Read kumam Yai 37 Bible Online

Yai 37 - kumam bible

Yai 37

¹Basalel oko timo Sanduku me Isikan kede ebao me yat akasia; boro mere oudo tie puti ongwon, laco mere puti are kede boro mere malo puti are.

²En eko puno yie kede ngee kede saabu kame kojililo, doko eko toko ngee kede saabu rimaro.

³En eko timo alung ongwon me saabu di eko keto gi i tiene ongwon, alung are tetucel kede are da tetucel.

⁴Di eko timo ibaon me yat akasia me yene, di eko puno gi kede saabu,

⁵di eko rwako ibaon nogo i wang alung nogo i nget sanduku tuni tuni, me yene.

⁶En eko timo kom me timo kisa kede saabu kame kojililo; boro mere oudo tie puti ongwon kede laco mere puti are.

⁷En eko timo cerubim are kede saabu; eteto gi kede enyondo,

⁸acel etimo i ajikini me kom me timo kisa tetucel, acel da eko timo tetuca mere. En etimo gi di kitie kicel kede kom me timo kisa.

⁹Cerubim nogo oudo nenere di nyim gi oluro neno kom me timo kisa, doko oudo kiyararo bwom gi oume.

¹⁰En eko timo da emesa kede ebao me yat akasia; boro mere oudo tie puti adek kede laco mere puti acel kede dul, kede boro mere malo oudo tie puti are.

¹¹En eko puno kome dedede kede saabu kame kojililo, di eko toko lak ngete kede saabu rimaro.

¹²Di eko timo ne ebao kame gwako tiene rimaro, di laco mere rom kede yi cing dano, di eko toke kede saabu.

¹³En eko timo ne emesa nono alung ongwon me saabu di eko keto gi i isondana ongwon dedede, acelacel i tiene acel.

¹⁴Alung me rwako ibaon me yeno emesa en eko keto di iyapiyapi kede ebao kame oudo gwako tiene rimaro.

¹⁵En eko timo atekai me yat akasia pi yeno emesa, di eko puno gi kede saabu.

¹⁶En eko timo kede saabu kame kojililo, jamini kame oudo opoore keto i wi emesa: suanin kede bakulin mege me dunyo odok angwe kur, kede da jagin kede cupan mege me onyo giayala amata.

¹⁷En eko timo da gicibo etala kede saabu kame kojililo. Eteto dude piny kede epir mere kede enyondo; ikopon mege kede ature me tubuso en, eko teto oribere i kome.

¹⁸Gicibo etala nono oudo tie kede jange kanyape kame yai i ngete, adek tetucel kede adek tetu ocelu.

¹⁹Ajange acelacel kikom ajange kanyape nogo oudo tie kede ikopon adek kame kotimo bala ature kede pote mege.

²⁰Ikopen ongwon kame kotimo bala ature kede pote mege oudo tie i kor epir me gicibo etala.

²¹Kikom ajange kanyape nogo, i dierediere me tien ajange are are oudo tie iye buli ikopo kame kotimo bala ature kede pote mege i kor epir me gicibo etala.

²²Gicibo etala, karacel kede ajange mere, kiton ature mere oudo obedo saabu kame kojililo kame koteto kede enyondo di kiribere kitie kicel.

²³En eko timo ne gicibo etala nono italan kanyaare karacel kede makasi mere kede sinian mege kame kotimo kede saabu kame kojililo.

²⁴En eko tic kede saabu kame kojililo, kame romo kilo 35 pi timo gicibo etala nono kede jamini mege dedede.

²⁵En eko timo alutari me wango odok angwe kur kede ebao me yat akasia. Etime di ngete dedede rorom, boro mere puti acel kede dul, kede laco mere da kamanono, kede boro mere malo oudo tie puti adek. Iswonge kame tie i isondana mege oudo oribere i kome di kitie kicel kede en.

²⁶En eko puno wie malo, ngete ongwon dedede, karacel kede iswonge kede saabu kame kojililo, di eko toko ngete kede saabu rimaro en.

²⁷Di eko timo ne alung are me saabu, di eko keto gi piny me kakame kotoko i nget alutari tuni tuni di kipimere, pi gin bedo me rwako atekai me yene.

²⁸Di eko timo atekai nogo kede ebao me yat akasia, di eko puno kom gi dedede kede saabu.

²⁹En eko timo mo kacil me wir da, kede odok angwe kur da kacil, kame kotimo bala kame konyalo kede mo angwe mit.