Read kumam Yai 9 Bible Online

Yai 9 - kumam bible

Yai 9

¹Di Rwot oko waco ne Musa be, “Oti but Parao di iko waco ne be Rwot Rubanga me Iburanian owaco be, ‘Wek jo na yai kioti kiwora.

²Aso, ka in idagi negi yai,

³abino mini alola i yore me cwano ni tuwo arac me leini: asigiran, pundan, aguraguran, doke, romini kede diegi.

⁴Do abino nyuto apokapoka i dierediere me leini me jo me Isirael kede me jo me Misiri, tetekeny kur le moro kikom leini me jo me Isirael toi.

⁵Ango Rwot atieko moko ceng me diki pi bedo ceng kame ango abino timo kede gi noni i lobo noni.’ ”

⁶Ceng alubo mere Rwot oko timo bala kame oudo etieko waco; leini dedede me jo me Misiri ototoun, do leini me jo me Isirael likame oto akadi acel moro.

⁷Parao oko pepenyo di eko udo be, likame le moro oto akadi acel kikom leini me jo me Isirael. Do Parao oko meede ameda kede epali mere di likame eko yei ne jo yai.

⁸Di Rwot oko waco ne Musa kede Aaron be, “Jobunu buru i cingu pong di Musa ko kiro gi i yamo i nyim Parao.

⁹En ebino doko apua di eko duny i wi lobo me Misiri dedede, di eko bino kelo giakwoti i kom jo kede i kom leini i lobo me Misiri dedede.”

¹⁰Aso, gin kiko jobo buru mogo ki keno di kiko ot cungo i nyim Parao, di Musa oko kiro buru i yamo di manono oko kelo buge me giakwoti i kom jo kede i kom leini.

¹¹Jotim tangu likame oko twero cungo i nyim Musa, pien giakwoti oudo otatapo kom gi bala jo icegun dedede me Misiri.

¹²Do Rwot oko mino Parao obedo ngaepali, omio likame eko yei kop gi, bala kame oudo Rwot otieko waco ne Musa.

¹³Di Rwot oko waco ne Musa be, “Yai diki odiko sek di iko ot but Parao di iko waco ne be, Rwot Rubanga me Iburanian owaco be, ‘Wek jo na yai kioti, tetekeny kiko wora.

¹⁴Pien nataman ango abino cwano can alit kalamo i komi kede i kom jotic ni kede i kom jo ni, tetekeny in iko bino ngeno be likame tie ngatamoro acal bala ango i wi lobo lung.

¹⁵Pien ka koto oudo ango akelo aumpuli i komi kede i kom jo ni, koto nan likame tie dano moro kodong kuo i wi lobo.

¹⁶Ango aweki ibedo kuo pi nyuto ni twer na kede pi mino nyinga bed iruo i wi lobo lung.

¹⁷Do in pwodi itie wakere ne jo na idagi weko gi kiyai.

¹⁸Diki i esawa noni ango abino mino akako me aura cwei kanoni, kame epone mere lem pwodi likame otimere Misiri cako i ageini mere.

¹⁹Nan do cwai kop dwok leini ni kede jame ace apat dedede atie obar tetekeny kiud kagwok; jo kede leini dedede kame tie obar abongo kagwok bino totoun kame akako ocwei i kom gi.’ ”

²⁰Mogo kikom jotic ka Parao kame oudo oko bedo kede lworo i kom kop kame Rwot owaco oko susunyo tero ipasoi kede leini gi kagwok.

²¹Jo ace apat kalikame oketo tam gi i kom ikwenyar kame Rwot omio oko weko ipasoi kede leini gi obar.

²²Di Rwot oko waco ne Musa be, “Riei badi malo tetekeny akako cwei i lobo me Misiri lung, i kom jo kede leini kede yen dedede me obar kame tie Misiri.”

²³Musa oko tingo ebela mere malo, di Rwot oko cwano akako kede kot kame meny di mwoc. Rwot ocwao

²⁴kot agwai me akako kame meny di mwoc. Oudo ebedo kot kede yamo arac kalikame lem pwodi ocwei Misiri cako i ageini mere.

²⁵Akako oko jwato tuno rereto gi dedede kame oudo tie obar i lobo me Misiri lung, jo karacel kede leini; enyoto cam kame tie i poti di eko tuturo yen me obar.

²⁶Adul me Gosen, kakame jo me Isirael oudo tie iye en oko bwot.

²⁷Parao oko lwongo Musa kede Aaron di eko waco negi be, “Ayei be ango adubo i manoni, Rwot li kede kop moro, do ango kede jo na en kame otie kede raco.

²⁸Legunu but Rwot! Akako otieko cwei ne wa cwei akalamo! Ango abino mino wu iyaunu; likame doko ipoorenu meede bedo kan.”

²⁹Musa oko waco ne be, “Cucuto di ango awok ooko me bomba, abino rieno cinga di ako lego but Rwot di kot ko bino cok, di akako da ko jiko cwei, tetekeny in ingei be wi lobo obedo me ka Rwot.

³⁰Do ango angeo be in kede jotic ni likame pwodi itienu kede lworo but Rwot Rubanga.”

³¹I kare nono akako oko dudubo pulak[4] kede mawele, pien mawele oudo ocek i poti kede pulak da oudo tie tuuro.

³²Do likame tie egere moro me engano kame oko dubere pien gin kibedo i poti likame kisunyo cek.

³³Aso, Musa oko yai kibut Parao eko donyo ooko me bomba di eko tingo cinge lego but Rwot, di kot amwocumwocun kede akako oko cok.

³⁴Do kakame Parao oneno kede be kot amwocumwocun kede akako otieko cok, en doko eko medo timo dub. En kede jotic mege kiko meede bedo joepali.

³⁵Aso, Parao oko timo epali, eko dagi ne jo me Isirael yai, bala kame oudo Rwot otieko waco ne Musa.