Read kumam Yobu 20 Bible Online

Yobu 20 - kumam bible

Yobu 20

¹Di Sopar dano me Naama oko waco be,

²“Likame atwero dire pi dwoko kop ni, pien gikame iwaco tie kukudo cunya.

³Abedo winyo kope awango cunya, do cunya waco nango gikame apoore dwoko ni.

⁴“Mam in ibedo ngeno be, cako sek, cako i kare kame koketo kede jo i wi lobo,

⁵be yomcuny me jo areco tie pi kare acecek, doko da kilel me jo kalikame paro pi Rubanga likame tero kare?

⁶Akadi di abar kede twer gi dongi ikumemei paka malo, di kituno i idoun,

⁷do jo nogo bino rwenyo atwal atwala, di jo kame oudo ngeo gi ko donyo penyere be, ‘Kitie tuai?’

⁸Kibino rwenyo bala lek di wi jo ko wil kede gi; kibino kato wir bala gianyuta kame dano neno.

⁹Jo koudo oneno gi likame bobo bino medo neno gi, doko da kibino rwenyo atwal ki kakame oudo kibedo iye.

¹⁰Idwe gi bino culo jocan; ikwae gi bino dwoko abar kame gin oudo kimao.

¹¹Kom gi koudo nyen di yot bino buto piny kiko lokere kidoko apua.

¹²“Akadi bed bala timo gikarac mit i dog gi, akadi bed bala kikano mogo i dud leb gi pi winyiwinyi gi,

¹³akadi bed bala kidagi mwonyo gi, di kiko lokere kudo gi i dog gi,

¹⁴do cam gi nono bino lokere ka etieko donyo i yi gi, di eko doko kec bala kwir me twol ager.

¹⁵Jo areco ngoko abar kame kiudo i yore arac, Rubanga woto abar nono, akadi ki yi gi da.

¹⁶Gin kidoto kwir me twol ager; do kwir awok ki leb emosoga bino neko gi.

¹⁷Gin likame kibino bilo bero me icileta amol mo me olibeti, kede isamai amol cak kede mokic.

¹⁸Gin kibino dwoko gikame oudo kicane udo, likame kibino mwonyo gi i yi gi; likame kibino bilo bero moro ki gikame kiudo ki tic gi me cato wil,

¹⁹pien gin kitieko dino jocan di kiko jalo gi, kimao ude kalikame gin en kigero.

²⁰Kitie kede eranga kalikame kwei; eranga gi mio gi likame kiyei weko gimoro kato.

²¹Likame tie ngatamoro abwot di likame kibedo kede adiadia i kome, pi manono mulem gi likame bino tero kare.

²²I kare kame gi dedede me kimito otieko romo gi kede, peko bino poto i kom gi; can bino poto i kom gi kede twer mere dedede.

²³Kakame gin kitieko pongo kede yi gi, Rubanga bino cwano twon gero mere i kom gi di gero mere ko bedo negi bala cam.

²⁴Gin kibino tamo ringo tenge ki epima kame kotimo kede nyonyo ayon, do imalia kame kotimo kede nyonyo buronsi bino cocobo gi pelepel.

²⁵Imalia bino cocobo gi paka pelao ki ngei gi; leb imalia kakabit di rieny arienya bino yeyeco epiu gi, di do twon lworo kalikame wacere ko bino mako gi.

²⁶Kobino dudubo jamini dedede kame kidiato; mac kalikame ngatamoro okuto bino wango gi, jo dedede kodong i iemai gi kobino wango.

²⁷Malo bino nyuto raco gi, doko wi lobo da bino jurao be kireco.

²⁸Kobino tero gikame tie i ude gi, kobino ware kede gi i ceng me gero ka Rubanga.

²⁹Manoni en iner kame Rubanga opoko ne jo areco, gikame Rubanga otieko moko pi bedo mergi.”