Read kumam Yobu 22 Bible Online

Yobu 22 - kumam bible

Yobu 22

¹Di do Elipasi dano me bomba me Teman oko gamo be,

²“Benyo, dano karuno timo ne Rubanga bero moro? Iparo be akadi dano ariek twatwal karuno timo ne Rubanga bero moro?

³Bero nyo kame poore nin kelo ne Rubanga, arabo nyo kame en eudo ka in ibedo abongo raco moro?

⁴Benyo, iparo be pien in ilworo Rubanga en komio en etie mini alola, di ekelo pido i komi?

⁵Mam dub nin tot twatwal? Dub nin ajikini mere li.

⁶Pien in itieko mako jamini ka imiegu ni pi banya, igonyo igoen i kom gi di iko weko gi kidong nono.

⁷In likame imio jo kame ool pii me amata, doko itwono jo akec oneko cam.

⁸In itio kede twer ni di iko mano lobo, iko mino but jo kame opwoyo kenekene.

⁹In itieko riamo apuserun ooto tenge kede cing gi nono, doko iko tero idwe kic kirac.

¹⁰Pi mano, owic nataman do otieko luki diere, doko ipong kede lworo atek.

¹¹Piny otieko doko col ni omio likame ikaruno neno gimoro, doko ariram omwonyi.

¹²“Mam Rubanga bedo i malo? Neningo acerin atie malo, ekite kame gin ibus kede!

¹³Do di in iwaco be, ‘Nyo kame Rubanga ngeo? Benyo benyo kame en ekaruno ngolo kede kop ne jo di edou acol cucucuc ogalao en?

¹⁴Edou apek oume omio likame ekaruno neno piny, doko en eoto i wi edou koyarere me i malo.’

¹⁵“Benyo, pwodi in imito dong lubo yongayo acon, yongayo kame jo areco obedo lubo?

¹⁶Gin bin kokoporo gi di oko tero gi di pwodi kare gi likame oromo; alele omolo gi tenge bala ot.

¹⁷Gin bin kiwaco ne Rubanga be, ‘Wek wa kur ilolo wa,’ kede be, ‘Nyo nat kame Rubanga Won Twer karuno timo ne wan?’

¹⁸Do di en kame epongo ude gi kede jamini kabeco. Ango cunya dagi tam me jo areco.

¹⁹Jo kopoore neno kede yomcuny alola kame komio jo areco; jo kalikame tie kede raco moro nyero gi kede acae,

²⁰di kiwaco be, ‘Ateteni jokwor wa kotieko muducaro, doko gikame gin oudo kiweko, mac otieko wango.’

²¹“Winyere kede Rubanga, di iko udo anapakin; manono en kame bino kelo ni bero.

²²Ud pwonyere kibute, di iko kano kop mere i cunyi.

²³Ka in idok but Rubanga Won Twer, di iko jiko tim areco i odi, kobino dwoki i ekite angoce itie iye.

²⁴Ka in itero saabu bala apua, kede di kitero saabu kame kokunyo i Opir bala engaro me dud ecilet,

²⁵kede ka Rubanga Won Twer en kame tie bala saabu nin kede siliba nin me wel,

²⁶in ibino bedo kede yomcuny i kom Rubanga Won Twer, doko lewic likame bino maki i nyime.

²⁷In ibino kwane, di en eko bino winyo kwac nin, di in iko bino timo gikame ikwongere iye.

²⁸Gi dedede kame in ibino timo, bino cobere ni kiber, doko nyimi bino bedo ler.

²⁹Rubanga dwoko jo kame wakere piny; do jo amwolere en elako gi.

³⁰En ebino laki ka in ili kede raco moro, in ibino bwot pien in itimo gi kopoore.”