Read kumam Yobu 10 Bible Online

Yobu 10 - kumam bible

Yobu 10

¹“Likame kom cunya mito bala koto abed kuo da; ango abino woto ingungur kame ango atie kede i kom Rubanga; abino yamo kede wangcuny.

²Abino waco ne Rubanga be, kur ingol na kop be arac; mia angei gikame itie pida iye.

³Benyo, in ineno eber nin kame itie tidilo ango, di icao gikame cingi en kocweo, di iko lokere bedo kede yomcuny i kom tice me jo areco?

⁴Benyo, ida wangi cal bala me dano? Ida ineno piny bala kame dano neno kede?

⁵Benyo, ceng me kuo ni rom kede me ka dano, arabo mwakini me kuo ni rom kede mege?

⁶Do pinyo komio in itie mono gikareco na, doko imito ngeno dub na,

⁷bed bala in ingeo be ango ali kede raco moro, doko da likame tie ngatamoro kame twero laka ki cingi?

⁸“Cingi en kocwea, do nan doko ilokere mito neka.

⁹Yutuno be in icweango bala cweno agulu kede elupe; benyo, nan doko imito dwoka adoko apua?

¹⁰Mam in en ionya i yi toto na bala cak di ako lulungun bala cak korurano?

¹¹In iko ngapa kede delkom kede ringokom, di iko dudupo na cogere kede amorito.

¹²In itieko minango kuo kede amara kalikame lokere, doko da ibedo gwoko kuo na.

¹³Bed bala kamano da, in ibedo mungo gikame iyaro timo na; ango angeo be in oudo itieko iiko be:

¹⁴wangi bino bedo bit i koma pi neno ka adubo, tetekeny iko dagi sasiro ango.

¹⁵Ka adubo, udo amo can i koma kena; ka atimo gikaber, ayaro bedo luruluru, pien lewic opong i wanga, doko da peko oromo koma.

¹⁶Ka ango atimo gimoro akelo na ewaka, in icako dwara bala engu; imedo ameda timo giaura me awanon i koma.

¹⁷In isura kare i kare; ibedo medo ameda gero ni i koma; nakanaka icwao na peko anyen bala isirikalen apwodi kokelo nyen.

¹⁸“Pinyo kara komio iwota ki yi toto na? Koto bin ato gira di pwodi ngatamoro likame onena.

¹⁹Koto bin ayai ki yi toto na di ako kato akata i ates, di ako dong bala ngat kalikame obedo tie.

²⁰Mam ceng me kuo na odong nonok? In wekango do ber, tetekeny abil ber wei moro atitidi

²¹di pwodi likame aoto i lobo kalikame bobo abino dwogo kiye, en lobo imumusit di ecucucuc;

²²en lobo komumuso, acucucuc di gi dedede ototolun iye, kakame lero mere cal acala bala colo.”