Read kumam Yobu 15 Bible Online

Yobu 15 - kumam bible

Yobu 15

¹Di Elipasi dano me bomba me Tema oko dwoko be,

²“Benyo, dano ariek twero yamo atatai kamano, di eyamo kope adwong gi li?

³Benyo, epoore piem atatai, arabo yamo kope kalikame tie kede kony moro?

⁴Neningo, in itie mino jo weko bedo kede lworo but Rubanga; itie gengo jo lego Rubanga i cuny gi.

⁵Pien kop awok ki dogi nyuto raco ni, in itie tic kede leb me dano angangalo jo.

⁶Kope nin en atie ngolo ni kop, do likame ango; kope ayai ki dogi en amio ijura i komi.

⁷“Benyo, in ibedo dano kame konywalo me agege? Benyo, oudo in itie di pwodi likame kocweo mori?

⁸Benyo, in itieko bilo winyo kop i kansulo ka Rubanga? Mam in igeno be in keni en iriek?

⁹Nyo kame in ingeo kame wan okwia? Nyo kame in iniang iye do di wan likame oniang iye?

¹⁰Ngat alwar omako wie kede dano oti tie i but wan, gin kiti kalamo kiton papa nin da.

¹¹“Benyo, kweicuny ka Rubanga tie mini likame tie romi? Wan owaco ni kope mege kede mwolo.

¹²Pinyo komio cunyi tie miel, doko pinyo komio itie memelo ne wa wangi?

¹³Pinyo komio gero maki i kom Rubanga di iko mino kope acal kamago wok ki dogi?

¹⁴“Dano obedo nyo kamio etwero bedo di ecil? Dano kame dako onywalo likame twero bedo di epoore.

¹⁵Rubanga likame geno kiton imalaikan mege da, doko da likame malo cil i nyime;

¹⁶do ebino timo kamanono tien adi i kom dano ngat komunaun bala gi me kwer, ngat kame timo gikarac bala mato pii!

¹⁷Winyingo, ango amito waco ni, ango abino mini ingeo gikame aneno,

¹⁸gikame jo ariek owaco, gi kalikame joakwari gi bin omungo.

¹⁹Gin nogo en kame bin komio gi lobo kame kocikere pire, di likame ngakumbor moro oko beo i diere gi.

²⁰“Ngat arac dinyo kede aramo ceng me kuo mege lung, manoni meede pi mwakini dedede me ngagero kuo kede.

²¹Dwan akelo lworo dwilao i yite, joyak sure i esawa kame etie kede i mulem.

²²En eli kede gen me bwot ki colo, pien kotieko iiko ne to me epima.

²³En ebedo rimo piny mono cam di epenyere be, ‘Etie tuai?’ En engeo be to oyapuno poto i kome;

²⁴par adwong mie lworo di ko bwone bala abaka koikere pi yi.

²⁵Etie kamanono piento en erieo cinge yi kede Rubanga, en ebedo suk i kom Won Twer,

²⁶di eringo epali epali ot yi kede, di emako twon ebuku apek.

²⁷En etimo kamanoni bed bala ecwe mo omwono nyime, piere da omwonere kede mo.

²⁸En ebino bedo i bomban kame koweko, i ude kalikame ngatamoro poore bedo iye, i ude kame bino doko amejeko.

²⁹En likame ebino baro, doko abar mere likame bino bedo nakanaka, doko da jame kame etie kede likame bino nyai i lobo.

³⁰En likame ebino bwot ki to; ebino bedo bala yat kame mac owango pote mege, di wei ka Rubanga ko bino buke tenge.

³¹En kur egen buo ngor, pien kobino cule kede buo ngor.

³²Kobino mine cul mere dedede di pwodi kare mere likame otiek, ebino tuo bala ajange me yat di likame eko bobo lot.

³³En ebino bedo cal bala olok me anyakini mege ony di pwodi likame kicato; ebino bedo bala yat olibeti aonyo ature mege.

³⁴Pien jo kalikame paro pi Rubanga bino to abongo ikwae, doko da mac bino wango miere kame kigero kede sente me cemusana.

³⁵Gin jo kame kitie kede iik akelo peko di kitimo gikareco, doko da di cuny gi opong kede angalo.”