Read kumam Yai 31 Bible Online

Yai 31 - kumam bible

Yai 31

¹Rwot oko waco ne Musa be,

²“Neningo, ango atieko yero Basalel wot ka Uri, akwar Kur, dano me ekeko ka Yuda.

³Ango atieko mino twer na opong i kuo mere, doko amie apiranut, rieko kede ngec me timo jamini dedede kede diru,

⁴pi en pwakuno timo jamini mogo kede saabu, siliba kede nyonyo buronsi;

⁵kede pi en luro kide acil kame komwono me tubuso gimogo, kede pano ebao kede diru me epone dedede.

⁶Ango atieko yero da bobo Okoliab wot ka Akisamak, dano me ekeko ka Dan, pi nywako timo tic kede en. Ango atieko mino apiranut but jo dedede kame timo tic kede diru, tetekeny gin kitim jamini dedede kame ango atieko ciko ni gi:

⁷Eema me riamo keda, Sanduku me Isikan kede kom me timo kisa kame bedo i wie, kede jamini dedede me yi Eema,

⁸emesa kede jamini mege, gicibo etala kame kotimo kede saabu kame kojililo kede jamini mege dedede, alutari me wango odok angwe kur,

⁹alutari me giayala awanga kede jamini mege dedede, kalaya me lwokere kede gi me cibe,

¹⁰kede igoen kame kotimo kiber, igoen kacil me ngasaseredoti, kame kotimo ne Aaron kede awobe mege, pi gin ngapo kame kitie timo tic me josaseredoti,

¹¹mo me wir, kede odok angwe kur kame kodunyo i Kabedo Kacil. Gin kibino timo gi nogi bala kame ango atieko ciko ni.”

¹²Rwot oko waco ne Musa be

¹³en kikome poore ewace jo me Isirael be, “Wun ibinunu gwoko ceng Sabato na, pien ebedo gianena kame bino bedo tie i dierediere nango kede wu pi kare dedede, pi nyuto be ango atieko yero wun pi bedo jo na.

¹⁴Wun ibinunu gwoko ceng Sabato, pien ebedo ceng kacil kibutu; ngatamoroni kalikame bino gwoke di eko timo tic i ceng nono, kobino neke.

¹⁵Ibinunu timo tice wu pi ceng kanyape, do ceng me kanyaare obedo ceng me wei kenekene, ceng kacil ka Rwot. Ngatamoroni kame bino timo tic i ceng nono, kobino neke.

¹⁶Jo me Isirael miero gwok ceng Sabato pi kare dedede, bala isikan kame bedo nakanaka.

¹⁷En ebedo gianena kame bino bedo nakanaka i dierediere na kede jo me Isirael, pien ango acweo malo kede piny pi ceng kanyape, di i ceng me kanyaare mere ako jiko tic di ako wei.”

¹⁸Kakame Rubanga otieko yamo kede Musa i wi moru me Sinai, eko mine kide abatal are, kame oudo Rubanga kikome owandiko iye cik.