Read kumam Yai 34 Bible Online

Yai 34 - kumam bible

Yai 34

¹Rwot oko waco ne Musa be, “Tieng bobo kide are kame cal bala maka me agege ka, di ango ako bino wandiko i kom gi kope kame oudo tie i kom maka kame in oudo ibebelo.

²Iikere, di diki odiko iko yito i wi moru me Sinai pi riamo keda i wie kunono.

³Likame tie ngatamoro kame bino yito malo kedi; kur ngatamoro tun karamoro me moru; doko kur romini arabo doke ot cam i dud moru.”

⁴Aso, Musa oko tiengo kide are abatal kame cal bala me agege; di eko dilo yai odiko eko yito i wi moru me Sinai bala kame Rwot oudo ociko ne.

⁵Rwot oko bino kede edou di eko cungo karacel kede Musa i wi moru kunono, di eko waco nyinge kacil be, “Rwot.”

⁶Rwot oko beo i nyime di eko waco be, “Ango en Rwot, abedo Rubanga kame mwol, doko angakisa, likame cunya susunyo wang, adwong kede amara kalikame lokere doko agenere.

⁷Ango anyuto amara na kalikame lokere but lwak me ikwae me tutumian kede tutumian, doko asasiro jo kame timo gikareco, jo kame turo iswil kede jo kame dubo; do likame aweko ngat arac aweka, ango amio alola but idwe kede but lwak me ikwae me adek tuno i me ongwon, pi dub me jonywal gi.”

⁸Musa oko susunyo luro wie piny eko woro Rubanga.

⁹En ewaco be, “Okwe Rwot, ka ateteni in cunyi yom i koma, ango akwai iupere kede wa. Akadi bed bala jogi jongut gi, do in sasiro gikareco wa kede dub wa, di iko gamo wan obed jo ni.”

¹⁰Rwot oko waco ne Musa be, “Nataman ango atie timo isikan kede jo me Isirael. Ango abino timo jamini me aura i nyim gi, jamini me aura kame lem pwodi likame kotimo i wi lobo lung arabo i piny moroni. Jo dedede kame wun ibedunu i diere gi bino neno gikame Rwot oyaro timo; pien ango ayaro timo ne wun jamini me aura akelo lworo.

¹¹Wun poore igwokunu gikame tin ango amito ciko ne wu pi timo. Neningo ango ayaro riamo tenge ki nyimu jo Amor, jo Kanan, jo Kiti, jo Perisi, jo Kibi, kede jo Yebu.

¹²Gwokerenu kur itimunu isikan moro kede jo me piny kame itienu ot iye, pien ekaruno doko ne wu bala owic me ciko wu.

¹³Do wun ibinunu rereto alutarin gin, mumuko ipirin kame gin kiworo kiye rubangan gi, di ikounu totongo cal me rubangan gi.

¹⁴“Likame ibinunu woro rubanga moro ace, pien ango Rwot, nyinga Nyeko, abedo Rubanga kame nganyeko.

¹⁵Likame ibinunu timo isikan kede jo me piny nono, pien kame gin kibino woro rubangan gi, di kimio giayala but gi, gin kibino lwongo wu pi nywako kede gi, di wuda ikounu camo giayala gi.

¹⁶Doko cengemogo wuda ikounu bino nyomo ne awobe wu mon kikom anyira gin, di anyira gin ko bino mino awobe wu weko wora di kiko donyo woro rubangan gin.

¹⁷“Likame ibinunu timo kede nyonyo kame kotwako cal moro me rubanga piru.

¹⁸“Ibinunu tedo ebaga me Mugati kame Arup li iye. Ibinunu camo mugati kame arup li iye pi ceng kanyaare, i duwe me Abib bala kame ango aciko ne wu, pien duwe nono en kame wun bin iyaunu kede ki Misiri.

¹⁹“Idwe kao dedede obedo mega, idwe awobe kede idwe acuo me leini dedede kame kopito i paco.

²⁰Do ibinunu kwanyo atin romo pi lako kao me punda. Ka likame itimunu cul me lake, ibinunu turo ngute. Ibinunu da timo cul pi lako idwe awobe wu kao. “Likame tie ngatamoro kame poore bino i nyima kede cinge nono.

²¹“Ibinunu timo tice wu pi ceng kanyape, do ikounu wei i ceng me kanyaare mere; akadi i kare me pur arabo i kare me kac.

²²“Ibinunu tedo Ebaga me Kac i kare kame ibinunu cako kede kano engano ki poti, kede ibinunu da tedo Ebaga me kimere i atiekini me mwaka i kare me ngwedo anyakini.

²³“Jo wu dedede kame tie cuo miero bin i nyima tien adek buli mwaka pi wora, ango Rwot Rubanga me Isirael.

²⁴Ango abino riamo atekerin tenge ki nyimu di ako nyano ikor me lobo wu; likame tie ngatamoro kame bino ngobelo lobo wu i kare kame wun ibinunu kede i nyima tien adek pi wora, ango Rwot Rubanga wu.

²⁵“Likame ibinunu mino giayala me mugati kame kotimo kede arup ka itienu mina giayala angola, doko likame ibinunu mino ringo moro me le kame kongolo me camo Ebaga me Kalamo buto tuno odiko me ceng alubo.

²⁶“Kodere kame beco kame geo cek ki poti wu, ibinunu kelo gi i ot ka Rwot Rubanga wu. “Likame ibinunu tedo ringo me atin oromo arabo me atin diel kede cak ka toto mere.”

²⁷Rwot oko waco ne Musa be, “Wandiko kope nogi, pien ango atie timo isikan kedi karacel kede jo me Isirael di lubere kede kope nogi.”

²⁸Musa oko bedo i wi moru kunono kede Rwot pi ceng ot ongwon, di likame etie camo gimoro akadi mato pii. Musa oko wandiko kope me isikan nono i kide abatal, cik tomon nogo.

²⁹Kakame Musa oko wok kede piny ki wi moru me Sinai, di emako kide are kame oudo kowandiko iye cik, tur nyime oudo tie meny piento en oudo ebedo yamo kede Rwot; do en oudo likame engeo.

³⁰Aaron karacel kede jo me Isirael dedede oko ngoloro Musa di kiko neno tur me nyime oudo tie meny, di lworo oko mako gi noke.

³¹Do Musa oko lwongo gi; di Aaron karacel kede jotel dedede me ekodet oko dok bute, di Musa oko yamo kede gi.

³²I cen mere di do jo dedede me Isirael oko noke, di Musa oko waco negi cik dedede kame oudo Rwot omie i wi moru me Sinai.

³³Kakame Musa otieko yamo kede gin, eko umo nyime kede egoe.

³⁴Do i kare dedede kame Musa oto kede i nyim Rwot pi yamo kede, en oudo ekwanyo egoe kame eumo kede nyime tenge. Di do kame bin en eko donyo ooko, en oudo eko waco ne jo me Isirael gi dedede kame oudo Rwot ociko.

³⁵Jo me Isirael bobo bin ko neno be nyim Musa oudo tie rieny; di Musa bobo ko umo nyime kede egoe, paka tuno i kare kame en bobo bin edok yamo kede Rwot.