Read kumam Yobu 14 Bible Online

Yobu 14 - kumam bible

Yobu 14

¹“Dano kame dako onywalo ceng me kuo mere nonok, doko peko mege tot.

²Kuo mere cal bala ature kame tuuro di eko ner; en likame ebedo pi kare alac, do ebunyo rwenyo bala tipo me yat.

³Rubanga, benyo, kom in iciko wangi i kom ngat acal kamanono? Arabo benyo, ibino pida di iko ngolo na kop?

⁴Ngai kame twero woto gimoro acil ki gi komunaun? Likame tie ngatamoro akadi acel.

⁵Bala kame itieko moko kede ceng me kuo ka dano, doko da in ingeo dwete mege me bedo kuo, kede da itieko giro ikor kame ngat acelacel likame bino ngolo,

⁶kong do lok wangi tenge kibute di eko udo wei moro, me wek eud yomcuny moro i atiekini me ceng acelacel bala epakasit.

⁷“Tikatika yat kame kotieko tongo da pwodi tie kede gen, kame kotonge, en ecako lot, pote mege meede lot ameda nakanaka.

⁸Bed bala aliasin mege twero ti, di isiki mere ko top i lobo,

⁹do tek ka kot omule, en elot bobo bala yat apwodi titidi.

¹⁰Do dano to di do teko mere rwenyo; cuny dano cot di do en eko beo tuai?

¹¹Bala kame pii dwono kede i nam, kede bala kame ecilet tuo kede,

¹²kamanono da, dano to di likame bobo eko yai; bala kame malo bedo kede nakanaka, kamanono da likame en ebino bobo cei, en likame bobo ebino cei ki wang nino mere.

¹³Cunya paro be koto oudo ikana i kabedo me jo oto; koto iuma tuno di gero ni otiek, koto iko moko kare kame apoore tieko kuno, di iko yutuno ango.

¹⁴Iparo be ka dano oto, ebino kuo bobo? Koto ango akanyakino kuro i kare me tic na, koto akuro paka tuno ceng kame kogonya kede.

¹⁵Koto in iko bino lwongere di ango ako gamo dogi, di iko bino paro pi nena, ango tic me cingi.

¹⁶Di do in iko bino donyo ngina i kabedo dedede kame ango aoto iye, do likame ibino donyo kina pi neno dub na.

¹⁷Di in iko bino kano dub na bala gikame kotweo i epuko, iko bino umo raco na.

¹⁸“Do mori tiatiaun di kiko tiek, kide da nyikere tenge ki kargi;

¹⁹pii amol goro lela, doko kot da molo lobo; epone nono en kame in ikwanyo kede gen ka dano.

²⁰In ibwone nakanaka tuno en to; imio to loko cal me nyime, di iko cwane tenge.

²¹Idwe mege twero doko jo kame koworo, do likame en eko ngeno; akadi kame komio gi lewic, likame en etwero ngeno.

²²En ebedo winyo lito me kome kenekene, di etururo parere pire kene.”