapo ekanso noni ka etie timo tic bala ngasaseredoti. Kame en ebino i nyima i Kabedo Kacil arabo kame en eyai i nyima, jo bino winyo koko me acwir, tetekeny kur etoi.

³⁶“Ibino timo saabu ibatalal di cil di iko goro inyukutan me kop noni iye be, ‘Komie but Rwot.’

³⁷Ibino twene kede ausi ebululu ebululu i kom egoe kame kodwadwalo i wic; en ebino bedo i tetu nyime.

³⁸Aaron bino ngape i tur nyime, di en eko bino yeno raco kame udere i kom giamia kacil kame jo me Isirael mio buta; pado me saabu nono bino bedo i tur nyime nakanaka tetekeny ango ayei gamo giamia gi.

³⁹“Ibino timo esati abor kame kotubuso kome kede egoe ameny, kede iko timo egoe kame kodwadwalo i wic da kede egoe ameny, kede ausi me pier kame kotubuso.

⁴⁰“Ibino timo ne awobe ka Aaron isatin abocoboco, ausin me tweno pier kede igoen kame kododolo i wic. Manono bino mino gi kibedo kede engape me angosibib.

⁴¹In ibino ngapo ne omini Aaron igoen nogi, en kede awobe mege, di iko wiro gi, iko kwero gi, di iko poko gi pi timo tic na, tetekeny kitim na tic bala josaseredoti.

⁴²Ibino timo negi ipalen kame kingapo me yie, kame yai i pier gi jik i amuros, tetekeny kur kom gi me cuo neeno.

⁴³Aaron kede awobe mege bino ngapo gi kame kioto i Eema kacil, arabo kame kioto i alutari pi timo tic bala josaseredoti i Kabedo Kacil; ka likame kitimo kamanono, kibino kelo raco i wi gi di kiko to. Manono en cik kame tie pi Aaron kede ikwae mege, cik kame bedo nakanaka.