Read kumam Yobu 2 Bible Online

Yobu 2 - kumam bible

Yobu 2

¹Ceng moro acel imalaikan oudo bobo tie bino cungo i nyim Rwot, Sitani da oko bino karacel kede gi cungo i nyim Rwot.

²Rwot oko penyo Sitani be, “In iwok ki tuai?” Sitani oko dwoko be, “Ango oudo abedo wire i wi lobo, di aririmo piny tuni tuni.”

³Rwot oko penye be, “Ibedo tie kede tam moro i kom ngatic na Yobu? Likame tie ngatamoro i wi lobo kame cal bala en, dano ali kede raco moro di epoore, dano alwora di egwokere likame etimo gimoro arac. Bed bala in oudo isupa i kome, pi kisaro en abongo tien kop moro, do Yobu pwodi oko dong lide alida bedo dano aber.”

⁴Sitani oko dwoko ne Rwot be, “Dano twero jalo gi dedede kame etie kede pi lako kuo mere.

⁵Do ka nan in icwao cingi di iko keto aramo i kome, en ebino waco kope areco i komi i wangi.”

⁶Rwot oko waco ne Sitani be, “Mano ber, aso en nan etie i twer nin, kenekene kur ikwany kuo mere.”

⁷Aso, Sitani oko yai kibut Rwot eoto, di eko coro buge areco i kom Yobu cako ki tiene tuno i wie.

⁸Yobu oko ot bedo i buru me oduru di eko donyo gwenyo kome kede abalatigo.

⁹Dako mere oko waco ne be, “Mam in pwodi itie lide alida be bedo dano aber? Wac kop arac i kom Rubanga iko to.”

¹⁰Do Yobu oko waco ne be, “In itie yamo bala dako angamingo. In iparo be wan opoore gamo bero kibut Rubanga di oko dagi gamo raco kibute?” Bed bala manoni otimere ne, do dog Yobu likame oko yamo kop moro me dub.

¹¹Aso kakame jowot Yobu owinyo kede peko kame ebeo iye, gin kiko riamakin karacel pi ot dino cunye. Jo nogo oudo obedo Elipasi dano me bomba me Tema, Bildad dano me Sua, kede Sopar dano me lobo me Naama.

¹²Di bin gin kinene ki kakabobor, gin likame kiko karuno ngene; do kakame kingee kede, gin kiko donyo koko kitek. Gin kiko nyinyilo igoen gi di kikiro apua i yamo i wi gi malo.

¹³Di do kiko bedo piny karacel kede Yobu pi iceng kede iwor kanyaare abongo yamo ne kop moro, pien gin oudo kineno be can mere dwong twatwal.